Read new_tumbuka_bible Nehemiya 9 Bible Online

Nehemiya 9 - new_tumbuka_bible bible

Nehemiya 9

¹Pa zuŵa la 24 la mwezi weneuwu ŵaIsraele ŵakawungana pamoza uku ŵakuziŵizga kurya na kuvwara vigudulu na kujithilira fuvu pa mitu yawo.

²ŴaIsraele ŵakajipatula ku ŵamitundu wose ndipo ŵakimilira mu malo ghawo na kuzomera zakwananga zawo ndiposo na mauheni gha ŵawiskewokuru.

³Ŵakimilira mu malo ghawo na kuŵazga Buku la Marango gha FUMU, Chiuta wawo kwakuyana na nyengo ya maora ghatatu ndiposo na nyengo ya maora ghanyakhe ghatatu ŵakazomeranga zakwananga zawo na kusopa FUMU, Chiuta wawo.

⁴Pachanya pa chigongwe apo ŵakimiliranga ŵaLevi pakaŵa Yeshuwa, Bani, Kadimiyele, Shebaniya, Buni, Sherebiya, Buni na Kanani ŵeneawo ŵakachemerezga na mazgu ghakuru kwa FUMU, Chiuta wawo.

⁵Ntheura ŵaLevi aŵa, Yeshuwa, Kadimiyele, Bani, Hashabineya, Sherebiya, Hodiya, Shebaniya na Petahiya ŵakati, “Imilirani kuti muyirumbe FUMU, Chiuta winu, murumbani iyo kwa muyirayira swii Chindikani zina lakhe la uchindami zina ilo liri kutumphuskika pachanya pa vitumbiko na marumbo ghose.”

⁶Penepapo Ezira wakaromba wakati, “Imwe, FUMU, imwe pera ndimwe FUMU. Imwe ndimwe mukalenga kuchanya, kuchanya kwa pa machanya ghose, na vyose ivyo vikukhara kwenekura, charu cha pasi na vyose ivyo vili mwenemumo. Mukalenga nyanja na vyose ivyo vili mwenemumo, imwe ndimwe mukuvisungilira vyose, vya kuchanya vyose vikumulambirani imwe.

⁷Imwe ndimwe FUMU, Chiuta uyo wakasankha Abramu na kumufumyako ku Uru mu charu cha Babuloni, na kusintha zina lakhe kuti ŵaŵe Abrahamu.

⁸Mukasanga kuti ngwa mtima wakugomezgeka panthazi pinu. Mukachita phangano na iyo kumupa iyo na ŵa mphapu yakhe, charu cha ŵaKanani, ŵaHiti, ŵaAmori, ŵaPerezi, ŵaYebusi na ŵaGirigashi. Imwe mukafiska phangano linu chifukwa ndimwe ŵarunji.

⁹Mukawona visuzgo vya ŵasekuru ŵithu mu Eguputo, mukapulika kulira kwawo pa Nyanja ya Matete.

¹⁰Mukachita vimanyikwiro na minthondwe panthazi pa Faro, na panthazi pa ŵateŵeti ŵakhe wose ndiposo na pa ŵanthu ŵakhe wose, chifukwa mukamanya umo ŵakaŵasunjizgiranga ŵasekuru ŵithu. Ntheura mukakuzga zina linu nga ndi umo kuliri muhanya uno.

¹¹Mukagaŵa pakati nyanja yira uku ŵanthu ŵakuwona, mwakuti ŵakambuka pakati pa nyanja pa charu chomizo. Kweni ŵarwani ŵawo awo ŵakaŵarondezganga mukaŵabizga mu ndimba ya nyanja kubira nga ndi umo likubilira libwe pa maji ghanandi.

¹²Na muhanya mukaŵadangiriranga na mzati wa bingu, ndipo na usiku mukaŵadangiriranga na mzati wa moto kuŵapa ungweru mu nthowa iyo ŵakenera kwendamo.

¹³Mukakhira pa Phiri la Sinayi ndipo mukayowoya nawo kufuma kuchanya. Mukaŵapa malangulo na marango agho ngakunyoroka na gha urunji ndipo mukaŵapa maweruzgo na visambizgo viweme.

¹⁴Mukaŵasambizga kusunga zuŵa linu lakupatulika la Sabata, ndipo mukaŵapa malangulo, malayizgo na marango kwizira mwa muteŵeti winu Mozesi.

¹⁵Pa nyengo ya njara, mukaŵapa chakurya cha kufumira kuchanya, para ŵakomirwa, mukaŵapa maji kufumira mu jarawe. Ndipo mukaŵaphalira kuti ŵarute kuya kapoka charu icho imwe mukapangana kuŵapa.

¹⁶Kweni ŵasekuru withu ŵakajikuzga na kunonofya mitima yawo, ndipo kuti ŵakapulikira marango ghinu chara.

¹⁷Ŵakakana kupulikira ndipo ŵakatondeka kukumbuka, vya minthondwe ivyo mukachita mukati mwawo. Kweni ŵakanonofya mitima yawo ndipo mu chigaruka chawo ŵakajisorera munthu wakuŵarongozga kuti ŵawerere ku uzga wa mu Eguputo. Kweni imwe ndimwe Chiuta uyo wakugowokera, wa uchizi na wa chiwuravi, wakuziwurika kukaripa na wakuzura na chisungusungu. Ntheura imwe kuti mukaŵareka chara.

¹⁸Nanga ndi para ŵakajipangira chikozgo cha mwana wa ng'ombe na kuti, ‘Uyu ndi Chiuta winu uyo wakamufumyani mu Eguputo’ panji para wakachita vya miyuyuro vinandi kwa imwe.

¹⁹Kweni imwe mu chiwuravi chinu, kuti mukaŵareka mu mapopa chara. Mzati wa bingu uwo ukaŵadangiriranga mu nthowa pa nyengo ya muhanya kuti ukafumapo pachanya pawo chara, nanga ndi mzati wa moto pa nyengo ya usiku kuŵapa ungweru mu nthowa iyo ŵakenera kwendamo.

²⁰Mukaŵapa Mzimu winu uweme kuti uŵasambizge ndipo kuti mukaŵanora mana kuti ŵarye chara nanga ndi maji kuti ŵamwe para wakomirwa.

²¹Pa virimika 40, mukaŵapwererera mu mapopa ndipo kuti wakasoŵerwa kanthu chara. Vya kuvwara vyawo kuti vikamara chara ndipo malundi ghawo nagho kuti ghakatupa chara.

²²Ndimwe mukaŵapa nkhongono kuti ŵathereskere maufumu na mafuko gha ŵanthu ndipo mukaŵagaŵira charu icho ŵakapoka. Ntheura ŵakathereska Sihoni karonga wa msumba wa Heshiboni ndiposo na Ogi karonga wa chigaŵa cha Bashani.

²³Mukandaniska ŵa mphapu yawo nga ndi nyenyezi za kuchanya ndipo mukaŵatorera ku charu icho mukapangana na ŵasekuru ŵawo kuti ŵakanjire na kuchitora kuŵa chawo.

²⁴Ŵa mphapu yawo ndiwo ŵakanjira na kupoka charu. Imwe ndimwe mukaŵathereskera ŵenecharu awo ŵakaŵa ŵaKanani. Mukaŵapereka ŵaKanani na ŵakaronga ŵawo pamoza na ŵanthu ŵa mu charu mu mawoko gha ŵana ŵaIsraele kuti ŵachite nawo chose icho ŵakakhumbanga.

²⁵Ndipo ŵakapoka misumba ya malinga na charu cha nyata yiweme. Ŵakapoka nyumba izo zikazura na vinthu viweme, visimi vya maji vya kujima, minda ya mpheska na ya ma olive, na makuni ghanandi gha vipambi. Ndipo ŵakarya ŵakakhuta na kututuŵa ndiposo ŵakakondwera mu uweme winu.

²⁶“Ndipouli ŵakapulikira chara. Wakamugarukirani ndipo ŵakarazgira nkhonyoro ku marango ghinu. Wakakoma nchimi zinu izo zikaŵachenjezganga kuti ŵawerere kwa imwe. Ntheura wakachita cha muyuyuro chikuru kwa imwe.

²⁷Pa chifukwa ichi mukaŵapereka mu mawoko gha ŵarwani ŵawo ŵeneawo ŵakasuzga chomene. Ndipo apo ŵakasuzgikanga, ŵakalirira kwa imwe ndipo imwe mukaŵapulika kuchanya uko. Ndipo kwakuyana na uzari wa chisungusungu chinu mukaŵapa ŵanthu kuti ŵaŵathaske ku ŵarwani ŵawo.

²⁸Kweni ŵakati ŵakharapo mu mutende, ŵakambaso kuchita uheni panthazi pinu ndipo imwe mukaŵalegherezga mu mawoko gha ŵarwani ŵawo kuŵawusa. Ndipouli ŵakati wazgoka na kulirira kwa imwe, mukaŵapulika kuchanya uko ndipo kaŵirikaŵiri mukaŵathaska kwakuyana na chisungusungu chinu.

²⁹Mukaŵachenjezga kuti panji ŵangawerera ku marango ghinu kweni ŵakajikuzga ndipo ŵakareka kupulikira marango ghinu. Ŵakanangira Malangulo ghinu mu gheneagho munthu wakuŵa na umoyo usange wakughapulikira. Ŵakanonofya mitima yawo na kurazgira nkhonyoro kwa imwe na kukana kumupulikirani imwe.

³⁰Pa virimika vinandi mukaŵa zizipizgira iwo ndipo mukaŵachenjezga na Mzimu kwizira mu nchimi zinu, ndipouli kuti ŵakapulikira chara. Ntheura mukaŵapereka ku ŵanthu ŵa vyaru vinyakhe.

³¹Kweni mu chiwuravi chinu chikuru kuti mukaŵamara chara nanga kuŵareka pakuti imwe ndimwe Chiuta wa uchizi na wa chiwuravi.

³²“Ntheura sono imwe Chiuta withu, mwa ŵakuru ŵankhongono na ŵakofya mwaŵeneimwe mukusungilira phangano linu na kurongora chisungusungu chinu, mureke kuzomerezga kuti visuzgo ivyo vyatiwira ise viwoneke vichoko. Visuzgo ivyo vyawira ŵakaronga ŵithu na ŵarongozgi ŵithu, ŵasofi ŵithu, nchimi zithu, ŵasekuru ŵithu na ŵanthu wose, kufuma pa nyengo ya ŵakaronga wa ku Asiriya mpaka muhanya uno viwoneke vichoko.

³³Mu vyose ivyo vyatiwiranga ise, imwe mwanguŵa ŵarunji, mwachitanga mwakugomezgeka apo ise tachitanga viheni.

³⁴Ŵakaronga ŵithu, ŵarongozgi ŵithu ŵasofi ŵithu na ŵasekuru ŵithu kuti wakasunga marango ghinu chara nesi kupulikira malangulo ghinu na kuchenjezga kwinu uko imwe mukaŵaphalira.

³⁵Nanga ndi nyengo iyo ŵakaŵa pasi pa ufumu wawo, apo ŵakakondweranga na mauweme ghanandi agho mukaŵachitira ndiposo na charu chisani na cha nyata yiweme icho mukaŵapa, kuti ŵakamutemwani chara, nesi kuwerako ku milimo yawo yiheni.

³⁶Kweni sono wonani tili ŵazga lero. Tili ŵazga mu charu icho mukapereka ku ŵasekuru ŵithu kuti ŵarye vuna yakhe na viweme vya mwenemumo.

³⁷Chifukwa cha kwananga kwithu usambazi wose wa mu charu ichi ukuruta ku ŵakaronga awo muli kwimika pachanya pa ise. Iwo ŵakuwusa mathupi ghithu na viŵeto vyithu umo ŵakukhumbira ndipo ise tili mu suzgo yikuru chomene.”

³⁸Chifukwa cha vyose ivi, tikuchita phangano lakukhalirira na kulilemba ndipo ŵarongozgi ŵithu, ŵaLevi ŵithu, na ŵasofi ŵithu ŵakudindapo vidindo vyawo.