Read new_tumbuka_bible Esitere 2 Bible Online

Esitere 2 - new_tumbuka_bible bible

Esitere 2

¹Pamanyuma pa vinthu ivi, Karonga Ahasuweru wakati watuna ku ukari wakhe wakakumbuka Vashiti na icho wakachita ndiposo na icho chikalangurika kususkana nayo.

²Ŵateŵeti ŵa karonga awo ŵakaŵa pafupi nayo ŵakati, “Tiyeni timupenjere karonga ŵamwali ŵakulangwa, ŵakutowa.

³Karonga wimike ŵimiliri mu vigaŵa vyose vya ufumu wakhe kuti ŵawunganye ŵamwali wose ŵakulangwa, ŵakutowa chomene mu nyumba yakusungiramo ŵanakazi mu msumba wa Susa. Ŵasungilirike na Hegayi, nthunguli ya karonga uyo wali na mazaza pa ŵanakazi. Vyakuphaka mu mathupi ghawo, vyose vipike kwa iwo.

⁴Ndipo mwali uyo wamukondweska karonga ndiyo waŵe fumukazi mu malo gha Vashiti. Fundo iyi yikamukondweska karonga ndipo wakachita ntheura.”

⁵Sono mu msumba wa Susa mukaŵa muYuda yunji zina lakhe Morodekayi, wa fuko la Benjamini mwana wa Yayiri, mwana wa Shimeyi, mwana wa Kishi.

⁶Morodekayi wakaŵa yumoza wa ŵazga awo ŵakufuma ku Yerusalemu ŵeneawo Nebukadinezara, karonga wa charu cha Babuloni wakatorera ku umikori pamoza na Karonga Yekoniya[2] wa charu cha Yuda.

⁷Morodekayi wakaleranga mwana mwanakazi wa sibweni wakhe zina lakhe Hadasa. Hadasa wakachemekangaso kuti, “Esitere.” Ŵawiske na ŵanyina ŵakati ŵakafwa, Morodekayi wakamutora na kumulera nga ndi mwana wakhe. Mwali uyu wakaŵa wakutowa chomene na muweme nadi.

⁸Para karonga wakalangula na kupharazga dango lakhe lira, ŵamwali ŵanandi ŵakawunganiskika mu msumba wa Susa ku nyumba ya ufumu, kuti ŵasungilirike na Hegayi uyo wakaŵa na mazaza pa ŵanakazi. Esitere nayo wakatorekera pamoza nawo.

⁹Esitere wakamukondweska Hegayi ndipo wakasanga uchizi panthazi pakhe. Maluŵiro Hegayi wakamupa mafuta ghakuphaka na chakurya cha pa dera. Wakamupaso ŵamwali ŵankhonde na ŵaŵiri ŵeneawo ŵakasankhika kufuma mu nyumba ya ufumu kuti ŵamuteŵeterenge. Wakamupaso iyo pamoza na ŵamwali ŵakumuteŵetera ŵara malo ghaweme mu nyumba yakusungiramo ŵanakazi.

¹⁰Esitere kuti wakajiphara fuko lakhe nanga ndi mbumba yakhe chara, chifukwa Morodekayi wakamulangula kuti wareke kuchita ntheura.

¹¹Zuŵa na zuŵa Morodekayi wakajumphanga panthazi pa nyumba yakusungiramo ŵanakazi yira kuti wawone umo Esitere wakaŵira na umo wakakhaliranga.

¹²Ntheura nyengo yikafika yakuti ŵamwali ŵara ŵarute kuya kawonana na Karonga Ahasuweru waliyose pa yekha pa yekha. Kwakuyana na marango, ŵamwali ŵara ŵakenera kutora myezi 12 yakujitozgera, yinkhonde na umoza yakujiphaka mafuta gha mure ndipo myezi yinyakhe yinkhonde na umoza yakujiphaka mafuta ghanyakhe ghakutozgera thupi.

¹³Mwali waliyose uyo wakanjiranga kuti wawonane na karonga wakapikanga chilichose icho wakakhumbanga kufumira mu nyumba yakusungiramo ŵanakazi.

¹⁴Mwali waliyose wakanjiranga mu nyumba ya ufumu na nyengo ya mise ndipo na mulenje wakawerangako na kwiza kanjira mu nyumba ya chiŵiri yakusungiramo ŵanakazi uko ŵakasungikanga na Shaashigazi, nthunguli ya karonga, mweneuyo wakasungiliranga ŵawoli ŵachoko ŵa karonga. Mwali yose kuti wakawererangaso ku nyumba ya ufumu chara, pekhapekha apo karonga wakondwa nayo na kumuchema pakumuzunura zina.

¹⁵Para nyengo yakuti Esitere wanjilire mu nyumba ya ufumu kuya kawonana na karonga yikakwana, kuti wakakhumba kanthu kanyakhe kuruta nako chara kweni keneako pera wakaphalirika na Hegayi uyo wakaŵa nthunguli ya karonga uyo wakasungiliranga ŵanakazi. Esitere uyu wakaŵa mwana wa Abihayili, muvyara wa Morodekayi uyo wakamutora kuŵa mwana wakhe. Wose awo ŵakamuwona Esitere ŵakakondwa nayo chomene.

¹⁶Ntheura mu chirimika cha chinkhonde na chiŵiri cha kuwusa kwa Karonga Ahasuweru, mu mwezi wa khumi uwo ndi mwezi wa Tebete, Esitere wakatorekera kwa karonga mu nyumba yakhe ya ufumu.

¹⁷Karonga yura wakamutemwa Esitere kuruska ŵanakazi wose ndipo Esitere wakasanga uchizi na kukondwa panthazi pa karonga kuruska ŵamwali ŵakulangwa wose. Ntheura karonga wakamuvwarika mphumphu ya ufumu pa mutu wakhe ndipo wakamwimika kuŵa fumukazi mu malo gha Vashiti.

¹⁸Ntheura karonga wakanozgera nduna zakhe na ŵarongozgi ŵakhe chiphikiro chikuru cha kuchindikira Esitere. Wakalangula kuti kuŵe zuŵa la kupumulira mu vigaŵa vyose vya charu chakhe ndiposo wakapereka vyawanangwa vyakwenerera karonga.

¹⁹Para ŵamwali ŵakulangwa ŵara ŵakawunganiskika kachiŵiri, Morodekayi wakakharanga pa Chipata cha karonga.

²⁰Pa nyengo iyi Esitere wakaŵa wachali wandajiphare mtundu wakhe nanga ndi mbumba yakhe kwakuyana na umo Morodekayi wakamulangulira kuti wareke kuchita ntheura. Esitere wakarutilira kupulikira Morodekayi nga ndi umo wakachitiranga pa nyengo iyo wakamulereranga.

²¹Pa nyengo iyo Morodekayi wakakhaliranga pa Chipata cha karonga, Bigitani na Tereshi nthunguli ziŵiri za karonga ŵeneawo ŵakalindanga pa muryango wakunjira ku vipinda vya karonga wakakwiya ndipo ŵakakhumba kuti ŵamukome Karonga Ahasuweru.

²²Morodekayi wakachimanya ichi ndipo wakaphalira Fumukazi Esitere uyo wakaya kamuphalira Karonga Ahasuweru makani gha kufumira kwa Morodekayi.

²³Para ŵakafumbilira makani agha na kusanga kuti mbunenesko, ŵanthu ŵara ŵakaŵapayika pa khuni. Makani agha ghakalembeka mu Buku la Midauko uku karonga wakuwona.