Read new_tumbuka_bible Esitere 3 Bible Online

Esitere 3 - new_tumbuka_bible bible

Esitere 3

¹Pamanyuma pa vinthu ivi, Karonga Ahasuweru wakamukwezga Hamani, mwana wa Hamedata wa fuko la Agagi. Wakamuŵika kuti waŵe murara wa nduna zakhe zose.

²Ndipo ŵateŵeti wose ŵa karonga ŵa pa nyumba ya ufumu awo ŵakaŵa pa Chipata cha karonga, wakasindamanga na kumulambira Hamani, pakuti ntheura ndimo karonga wakalangulira kumuchitira Hamani. Kweni Morodekayi kuti wakamusindamiranga nanga kumulambira chara.

³Ntheura ŵateŵeti ŵa karonga awo ŵakaŵa pa Chipata cha karonga wakamufumba Morodekayi wakati, “Kasi ukuyuyulirachi dango la karonga?”

⁴Zuŵa na zuŵa ŵakamufumbanga Morodekayi kuti wapulikire dango la karonga, kweni iyo wakazgoranga kuti, “Ine ndine muYuda kuti ndingamulambira Hamani chara.” Ntheura ŵateŵeti ŵara ŵakamuphalira Hamani ivyo Morodekayi wakachitanga mwakuti ŵawone usange Morodekayi wangarutilira kuchita vya ntheura.

⁵Para Hamani wakawona kuti Morodekayi wakumusindamira nanga nkhumulambira chara wakakwiya chomene.

⁶Penepapo Hamani wakaghanaghana kuti wamukome Morodekayi. Kweni wakati waphalirika za fuko la Morodekayi kuti ndi muYuda, wakaghanaghana kuti wakome ŵaYuda wose mu charu chose cha Karonga Ahasuweru.

⁷Mu chirimika cha 12 cha kuwusa kwa Karonga Ahasuweru mu mwezi wakudanga uwo ndi mwezi wa Nisani ŵateŵeti ŵara ŵakachita mphenduzgo ya Puri panthazi pa Hamani agho ndi mayere gha mphenduzgo mwakuti ŵasange zuŵa la kuchitira chiŵembu ichi. Ntheura wakasankha zuŵa la 13 la mwezi wa 12 uwo ndi mwezi wa Adara.

⁸Penepapo Hamani wakati kwa Karonga Ahasuweru, “Ŵaliko ŵanthu ŵa fuko linji ŵeneawo ŵali kumbininikira na kubaralikira mu mitundu yinyakhe mu vigaŵa vyose vya ufumu winu. Iwo ŵali na maluso agho ghakupambana na gha ŵanthu ŵinu. Ndiposo ŵanthu aŵa kuti ŵakupulikira marango gha karonga chara. Ntheura ichi kuti chirekeke waka chingakondweska karonga chara.

⁹Usange chingaŵa chiweme kwa karonga, dango liŵikike lakuti fuko ili likomeke ndipo ine nditi ndiperekenge ndarama za siliva zakukwana makilogiramu 340,000 ku ŵanthu awo ŵakwendeska mlimo wa karonga mwakuti ziŵikike mu thumba lakusungiramo vyuma vya karonga.”

¹⁰Ntheura karonga wakavura mphete yakhe ku woko lakhe ndipo wakamupa Hamani mwana wa Hamedata wa fuko la Agagi mweneuyo wakaŵa murwani wa ŵaYuda.

¹¹Ndipo karonga wakati kwa Hamani, “Ndarama ndi zako ndiposo na ŵanthu wuwo kuti uchite navyo umo ukukhumbira.”

¹²Penepapo ŵalembi ŵa karonga ŵakachemeka pa zuŵa la 13 la mwezi wakudanga ndipo ŵakalemba vyose ivyo Hamani wakalangula. Ndipo dango ili ŵakalituma ku ŵimiliri ŵa karonga na nduna za ŵanthu mu vigaŵa vyose, ŵarongozgi ŵa ŵanthu ŵa kupambanapambana mu chigaŵa chilichose. Likalembeka mu malembo gha chigaŵa chilichose ndiposo mu chiyowoyero cha ŵanthu wose. Dango ili likalembeka mu zina la Karonga Ahasuweru ndipo likakhozgeka na chidindo cha karonga.

¹³Makarata ghakatumika na nthumi ku vigaŵa vyose vya karonga na mazgu ghakuti, “Pa zuŵa la 13 la mwezi wa 12, weneuwo ndi mwezi wa Adara, ŵaYuda muŵaparanye, muŵakome na kuŵamara petu mu zuŵa limoza, kwamba ŵawukirano na ŵarara, ŵanakazi na ŵana wuwo ndiposo kuti ŵaskoghe vinthu vyawo.”

¹⁴Mazgu gha mu karata uyu ghakatumika ku chigaŵa chilichose nga ndi languro kuŵamanyiska ŵanthu wose kuti ŵanozgekere pa zuŵa ili.

¹⁵Nthumi zikaruta luŵiro pakuti karonga ndiyo wakalangula languro ilo likalembekera ku msumba wa Susa uko kukaŵa nyumba ya ufumu. Penepapo karonga na Hamani ŵakakhara pasi kuti ŵamwe. Kweni ŵanthu ŵa msumba wa Susa ŵakatimbanizgika chomene.