Read new_tumbuka_bible Esitere 4 Bible Online

Esitere 4 - new_tumbuka_bible bible

Esitere 4

¹Para Morodekayi wakamanya vyose ivyo vikachitika, wakapurura vyakuvwara vyakhe ndipo wakavwara chigudulu na kujithilira vyoto. Wakaruta mukati mu msumba na kulira na mazgu ghakuchemerezga chomene, ghakuŵinya mtima.

²Wakaruta mpaka wakaya kafika pa Chipata cha karonga, kweni wakanjira chara chifukwa pakaŵavye na yumoza uyo wakazomerezgekanga kunjira uku wavwara vigudulu.

³Mu vigaŵa vyose umo mukafika dango la karonga na languro lakhe mukaŵa kulira kukuru mukati mu ŵaYuda. Ŵakaziŵizga kurya, ŵakatengera na kulira ndipo ŵanandi ŵakavwara vigudulu na kugona pa vyoto kurongora chitima.

⁴Para ŵateŵeti-kazi ŵa Esitere na zinthunguli zakhe zikiza na kumuphalira Esitere vya Morodekayi, Fumukazi Esitere wakapwetekeka chomene mu mtima. Wakatuma vyakuvwara kuti Morodekayi wakavware, kweni Morodekayi wakakana.

⁵Penepapo Esitere wakachema Hataki, yumoza wa zinthunguli za karonga izo zikimikika kumuteŵetera Esitere. Wakamuphalira kuti warute kwa Morodekayi wakafumbe icho chawako ndipo chifukwa chakhe nchakuti uli?

⁶Ntheura Hataki wakaruta kwa Morodekayi pa luwugha lwa mu msumba panthazi pa Chipata cha karonga.

⁷Morodekayi wakamwandulira vyose ivyo vyamuwira ndiposo na unandi wa ndarama izo Hamani wakapangana kupereka mu thumba lakusungiramo chuma cha karonga mwakuti ŵaYuda ŵakomeke.

⁸Morodekayi wakamupaso karata wa languro uyo wakafuma ku msumba wa Susa wakuphara kuti ŵaYuda wose ŵakomeke. Wakamuphalira kuti wakayirongore karata yira kwa Esitere mwakuti wakaŵaŵeyerere kwa karonga na kuŵarombera ŵanthu ŵakhe.

⁹Hataki wakaruta ndipo wakaya kamwandulira Esitere ivyo Morodekayi wakayowoya.

¹⁰Penepapo Esitere wakayowoya na Hataki ndipo wakatuma mazgu kwa Morodekayi ghakuti,

¹¹“Ŵateŵeti wose ŵa karonga ndipo ŵanthu wose ŵa mu vigaŵa vya karonga ŵakumanya kuti waliyose manyi wangaŵa mwanarume panji mwanakazi usange wakunjira ku chipinda cha mukati cha karonga kwambula kuti wachemeka, pali dango limoza pera lakuti: Waliyose wakwenera kukomeka, kweni yekha pera uyo karonga wamurongora na ndodo yakhe ya ufumu iyo nja golide, mweneuyo pera ndiyo wangaŵa na umoyo. Ndipo ine mu mazuŵa agha 30 kuti ndili kuchemekapo kuti nkhanjire umo muli karonga chara.”

¹²Para Hatati wakamuphalira Morodekayi mazgu gha Esitere,

¹³Morodekayi wakamuwezga Hatati kuti wakamuphalire Esitere mazgu agha, “Ureke kughanaghana kuti apo uli mu nyumba ya ufumu iwe wekha ndiwe ungathaskikapo pakati pa ŵaYuda wose.

¹⁴Chifukwa usange ukukhara waka chete pa nyengo ya ntheura nga ndi iyi, umanye kuti kuwombokwa na kuthaskika kwa ŵaYuda, viti vifumire kunyakhe, kweni iwe na mbumba ya ŵawuso muti mumarenge petu. Ndipo kasi ndi njani wakumanya kuti panji ndicho chifukwa iwe uli kwizira uko ku nyumba ya ufumu pa nyengo ya nga ndi iyi.”

¹⁵Penepapo Esitere wakamutuma Hataki mazgu agha kuti wakamuphalire Morodekayi:

¹⁶“Rutani mukaŵawunganye ŵaYuda wose awo ŵali mu msumba wa Susa. Mukaziŵizge kurya na kumwa chifukwa cha ine kwa mazuŵa ghatatu muhanya na usiku. Ine na ŵateŵeti-kazi ŵane nase titi tiziŵizgenge kurya. Para ichi chachitika, ine ndamkuruta kwa karonga nangauli dango likukana. Usange ndamkufwa chifukwa cha kuruta, mbwenu nkhafwe.”

¹⁷Penepapo Morodekayi wakaruta ndipo wakaya kachita vyose nga ndi umo Esitere wakamuphalirira.