Read new_tumbuka_bible Esitere 5 Bible Online

Esitere 5 - new_tumbuka_bible bible

Esitere 5

¹Pa zuŵa la chitatu la kuziŵizgira kurya, Esitere wakavwara malaya gha ufumukazi ndipo wakaruta kuya kimilira pa luwugha lwa mukati lwa nyumba ya ufumu panthazi pa chipinda chakukumaniranamo. Karonga wakakhara pa chizumbe cha ufumu mukati mu nyumba ya ufumu kuthyana na chipata cha nyumba yira.

²Ndipo karonga wakati wawona Fumukazi Esitere wimilira pa luwugha, wakakondwa nayo ndipo, na ndodo ya ufumu ya golide yeneiyo yikaŵa mu woko lakhe, wakayinyoroskera kwa Esitere. Penepapo Esitere wakasenderera kufupi na kukhwaska ku songo kwa ndodo yira.

³Penepapo karonga wakafumba wakati, “Kasi ukukhumbachi iwe Fumukazi Esitere? Icho ukuromba ndi chithu uli? Chose icho ukukhumba nditi ndikupenge nanga ndi hafu wa ufumu wane.”

⁴Esitere wakazgora wakati, “Usange chingamukondweskani imwe karonga, ndatenge imwe pamoza na Hamani mwize ku chiphikiro icho ndamunozgerani imwe karonga.”

⁵Penepapo karonga wakalangula wakati, “Kamutorani Hamani mwize nayo luŵiro mwakuti tizakaŵepo pa chiphikiro nga ndi umo Esitere wakhumbira. Ntheura karonga na Hamani ŵakiza ku chiphikiro icho Esitere wakanozga.

⁶Ndipo apo ŵakaŵa ŵachali kumwa vinyo, karonga wakafumbaso Esitere wakati, ‘Sono yowoya, kasi icho ukuromba ndi chinthu uli? Chinthu icho chiti chipikenge kwa iwe. Kasi ukukhumbachi kuti ndikupe vichi? Ine ndikupenge nanga ndi hafu wa ufumu wane.’ ”

⁷Penepapo Esitere wakazgora wakati, “Icho nkhuromba na kukhumba kwa imwe karonga ndi ichi,

⁸‘Usange imwe karonga mwakondwa nane ndipo usange nchiweme kwa karonga kundipa icho nkhuromba na kufiska khumbo lane, zomerezgani imwe karonga na Hamani kuti mwize ku chiphikiro icho ndamunozgerani na machero. Penepapo ndipo ndamkuzgora fumbo la imwe karonga.’ ”

⁹Zuŵa lenelira Hamani wakafuma wali wakuzura na chimwemwe na wakukondwa mu mtima. Kweni para wakati wamuwona Morodekayi pa Chipata cha karonga kuti wakwimilira panji nesi kutenthema chifukwa cha iyo Hamani chara, wakamukwiyira chomene Morodekayi.

¹⁰Ndipouli Hamani wakajikora wakaruta ku nyumba yakhe. Wakatuma ŵanthu kuti ŵakacheme ŵakutemweka ŵakhe ndipo wakamuchemaso muwoli wakhe Zereshi.

¹¹Hamani wakajikuzga za uchindami wa usambazi wakhe unandi, wa ŵana ŵakhe na umo karonga wakamuchindikira pakumukwezga kuŵa pachanya pa nduna na ŵateŵeti ŵakhe wose.

¹²Hamani wakati, “Fumukazi Esitere nayo kuti wachemaso munyakhe chara kuti wakaŵepo pa chiphikiro icho yanozgera karonga chara, kweni ine pera. Ine ndine ndachemeka kuŵapo pa chiphikiro icho yanozgera karonga na machero.

¹³Kweni vyose ivi vikwandula kanthu chara usange nkhuwona muYuda yura Morodekayi kuti wali pa Chipata cha karonga.”

¹⁴Penepapo muwoli wakhe Zereshi pamoza na ŵakutemweka ŵakhe wose ŵakati kwa iyo, “Munozge khuni mamita 23. Ntheura na machero ku mulenje muyowoye kwa karonga kuti Morodekayi wapayikike pa khuni leneilo. Pamanyuma mwamkuruta ku chiphikiro na mtima wakukondwa pamoza na karonga.” Fundo iyi yikamukondweska Hamani ndipo wakanozga khuni lakuti wapayikepo Morodekayi.