Read new_tumbuka_bible Esitere 6 Bible Online

Esitere 6 - new_tumbuka_bible bible

Esitere 6

¹Usiku wenewura karonga kuti wakagona tulo chara. Ntheura wakalangula kuti ŵanthu ŵakamutorere Buku la Midauko la muwuso wakhe ndipo ŵakamuŵazgira.

²Mukasangika kuti muli kulembeka na umo Morodekayi wakaphalira makani gha Bigitani na Tereshi, nthunguli ziŵiri zira za karonga, zeneizo zikalindanga pa muryango wakunjirira ku vipinda vya karonga, kuti ndizo zikanozgekera chiŵembu chakuti zikome Karonga Ahasuweru.

³Penepapo karonga wakati, “Kasi Morodekayi wali kupokera nchindi uli yakuzirwa pa chifukwa cha ichi?” Ŵateŵeti awo ŵakamuteŵeteranga karonga wakati, “Palije na chimoza icho ŵali kumuchitirapo.”

⁴Ndipo karonga wakati, “Ndi njani uyo wali mu luwugha.” Sono pa nyengo yeneiyo ndipo Hamani wakanjiranga waka mu luwugha lwa kuwaro kwa nyumba ya ufumu kuti wizakayowoye kwa karonga kuti Morodekayi wapayikike pa khuni ilo wakimika.

⁵Ntheura ŵateŵeti ŵa karonga ŵakazgora ŵakati, “Hamani ndiyo wimilira mu luwugha.” Ndipo karonga wakati, “Muchemani wanjire.”

⁶Ntheura Hamani wakanjira ndipo karonga wakati kwa iyo, “Kasi kungamuchitikira vichi munthu mweneuyo karonga wakukhumba kumuchitira chinthu cha nchindi?” Ndipo Hamani wakaghanaghana mu mtima wakhe, “Kasi kungaŵaso munthu munyakhe mweneuyo karonga wakukhumba kumuchitira chinthu cha nchindi kuruska ine.”

⁷Penepapo Hamani wakati kwa karonga, “Munthu uyo karonga wakukhumba kumuchitira chinthu na nchindi,

⁸kuzomerezgeke kuti malaya gha ufumu agho karonga wakuvwara, hachi ilo karonga wakukwerapo, leneilo mphumphu ya ufumu yikuvwarikika pa mutu wakhe, ŵize navyo pano.

⁹Ndipo vyakuvwara ivi na hachi viperekeke kwa yumoza wa nduna zinu zakuzirwa za karonga. Nduna yeneiyo ndiyo yimuvwarike munthu uyo karonga wakhumba kumuchindika. Penepapo ŵamukwezge pa hachi na kumwendeska mu msumba uku ŵakuyowoya panthazi pakhe kuti, ‘Wonani umo ŵakuchitira na munthu uyo karonga wakukhumba kumuchindika.’ ”

¹⁰Penepapo karonga wakati kwa Hamani, “Rutanga luŵiro ukatore malaya gha ufumu na hachi nga ndi umo wayowoyera ndipo uchite ntheura kwa Morodekayi muYuda uyo wakukhara pa Chipata cha karonga. Paŵavye kanthu kakurekeka kuchitika pa vyose ivyo wayowoya.”

¹¹Ntheura Hamani wakaya katora malaya gha ufumu na hachi. Wakamuvwarika Morodekayi na kumukwezga pa hachi lira ndipo wakamwendeska mu misewu ya mu msumba na kupharazga panthazi pakhe kuti, “Umu ndimo kukuŵira na munthu uyo karonga wakukhumba kumuchitira chinthu cha nchindi.”

¹²Vikati vyachitika vinthu ivi Morodekayi wakawerera pa Chipata cha karonga, kweni Hamani wakendeska luŵiro kuruta ku nyumba yakhe wakulira uku wadika ku mutu wakhe.

¹³Ndipo Hamani wakamuphalira muwoli wakhe Zereshi na ŵabwezi ŵakhe wose vyose ivyo vikachitika kwa iyo. Penepapo ŵarongozgi ŵakhe na muwoli wakhe Zereshi wakati kwa iyo, “Usange Morodekayi mweneuyo sono iwe wayambako kumulambira ngwa fuko la chiYuda, kuti uti umuruskenge chara, kweni umulambirenge nadi.”

¹⁴Apo ŵanthu ŵara ŵakaŵa ŵachali kuyowoya na Hamani, nthunguli za karonga zikafika, zikamutora Hamani na kuruta nayo luŵiroluŵiro ku chiphikiro icho Esitere wakanozga.