Read new_tumbuka_bible Esitere 8 Bible Online

Esitere 8 - new_tumbuka_bible bible

Esitere 8

¹Pa zuŵa lenelira Karonga Ahasuweru wakapereka kwa Fumukazi Esitere nyumba ya Hamani mweneuyo wakaŵa murwani wa ŵaYuda. Ndipo Morodekayi wakiza panthazi pa karonga pakuti Esitere wakamuphalira za ubali wawo.

²Penepapo karonga wakatora mphete yakhe iyo wakayitora kwa Hamani ndipo wakayipereka kwa Morodekayi. Ndipo Esitere wakamwimika Morodekayi kuŵa wa mazaza pa nyumba ya Hamani.

³Esitere wakiza panthazi pa karonga, ndipo wakawa mu malundi ghakhe na uku wakulira masozi. Wakamuŵeya kuti wawuskepo chiŵembu chiheni icho wakanozgekera Hamani wa fuko la Agagi kuti wakome ŵaYuda.

⁴Penepapo karonga wakanyoroskera ndodo yakhe ya golide pa Esitere, ndipo Esitere wakawuka na kwimilira panthazi pa karonga.

⁵Iyo wakati, “Usange nchiweme kwa karonga ndipo usange nkhumukondweskani imwe karonga na kuwoneka chiweme panthazi pinu, rekani languro lilembeke lakuti liwuskepo ivyo wakalemba Hamani wa fuko la Agagi mwana wa Hamedata vyakukoma ŵaYuda mu awo ŵali mu vigaŵa vyose vya karonga.

⁶Pakuti kasi ndingazizipizga uli kuwona uheni uwo ukwiza pa ŵabali ŵane. Panji kasi ndingazizipizga uli kuwona kuti ŵanthu ŵa ku kwithu ŵakumara?”

⁷Ntheura Karonga Ahasuweru wakazgora Fumukazi Esitere na Morodekayi muYuda wakati, “Wonani ine ndapereka nyumba ya Hamani kwa iwe Esitere ndipo mwenecho Hamani ŵali kumupayika pa khuni chifukwa wakanozgekera kukoma ŵaYuda.

⁸Imwe namwe mulembere ku ŵaYuda umo mukukhumbira. Mulembe mu zina lane ndipo mudindepo chidindo cha ufumu wane, pakuti dango ilo likalembeka mu zina la karonga na kudindapo na chidindo cha ufumu, palije na yumoza uyo wangasintha.”

⁹Penepapo ŵalembi ŵakaronga ŵakachemeka pa zuŵa la 23 mu mwezi wa chitatu uwo ndi mwezi wa Sivani. Ndipo languro likalembeka nga ndi umo Morodekayi wakalangulira pa makani ghose gha ŵaYuda. Languro lira ŵakalituma ku ŵimiliri ŵa karonga, nduna na ŵarongozgi ŵa vigaŵa kufuma ku charu cha Indiya na kuya kafika ku charu cha Etiyopiya vya kukwana 127. Chigaŵa chilichose chikalembeka malembo agho chikazgoŵera ndipo ŵanthu wose mu chiyowoyero chawo. ŴaYuda nawo ŵakalembekera mu malembo ghawo na mu chiyowoyero chawo.

¹⁰Morodekayi wakalemba languro lira mu zina la Karonga Ahasuweru na kudindapo chidindo cha karonga. Wakatuma makarata gha languro lira na zinthumi zakukwera pa mahachi gha karonga agho ghakachimbiranga chomene, gheneagho ghakababika mu chiŵaya cha ufumu.

¹¹Languro la karonga ilo likatumika likaŵa la kuŵazomera ŵaYuda awo ŵakaŵa mu msumba uliwose kuti ŵawungane pamoza na kujithaska. Ŵakwenera kuparanya, kukoma na kumalirathu petu ŵanthu wose awo ŵaŵawukira kufumira ku charu chilichose panji chigaŵa chose ndipo ŵakwenera kurwa nawo kuŵakoma iwo pamoza na ŵanakazi ŵawo na ŵana ŵawo ndipo ŵaskoghe vinthu vyawo.

¹²Ŵakazomerezgeka kuchita vyose pa zuŵa limoza pera mu vigaŵa vyose vya ufumu wa Ahasuweru leneilo likaŵa zuŵa la 13 la mwezi wa 12 weneuwo ndi mwezi Adara.

¹³Mazgu agha ghakalembeka kuŵa dango ku vigaŵa vyose ndipo likapharazgika ku ŵamitundu wose. Ndipo ŵaYuda ŵakaphalirika kuti ŵanozgekere pa zuŵa leneilo kuti ŵawezgere nduzga pa ŵarwani ŵawo.

¹⁴Ntheura nthumi zira zikakwera pa mahachi gha ufumu, gheneagho ghakachimbiranga luŵiroluŵiro. Zikakwera pa ŵakavalo mwa luŵiroluŵiro, pakukhuŵirizgika na languro la karonga, leneilo likalembeka mu msumba wa Susa, uko kukaŵa nyumba ya ufumu.

¹⁵Morodekayi wakawukapo panthazi pa karonga uku wavwara malaya gha ufumu gha bululu na ghatuŵa na mphumphu yikuru ya golide. Munjilira wakhe ukaŵa uweme wa bafuta na muchesamu ndipo ŵanthu ŵa mu msumba wa Susa ŵakachemerezga na kukondwa.

¹⁶Pakuti ku ŵaYuda, yikaŵa nyengo ya ungweru, ya kukondwa na ya chimwemwe, ndipo ŵanthu ŵakaŵachindikanga.

¹⁷Mu chigaŵa chilichose na mu msumba wose uko languro la karonga lira likafika, mukaŵa chimwemwe na kukondwa pakati pa ŵaYuda. Likaŵa zuŵa la chiphikiro na lakupumula kwambula kuteŵeta mlimo. Ndiposo ŵenecharu ŵanandi ŵakajizgora kuŵa ŵaYuda chifukwa cha kopa ŵaYuda.