Read new_tumbuka_bible Esitere 9 Bible Online

Esitere 9 - new_tumbuka_bible bible

Esitere 9

¹Pa zuŵa la 13 la mwezi wa 12 weneuwo ndi mwezi wa Adara, dango la karonga ilo wakalangula lakukoma ŵaYuda likenera kufiskika. Pa zuŵa ili ŵarwani ŵa ŵaYuda ŵakaŵa na chigomezgo kuti wati ŵamarenge ŵaYuda pakuŵakoma. Kweni vinthu vikasintha, ŵaYuda ndiwo wakakoma ŵarwani ŵawo awo ŵakaŵatinkhanga.

²ŴaYuda ŵakawungana mu misumba yawo yose iyo yikaŵa mu vigaŵa vyose vya Karonga Ahasuweru kuti ŵarwe na wose awo ŵakakhumba kuŵakoma. Ndipo pakaŵavye na yumoza uyo wakamanya kwimikana nawo chifukwa ŵanthu ŵakopanga ŵaYuda.

³Ndipo wose ŵakawusa vigaŵa, ŵimiliri ŵa karonga, nduna na ŵarongozgi ŵa karonga ŵakovwira ŵaYuda chifukwa wose ŵakopanga Morodekayi.

⁴Pakuti Morodekayi ndiyo wakaŵa mukuru mu nyumba ya ufumu ndipo lumbiri lwakhe lukatandazgika mu vigaŵa vyose ndipo mazaza ghakhe ghakakulirangakuliranga.

⁵Ntheura ŵaYuda ŵakaŵamara ŵarwani ŵawo na lupanga. Ŵakaŵakoma na kuŵamara petu ndipo ŵakachita nawo ŵarwani ŵawo nga ndi umo ŵakakhumbira.

⁶Mu msumba wa Susa umo mukaŵa nyumba ya ufumu ŵaYuda ŵakaŵakoma na kuparanya ŵanthu 500.

⁷Awo ŵakakomeka ŵakaŵa aŵa: Parishandata, Dalifoni, Asipata,

⁸Porata, Adaliya, Aridata,

⁹Parimashita, Arisayi, Aridayi na Vayizata,

¹⁰ŵana khumi ŵa Hamani, mwana wa Hamedata uyo wakaŵa murwani wa ŵaYuda. Kweni kuti ŵakaskogha vinthu vyawo chara.

¹¹Pa zuŵa lenelira makani gha ŵanthu ŵanandinandinawo awo ŵakakomeka mu msumba wa Susa, weneuwo ndi chikhazi cha ufumu ghakamufika karonga.

¹²Penepapo karonga wakati kwa Fumukazi Esitere, “ŴaYuda ŵakoma na kumara petu ŵanthu 500 mu msumba wa Susa pera ndipo ŵakomaso ŵana khumi ŵa Hamani. Manyi mu vigaŵa vinyakhe vya ufumu wane ivyo vyakharako ŵakomenge uli? Kasi sono icho ukuromba nchinthu uli? Ine nditi ndikupenge. Nchinthu uli icho ukukhumba kuti ndikupe.”

¹³Esitere wakazgora karonga wakati, “Usange nchiweme kwa karonga, zomerani kuti ŵaYuda awo ŵali mu msumba wa Susa ŵachiteso ntheura pera na machero kwakuyana na dango la karonga. Ndipo ŵana ŵa Hamani khumi aŵa, vitanda vyawo vipayikike pa khuni.”

¹⁴Ntheura karonga wakalangula kuti ichi chichitike. Languro likafuma mu msumba wa Susa kuti vitanda vya ŵana ŵa Hamani vipayikike pa khuni.

¹⁵ŴaYuda awo ŵakaŵa mu msumba wa Susa ŵakawunganaso pa zuŵa la 14 la mwezi wa Adara ndipo wakakomaso ŵanthu 300 mu msumba wa Susa. Kweni kuti wakatoramo vyakuskogha chara.

¹⁶Ndipo ŵaYuda ŵanyakhe awo ŵakaŵa mu vigaŵa vinyakhe vya ufumu nawoso ŵakawungana pamoza kuti wajithaske. Wakajipumuzga ku ŵarwani ŵawo pakukoma 75,000 awo ŵakaŵatinkhanga. Kweni kuti wakatoraso vyakuskogha vilivyose chara.

¹⁷Ichi chikachitika pa zuŵa la 13 la mwezi wa Adara ndipo pa zuŵa la 14 wakapumula mu leneilo ŵakachita chiphikiro kuti wakondwerere.

¹⁸Kweni ŵaYuda awo ŵakaŵa mu msumba wa Susa, ŵakawungana pa zuŵa la 13 na la 14 la mwezi wa Adara ndipo ŵakapumula pa zuŵa la 15 mu leneilo ŵakachita chiphikiro kuti ŵakondwerere.

¹⁹Ichi ndicho chifukwa ŵaYuda awo ŵakukhara mu vikaya vyambula malinga ŵakukumbukira zuŵa la 14 la mwezi wa Adara kuŵa zuŵa lakukondwerera ndipo ŵakuŵa na chiphikiro mu leneilo ŵakuperekera vyawanangwa kwa yumoza na munyakhe.

²⁰Morodekayi wakalemba vinthu ivi ndipo wakatuma makarata ghakhe ku ŵaYuda wose awo ŵakakharanga mu vigaŵa vyose vya pafupi na kutali vya Karonga Ahasuweru.

²¹Wakaŵaphalira kuti chirimika chilichose ŵaŵenge na chiphikiro chakukumbukira chinthu ichi pa zuŵa la 14 la mwezi wa Adara ndiposo na la 15 la mwezi weneuwu.

²²Chifukwa mu mazuŵa gheneagha ndigho ŵaYuda ŵati ŵawombokwe ku ŵarwani ŵawo. Mu mwezi ura chitima icho ŵakaŵa nacho, chikazgoka chimwemwe ndipo zuŵa la kutengerera likazgoka zuŵa la chikondwerero. Morodekayi wakalangula kuti mazuŵa agha ŵaghayimike kuŵa mazuŵa gha chiphikiro na kusekerera ndiposo na ghakutumizgirana vyakurya ku yumoza na munyakhe ndiposo na vyawanangwa ku ŵakavu.

²³Ntheura ŵaYuda wakazomerezga kuchita chiphikiro icho ŵakamba, nga ndi umo Morodekayi wakalangulira mu karata wakhe.

²⁴Wakapereka zina ili chifukwa Hamani wa fuko la Agagi mwana wa Hamedata mweneuyo wakaŵa murwani wa ŵaYuda wose wakaŵachitira chiŵembu kuti waŵakome ndipo ŵakachita mayere gha mphenduzgo agho ghakuchemeka Puri kuti wasange zuŵa na mwezi uwo wangaŵakomera ŵaYuda na kuŵamara petu.

²⁵Kweni para Esitere wakiza panthazi pa karonga, karonga wakalangula pakulemba makarata kuti icho wakanozgekera kuŵachitira ŵaYuda, chichitikire pa iyomwene na kuti iyo pamoza na ŵana ŵakhe ŵapayikike pa khuni.

²⁶Ntheura mazuŵa agha ghakachemeka kuti Purimu kufuma mu lizgu lakuti Puri. Ghakuchemeka ntheura chifukwa cha mazgu ghose agho ghali mu karata uyu, vyose ivyo wakaviwona pa makani agha, ndiposo na ivyo vikaŵawira.

²⁷ŴaYuda ŵakachitora kuti ŵachiyimike ichi kuŵa kaluso kawo mwakuti iwo na mphapu yawo ndiposo wose awo ŵakajibatika kwa iwo wakumbukenge kwambula kutondeka mazuŵa ghaŵiri agha chirimika chilichose nga ndi umo chili kulembekera na pa nyengo iyo chili kwimikira.

²⁸Mazuŵa agha ghakumbukikenge na kusungika mu miwiro yose, mu mbumba yiliyose, mu chigaŵa chilichose ndiposo mu msumba uliwose. Mazuŵa agha gha Purimu ghangarekekanga chara kuchitikira chiphikiro pakati pa ŵaYuda nanga nkhuruwika na ŵa mphapu yawo.

²⁹Penepapo Fumukazi Esitere mwana wa Abihayili pamoza na Morodekayi muYuda ŵakalemba karata wakupereka mazaza ghose ghakukhozgera karata wa chiŵiri wakuphara za chiphikiro cha Purimu.

³⁰Morodekayi wakatuma makarata ku ŵaYuda wose awo ŵakaŵa mu vigaŵa 127 vya ufumu wa Ahasuweru. Mu makarata ghara mukaŵa mazgu gha mutende na kugomezgeka.

³¹Wakalemba kuti mazuŵa agha gha Purimu ghakwenera kukumbukika pa nyengo yakhe iyo ghakimikikira nga ndi umo Morodekayi muYuda na Fumukazi Esitere wakaŵalangulira ŵaYuda. Ŵaghasungenge kwakuyana na umo ŵakajimikira ŵekha na ŵa mphapu yawo kuti ghaŵe ghakuziŵizgira kurya na ghakutengerera.

³²Dango la Fumukazi Esitere likakhozga makani agha gha Purimu ndipo likalembeka mu Buku la Midauko.