Read new_tumbuka_bible Kufuma 1 Bible Online

Kufuma 1 - new_tumbuka_bible bible

Kufuma 1

¹Agha ndi mazina gha ŵana ŵa Yakhobe awo ŵakaruta ku Eguputo pamoza na wiskewo Yakhobe, waliyose na mbumba yakhe:

²Rubeni, Simiyoni, Levi na Yuda,

³Isakara, Zebuloni na Benjamini,

⁴Dani, Nafutali, Gadi na Ashere.

⁵Ŵa mphapu ya Yakhobe wose pamoza ŵakaŵa 70.[1] Yosefe mwana wakhe wakaŵa kuti wali ku Eguputo kale.

⁶Mukukhara mu zinyengo, Yosefe wakafwa, ndipo ŵana ŵanyakhe wose pamoza na muwiro ura nawo ŵakafwa.

⁷Kweni ŵa mphapu yawo ŵakababana na kwandana chomene. Iwo ŵakaŵa ŵanandi na ŵankhongono chomene mwakuti charu chikazura na iwo.

⁸Sono karonga muphya uyo kuti wakamumanya Yosefe chara, wakamba kuwusa charu cha Eguputo.

⁹Ndipo wakati ku ŵanthu ŵakhe, “Wonani ŵaIsraele mbanandi ndipo mbankhongono kuruska ise.

¹⁰Tiyeni tiŵachenjerere, mzire ŵandane. Para nkhondo yatizira, iwo ŵasazgikanenge na ŵarwani ŵithu ndipo ŵarwenge nase nkhondo na kufuma mu charu.”

¹¹Ntheura ŵakaŵamikira ŵakuru ŵakuŵalaŵirira mwakuti ŵaŵasuzgenge na milimo yinonono. Ndipo ŵaIsraele wakamuzengera Faro misumba ya Pitomu na Ramesesi yakusungiramo vyakurya.

¹²Kweni apo ŵakaŵasuzganga chomene ntheura, ŵaIsraele wakandananga chomene na kutandazgikira kosekose. Ntheura ŵaEguputo ŵakamba kuŵatinkha na kopa chomene ŵaIsraele.

¹³Ndipo ŵakaŵateŵeteska ŵaIsraele mwa nkhaza.

¹⁴Wakachitiska kuti umoyo wa ŵaIsraele uŵe wakuŵaŵa na milimo yinonono pakuŵawumbiska njerwa na mu milimo yakupambanapambana yose ya mu minda. Mu milimo yawo yose yinonono, ŵaEguputo ŵakaŵateŵeteska ŵaIsraele mwa nkhaza.

¹⁵Ntheura karonga wa Eguputo wakuyowoya ku ŵazamba ŵa ŵaHebere awo mazina ghawo ŵakaŵa Shifura na Puva kuti,

¹⁶“Para mukuzambika ŵanakazi ŵa ŵaHebere, muŵawonenge apo ŵagona. Usange ndi mwana mwanarume, mumukomenge, kweni usange ndi mwana mwanakazi, mumureke waŵe wa moyo.”

¹⁷Kweni ŵazamba ŵara ŵakaŵa ŵakopa Chiuta ndipo ŵakachita chara ivyo karonga wa charu cha Eguputo wakaŵalangulanga. Ŵakaŵareka ŵana ŵanarume kuŵa ŵamoyo.

¹⁸Ntheura karonga wa Eguputo wakachema ŵazamba ŵara ndipo wakaŵafumba kuti, “Nchifukwa uli mwachita ichi? Nchifukwa uli mwareka ŵana ŵanarume kuŵa ŵamoyo?”

¹⁹Ŵazamba ŵara ŵakazgora Faro kuti, “Ŵanakazi ŵa ŵaHebere kuti ŵakuyana na ŵanakazi ŵa ŵaEguputo chara. Iwo mbankhongono ndipo ŵakubaba pambere ŵazamba ŵandafike.”

²⁰Ntheura Chiuta wakaŵachitira makora ŵazamba ŵara ndipo ŵaIsraele ŵakandana na kuŵa ŵanandi chomene na ŵankhongono.

²¹Ndipo chifukwa chakuti ŵazamba ŵara ŵakopa Chiuta, iyo ŵakaŵapa zimbumba.

²²Penepapo Faro wakapereka languro ili ku ŵanthu ŵakhe: Mwana mwanarume yose uyo wababika ku mwanakazi muHebere waponyeke mu mronga wa Nayelo, kweni mwana yose uyo ndi mwanakazi, mumureke waŵe wa moyo.