Read new_tumbuka_bible Kufuma 10 Bible Online

Kufuma 10 - new_tumbuka_bible bible

Kufuma 10

¹Ntheura FUMU yikati kwa Mozesi, “Ruta kwa Faro pakuti ndanonofya mtima wakhe na mitima ya ŵateŵeti ŵakhe mwakuti ndirongore vimanyikwiro vyane ivi pakati pawo.

²Ndipo iwe uŵaphalire ŵana ŵako, na ŵazukuru ŵako kuti ŵapulike umo ndaŵazerezeskera ŵaEguputo na chimanyikwiro icho ndachita pakati pawo. Mwa ntheura muti mumanye kuti ine ndine FUMU.”

³Ndipo Mozesi na Aroni ŵakaruta kwa Faro ndipo ŵakati kwa iyo, “FUMU, Chiuta wa ŵaHebere wakuti, ‘Kasi mpaka pauli uchali kukana kujiyuyura panthazi pane? Zomerezga kuti ŵanthu ŵane ŵarute kuya kandilambira.

⁴Pakuti usange ukukana kuzomera kuti ŵanthu ŵane ŵarute, na machero, nditi nditume zombe mu charu chako.

⁵Ndipo wizamkubenekerera charu chose mwakuti paŵavye munthu wakuwona charu. Wizamukurya chose icho chikapona ku matalala, na makuni agho ghakumera ku munda winu.

⁶Wizamkuzura na mu nyumba zako wuwo, na mu zinyumba za ŵateŵeti ŵako ndiposo na mu zinyumba za ŵaEguputo wose. Zombe uyu ŵawuso na ŵasekuru ŵako kuti ŵakamuwonapo na kale chara kufuma apo ŵakababiwira mu charu mpaka sono. Penepapo Mozesi wakawerako kwa Faro.’ ”

⁷Ndipo ŵateŵeti ŵa Faro ŵakati kwa iyo, “Kasi munthu uyu wati waŵe chipingo kwa ise mpaka pauli? Zomerezgani kuti ŵanthu aŵa ŵarutenge mwakuti ŵakalambire FUMU, Chiuta wawo. Kasi muchali mundamanyiske kuti charu cha Eguputo chaparanyika?”

⁸Ntheura Mozesi na Aroni ŵakachemekaso kwa Faro ndipo wakati kwa iwo, “Rutani kayilambirani FUMU, Chiuta winu kweni kasi mbanjani awo ŵarutenge?”

⁹Mozesi wakati, “Titi tirute tose ŵarara withu pamoza na ŵana ŵithu. Tirutenge na ŵana ŵanarume na ŵana ŵanakazi, mberere na mbuzi zithu na ng'ombe zithu, pakuti tikwenera kuŵa na chiphikiro kwa FUMU.”

¹⁰Ndipo Faro wakati, “Panyakhe FUMU yiŵenge namwe usange ine nditi ndimuzomerezgani kuti murute na ŵawoli ŵinu na ŵana ŵinu. Chenjerani! Muli na dazgo liheni mu mitima yinu.

¹¹Chara! Ŵanarume pera ndiwo ŵarute kuya kayilambira FUMU. Pakuti cheneichi ndicho mukukhumba.” Ntheura Mozesi na Aroni ŵakachimbizgika panthazi pa Faro.

¹²Penepapo FUMU yikati kwa Mozesi, “Nyoroskera woko lako pa charu cha Eguputo mwakuti zombe wazure mu charu cha Eguputo ndipo ŵarye chakupandika chose icho chikapona ku matalala.”

¹³Ntheura Mozesi wakanyoroska ndodo yakhe pa charu cha Eguputo ndipo FUMU yikatuma mphepo ya ku mafumiro gha dazi yeneiyo yikaputira pa charu zuŵa lose na usiku wose ura. Ndipo kukati kwacha, mphepo yira ya ku mafumiro gha dazi yikiza na zombe.

¹⁴Ndipo zombe yura wakakwerera pa charu chose cha Eguputo na kukhara pa charu chose mu unandi. Zombe munandi ntheura kuti wakaŵako na kale chara, nanga mphamanyuma pa uyu kuti waŵengekoso chara.

¹⁵Wakabenekerera charu chose mwakuti chikaŵa waka bii na zombe. Wakarya vyakumera vyose ku mu charu na vipambi vya makuni ivyo matalala ghakasidako. Kuti kukakharako kanthu kakubiriŵira chara nanga ndi makuni panji chakumera chose cha mu thondo, mu charu chose cha Eguputo.

¹⁶Penepapo Faro kwambula kuchedwa wakachema Mozesi na Aroni ndipo wakati kwa iwo, “Ndanangira FUMU, Chiuta winu na imwe wuwo.

¹⁷Ntheura sono, ndaŵeya, mundigowokere kwananga kwane pa nyengo iyi pera. Mundiŵeyereso kwa FUMU, Chiuta winu kuti wawuskeko chilengo cha nyifwa ichi kwa ine.”

¹⁸Sono Mozesi wakafumako kwa Faro na kuya kaŵeyerera kwa FUMU.

¹⁹FUMU yikazgora mphepo ya ku manjiliro gha dazi kuŵa mphepo ya nkhongono iyo yikakukura zombe ndipo yikamuyeghera ku Nyanja ya Matete. Pakaŵavye zombe nanga njumoza mu charu chose cha Eguputo uyo wakakharako.

²⁰Kweni FUMU yikanonofya mtima wa Faro ndipo kuti wakaŵazomerezga ŵaIsraele kuti ŵarute chara.

²¹Penepapo FUMU yikati kwa Mozesi, “Nyoroskera woko la lako kuchanya mwakuti kuŵe mdima mu charu chose cha Eguputo, mdima wakhe wa munkhorwe.”

²²Ntheura Mozesi wakanyoroskera woko lakhe kuchanya, ndipo mdima wa munkhorwe ukaŵa mu charu chose cha Eguputo pa mazuŵa ghatatu.

²³Ŵanthu kuti ŵakawonana chara nanga nkhuwukapo apo ŵakaŵa kwa mazuŵa ghatatu. Kweni ŵaIsraele wose ŵakaŵa na ungweru mu malo umo wakakharanga.

²⁴Penepapo Faro wakachema Mozesi na Aroni ndipo wakati kwa iwo, “Rutani, kayilambirani FUMU, ŵawoli ŵinu na ŵana ŵinu nawo ŵarute pamoza namwe. Kweni mberere na mbuzi na ng'ombe zinu ndivyo vikhare.”

²⁵Kweni Mozesi wakati, “Mukwenera kutipa vyakuŵeta mwakuti tikapereke sembe zakukoma na sembe zakocha mburuma kwa FUMU, Chiuta withu.

²⁶Vyakuŵeta vyithu navyo vikwenera kuruta pamoza nase. Kureke kukharako nanga nchinyama chimoza, pakuti mwa ivyo tikwenera kuya katorapo mwakuti timunozgere sembe FUMU, Chiuta withu. Ise kuti tingamanya chara icho tingapereka nga ndi sembe kwa FUMU, tisuke tikafike kwenekura.”

²⁷Kweni FUMU yikanonofya mtima wa Faro, ndipo wakakhumba chara kuti ŵarute.

²⁸Penepapo Faro wakati kwa Mozesi, “Fumako kwa ine. Ndipo uchenjere, ndingakuwonangaso chara, chifukwa pa zuŵa apo ndikuwonerenge, uti ufwenge.”

²⁹Mozesi wakati kwa iyo, “Nga ndi umo mwayowoyera kuti nditi ndiwonengeso kwa imwe chara.”