Read new_tumbuka_bible Kufuma 12 Bible Online

Kufuma 12 - new_tumbuka_bible bible

Kufuma 12

¹FUMU yikati kwa Mozesi na Aroni mu charu cha Eguputo,

²“Mwezi uno uti uŵenge mwezi wakudanga. Ndiposo uti uŵenge mwezi wakudanga kwa chirimika kwa imwe.

³Yowoyani ku mpingo wose wa ŵaIsraele kuti: Pa zuŵa la khumi la mwezi uno, munthu waliyose wajitorere mwana-mberere kwakuyana na nyumba za ŵawiskewo, nyumba na nyumba mwana-mberere.

⁴Usange ŵa mu mbumba yimoza mbachoko kuti ŵarye mwana-mberere, panji zinyani, ŵakwenera kusangana na ŵazengezgani ŵawo mwana-mberere yura pakupenda chigaŵa chimoza icho munthu yumoza wangarya.

⁵Mwana-mberere uyo muti mujitorere wakwenerera kuŵa mwanarume wa chirimika chimoza, wambula kalema wakufuma ku mberere panji mbuzi.

⁶Mwana-mberere uyo mumusunge mpaka pa zuŵa la 14 la mwezi weneuwo. Ndipo mpingo wose na Israele wizakakome ŵana-mberere ŵawo na mise.

⁷Penepapo ŵizakatorepo ndopa zinyakhe na kuphaka mu mphepete mwa muryango uku na uku ndiposo na pa mphanjizgo ya pa muryango wa nyumba iyo ŵakuryeramo.

⁸Usiku wenewura, ŵizakarye nyama yakocha pamoza na chingwa chambula chirungo ndiposo na mphangwe yakuŵaŵa.

⁹Mungaryanga yiŵisi panji yakuphika kweni yakocha pa moto. Mutu yakhe, malundi ghakhe na vya mukati vyakhe navyo muwoche pa moto.

¹⁰Mungarekangapo na yimoza kufika na mulenje. Usange mwarekapo kufika na mulenje mukwenera kocha pa moto.

¹¹Ndipo mukaryenge ntheura, mukaryenge luŵiroluŵiro uku mwajiphinya mumaluwunda ghinu, mwavwara viryato ku malundi ghinu, ndiposo mwakorera ndodo zinu ku mawoko ghinu. Ichi nchiphikiro cha FUMU.

¹²“Pakuti ndizamkudumula mu charu cha Eguputo mu usiku wenewura, na kukoma ŵana wose ŵa uŵere mu Eguputo kwamba ŵana ŵa ŵanthu mpaka ŵana ŵa vyakuŵeta. Nditi ndilange ŵachiuta wose ŵa Eguputo. Ine ndine FUMU.

¹³Ndopa izo zamkuŵa chimanyikwiro kwa imwe pa nyumba izo mwamkukharamo. Para nkhuwona ndopa ndizamkumujumphani. Ndipo chilengo ichi chakukoma kuti chamkumukhwaskani chara para nkhutimba ŵaEguputo.

¹⁴Zuŵa ili lamkuŵa chikumbusko kwa imwe ndipo mwamkulisunga nga ndi zuŵa la chiphikiro cha FUMU. Mu miwiro yinu yose mulisungenge nga ndi dango kwa muyirayira.”

¹⁵“Mu mazuŵa ghankhonde na ghaŵiri mukaryenge chingwa chambula chirungo. Pa zuŵa lakudanga mukawuskengemo chirungo mu nyumba zinu. Pakuti yose uyo wati warye chilichose icho chili na chirungo kufuma pa zuŵa la kwamba mpaka pa zuŵa la chinkhonde na chiŵiri, wizamkuwuskikamo mu ŵaIsraele.

¹⁶Pa zuŵa lakudanga mukaŵenge na ungano wakupatulika ndiposo na zuŵa la chinkhonde na chiŵiri. Mlimo ureke kuchitika pa mazuŵa agha, kweni mlimo wa chakurya pera ndiwo uchitike.

¹⁷Ndipo mukwenera kusunga chiphikiro ichi cha chingwa chambula chirungo, chifukwa pa zuŵa leneliri ndipo nkhafumyira mawumba ghinu mu charu cha Eguputo. Ntheura mukwenera kulisunga zuŵa ili mu miwiro ghinu ghose nga ndi dango kwa muyirayira.

¹⁸Mu mwezi wakudanga, pa zuŵa la 14 la mwezi, pa nyengo ya mise, mukaryenge chingwa chambula chirungo mpaka pa zuŵa la 21 na mise la mwezi weneuwo.

¹⁹Pa mazuŵa ghankhonde na ghaŵiri mureke kusangika chirungo mu nyumba zinu. Pakuti yose uyo wati warye chilichose icho chili na chingwa wamkuwuskikako mu mpingo wa ŵaIsraele manyi ndi mulendo panji mwenecharu.

²⁰Mungaryanga kanthu kachirungo chara. Kose uko mukukhara, mukaryenge chingwa chambula chirungo.”

²¹Ntheura Mozesi wakachema ŵarara wose ŵaIsraele na kuti kwa iwo, “Rutani mukajisankhire ŵana-mberere panji mazinyani kwakuyana na mbumba zinu ndipo mukome kuti waŵe wa chiphikiro cha Paska.

²²Mutore khunje la hisopo na kulibizga mu ndopa izo zili mu beseni ndipo muphake pa mphanjizgo ya pa muryango ndiposo na mu mphepete mwa muryango uku na uku. Paŵavye munthu wafumire kuwaro kwa nyumba yakhe kufikira na mulenje.

²³Pakuti FUMU yizamkwendamo na kukoma ŵaEguputo. Para yizamkuwona ndopa izo zili pa mphanjizgo ya pa muryango ndiposo na mu mphepete mwa muryango uku na uku yizamkujumphilira muryango ura. FUMU yizamkumuzomerezga chara mungelo wakhe wakukoma kunjira mu nyumba zinu na kumukomani.

²⁴Sungilirani kaluso aka nga ndi dango kwa imwe na kwa ŵana ŵinu kwa muyirayira.

²⁵Para mwamkunjira mu charu icho FUMU yili kupangana kumupani mukasungenge kaluso aka.

²⁶Ndipo para ŵana ŵinu ŵamkumufumba kuti, ‘Kasi kaluso aka kakung'anamula vichi?’

²⁷Imwe mukati, ‘Ndi sembe ya Paska la FUMU, pakuti yikathaska nyumba za ŵaIsraele mu Eguputo apo yikakomanga ŵaEguputo, kweni yikajumphilira waka pa nyumba zithu.’ ” Penepapo ŵaIsraele wakasindama na kumulambira.

²⁸Ntheura ŵaIsraele ŵakaruta na kuya kachita nga ndi umo FUMU yikalangulira Mozesi na Aroni.

²⁹Na usiku pakati FUMU yikakoma ŵana wose ŵa uŵere mu charu cha Eguputo kwamba mwana wa uŵere ŵa Faro, uyo wati wakharenge pa chizumbe chakhe, mpaka mwana wa uŵere wa ŵaumikori uyo wakaŵa mu gadi la mdima. Ŵana wose ŵa uŵere ŵa vyakuŵeta nawo ŵati ŵafwe.

³⁰Faro, ŵateŵeti ŵakhe wose, na ŵaEguputo wose ŵakawuka na usiku pakati ndipo kukaŵa chitengero chikuru mu Eguputo chifukwa mukaŵavye nyumba nanga njimoza umo mukaŵavye ŵakufwa.

³¹Usiku wenewura, Faro wakachema Mozesi na Aroni na kuti kwa iwo, “Wukani, fumanimo mu ŵanthu ŵane, mose imwe na ŵaIsraele murutenge kuya kalambira FUMU nga ndi umo mwanguyowoyera.

³²Torani mberere na mbuzi zinu na ng'ombe zinu nga ndi umo mwayowoyera, murutenge. Ndipo munditumbike na ine wuwo.”

³³ŴaEguputo ŵakachichizga ŵaIsraele kuti ŵafumemo mu charu mwa luŵiroluŵiro pakuti wakati, “Mzire tose tifwe waka.”

³⁴Ntheura ŵaIsraele ŵakatora nthimphwa yawo yambula kusazgako chirungo, mbale zawo zakukonkheramo, na kuvungirizga mu salu ndipo wayegha pa viŵegha vyawo.

³⁵ŴaIsraele ŵakachita kwakuyana na mazgu gha Mozesi ndipo ŵakaromba ku ŵaEguputo vitowelo vya siliva na vya golide na vyakuvwara.

³⁶Ndipo FUMU yikachitiska kuti ŵaEguputo ŵakondwe nawo ŵaIsraele. Ndipo ŵakaŵapa ivyo ŵakaviromba. Ntheura ndimo ŵaIsraele ŵakaŵaphangira ŵaEguputo vyuma vyawo.

³⁷ŴaIsraele ŵakwenda pasi, ŵanarume pera kwambula kusazgirako ŵanakazi na ŵana ŵakukwana 600,000 ŵakawuka ulendo wawo kufumamo mu Ramesesi kuya ku Sukoti.

³⁸Mpingo ukuru wa ŵanthu ŵa mitundu yinyakhe nawo ukaruta pamoza na ŵaIsraele ndiposo na vyakuŵeta vinandi chomene, mberere na mbuzi na ng'ombe.

³⁹Ŵakaphika vingwa vipapati vyambula chirungo vya nthimphwa iyo ŵakafuma nayo mu Eguputo. Iwo ŵakawura kuŵikamo chirungo chifukwa ŵakachimbizgika kufuma mu Eguputo, ndipo wakatondeka kuziwurika nanga nkhunozgera mpako wa pa nthowa.

⁴⁰Nyengo iyo ŵaIsraele ŵakakhalira mu Eguputo yikaŵa virimika 430.

⁴¹Ndipo pa umaliro wa virimika 430, pa zuŵa lenelira, mafuko ghose gha FUMU ghakafumamo mu charu cha Eguputo.

⁴²Ukaŵa usiku uwo FUMU yikachezera kufumya ŵaIsraele mu charu cha Eguputo. Ntheura ndiwo usiku weneuwo ŵaIsraele wose wakuchezerera pakuyilindizga FUMU miwiro na miwiro.

⁴³FUMU yikati kwa Mozesi na kwa Aroni, “Marango gha Paska ndi agha: Mulendo wareke kuryako,

⁴⁴kweni muzga waliyose uyo wali kugulika na ndarama wangaryangako para iyo wakotoreka.

⁴⁵Munthu uyo ngwa kupanjwa na muteŵeti waganyu ŵangaryako.

⁴⁶Yikwenera kuryekera mu nyumba yimoza. Mureke kufumyira kuwaro nyama yinyakhe, ndipo mureke kuphyora viwangwa vyakhe.

⁴⁷Fuko lose la Israele likwenera kusunga ichi.

⁴⁸Usange mulendo uyo wakukhara namwe wakukhumba kuchitira FUMU chiphikiro cha Paska, ŵanarume wose ŵa mu nyumba yakhe ŵakwenera kukotoreka. Penepapo ndipo wasendererenge na kuchita chiphikiro cha Paska, ndipo ŵati ŵaŵenge nga ndi ŵenecharu. Kweni munthu wambula kukotoreka, wareke kuryako.

⁴⁹Kuŵenge dango limoza pera pa mwenecharu na mulendo uyo wakupanjwa namwe.”

⁵⁰ŴaIsraele wose ŵakachita nga ndi umo FUMU yikalangulira Mozesi na Aroni.

⁵¹Mu zuŵa lenelira FUMU yikaŵafumiska ŵaIsraele mu charu cha Eguputo mu viwuru vyawo.