Read new_tumbuka_bible Kufuma 17 Bible Online

Kufuma 17 - new_tumbuka_bible bible

Kufuma 17

¹Mpingo wose wa ŵaIsraele ukafumako ku mapopa gha Sini, kwenda kayima apa na apa nga ndi umo FUMU yikalangulira. Ndipo ŵakiza kazenga misasa pa malo gha Refidimu, kweni pakaŵavye maji kuti ŵanthu ŵamwe.

²Ntheura ŵanthu ŵakambana nayo Mozesi ndipo ŵakati, “Tipe maji timwe.” Mozesi wakati kwa iwo, “Kasi mukwambana na ine chifukwa uli? Nchifukwa uli mukuyezga FUMU?”

³Kweni ŵanthu ŵakaŵa na nyota ya maji ndipo ŵakasinginikira Mozesi ŵakati, “Nchifukwa uli ukatifumiskamo mu Eguputo, kuti utikome na nyota pamoza na ŵana ŵithu ndiposo na vyakuŵeta vyithu?”

⁴Ndipo Mozesi wakaromba kwa FUMU wakati, “Kasi ndichitengechi na ŵanthu aŵa. Ŵanozgeka kale kundidina na mawe.”

⁵Ndipo FUMU yikati kwa Mozesi, “Udangire panthazi pa ŵanthu, utorepo ŵarara ŵanji ŵa ŵaIsraele. Utoreso ndodo yako yeneiyo ukatimbira mronga wa Nayelo, na kuruta.

⁶Ine ndamkwimilira panthazi pako kwenekura pa jarawe pa Phiri la Sinayi. Ukatimbe jarawe ndipo maji ghamkufuma mwenemura kuti ŵanthu ŵamwe.” Ndipo Mozesi wakachita ntheura panthazi pa ŵarara ŵa ŵaIsraele.

⁷Mozesi wakaghathya malo ghara zina lakuti, “Masa[4] na Meriba,[5]” chifukwa ŵaIsraele ŵakayezga FUMU na kwambana na Mozesi pakufumba kuti, “Kasi FUMU yilimo mukati mwithu panji chara?”

⁸Penepapo ŵaAmaleki ŵakiza ndipo ŵakarwa nkhondo na ŵaIsraele pa Refidimu.

⁹Mozesi wakati kwa Yoshuwa, “Tisankhire ŵanarume ŵanji kuti ŵarute kuya karwa nkhondo na ŵaAmaleki. Na machero, ine ndamkwimilira pachanya pa phiri na ndodo ya Chiuta mu woko lane.”

¹⁰Ntheura Yoshuwa wakarwa nkhondo na ŵaAmaleki nga ndi umo Mozesi wakalangulira apo iyo Mozesi, Aroni na Huru wakakwera pachanya pa phiri.

¹¹Para Mozesi wakakwezganga mawoko ghakhe, ŵaIsraele wakaruskanga, kweni para wakakhizganga mawoko ghakhe, ŵaAmaleki ŵakaruskanga.

¹²Kweni Mozesi wakavuka. Ntheura ŵakatora libwe na kuliŵika pasi kuti ŵakharepo. Aroni na Huru ŵakakorera mawoko ghakhe muchanya, munyakhe ku lwegha lumoza na munyakhe ku lwegha lunyakhe mwakuti mawoko ghakhe ghakhozgeke mpaka dazi likanjira.

¹³Ntheura Yoshuwa wakatonda ŵaAmaleki na lupanga.

¹⁴FUMU yikati kwa Mozesi, “Lemba ichi mu buku kuti chiŵe chikumbusko ndipo umuphalire Yoshuwa mwakuti wapulike kuti nditi ndiŵasisitirethu ŵaAmaleki kuti ŵareke kukumbukika mu charu.”

¹⁵Mozesi wakazenga jochero na kulithya zina lakuti, “FUMU ndiyo ndembera yane.”

¹⁶Iyo wakati, “Kwezgani ndembera ya FUMU. Miwiro na miwiro FUMU yiti yirwe nkhondo na ŵaAmaleki.”