Read new_tumbuka_bible Kufuma 18 Bible Online

Kufuma 18 - new_tumbuka_bible bible

Kufuma 18

¹Yeturo, musofi wa charu cha Midiyani, wiskevyara wa Mozesi, wakapulika vyose ivyo Chiuta wakachitira Mozesi na ŵanthu ŵakhe ŵaIsraele, na umo FUMU yikaŵafumiskira mu Eguputo.

²Mozesi wakamuwezga muwoli wakhe Zipora ndipo Yeturo, wiskevyara wakhe wakamupokerera,

³pamoza na ŵana ŵakhe ŵaŵiri. Zina la mwana munyakhe wakaŵa Gerishomu[6] pakuti wakati, “Ndaŵa wakupanjwa mu charu cha chilendo.”

⁴Ndipo zina la mwana munyakhe likaŵa Eliyezere pakuti wakati, “Chiuta wa ŵadada ndiyo wakaŵa movwiri wane, ndipo wakandithaska ku lupanga lwa Faro.”

⁵Yeturo, wiskevyara wa Mozesi, pamoza na ŵana ŵa Mozesi na muwoli wakhe, ŵakiza kwa Mozesi mu mapopa uko wakazenga msasa pafupi na phiri la Chiuta.

⁶Yeturo wakatuma mazgu kwa Mozesi kuti, “Ine Yeturo, wiskevyara wako nkhwiza kwa iwe na muwoli wako pamoza na ŵana ŵako ŵaŵiri.”

⁷Mozesi wakafumira kuwaro kuya kukakumana na wiskevyara wakhe ndipo wakajikama panthazi pakhe na kumuvumbatira. Ŵakati ŵafumbana ukhaliro wawo ŵakanjira mu hema.

⁸Penepapo Mozesi wakamwandulira wiskevyara vyose ivyo FUMU yikachitira Faro na ŵaEguputo pa chifukwa cha ŵaIsraele, maunonono ghose agho wakakumana nayo pa ulendo wawo, ndiposo na umo FUMU yikamuthaskira.

⁹Yeturo wakakondwa pakupulika viweme vyose ivyo FUMU yikaŵachitira ŵaIsraele pakuŵathaska mu nkhongono ya ŵaEguputo.

¹⁰Ndipo Yeturo wakati, “Yirumbike FUMU, yeneiyo yamuthaskani ku nkhongono ya ŵaEguputo na Faro.

¹¹Sono ndamanya kuti FUMU njikuru kuruska ŵachiuta ŵanyakhe wose pakuti yikaŵathaska ŵanthu ŵakhe kufuma mu nkhongono ya ŵaEguputo awo ŵakaŵachitiranga nkhaza.”

¹²Ndipo Yeturo, wiskevyara wa Mozesi wakapereka sembe yakocha na sembe zakukoma kwa Chiuta. Ntheura Aroni wakiza pamoza na ŵarara wose ŵaIsraele kwiza karya chakurya pamoza na wiskevyara wa Mozesi panthazi pa Chiuta.

¹³Na machero ghakhe, Mozesi wakakhara pa chitengo kuti weruzgenge mirandu ya ŵanthu, ndipo ŵanthu ŵakimilira kuzingizga iyo kufuma na mulenje mpaka na mise.

¹⁴Para Yeturo, wiskevyara wa Mozesi wakawona vyose ivyo wakachitiranga ŵanthu wakati, “Kasi ichi nchinthu uli icho ukuŵachitira ŵanthu? Kasi nchifukwa uli ukweruzga wekha uku ŵanthu wose ŵakwimilira kukuzingirizga kwamba na mulenje mpaka na mise?”

¹⁵Mozesi wakamuzgora wiskevyara wakati, “Nchifukwa chakuti ŵanthu ŵakwiza kwa ine kwiza kafumbilira vya Chiuta.

¹⁶Usange ŵanangirana, ŵakwiza kwa ine, ndipo ine nkhweruzga pakati pa yumoza na munyakhe, na kuŵamanyiska vilayizgo vya Chiuta na marango ghakhe.”

¹⁷Penepapo Yeturo wakazgora wakati, “Icho ukuchita kuti nchiweme chara.

¹⁸Iwe na ŵanthu awo ŵakwiza kwa iwe muti muvuke waka, pakuti chinthu ichi nchizitu kwa iwe, kuti ungamanya chara kuchichita wekha.

¹⁹Sono pulika mazgu ghane, ndipo nditi ndikupe urongozgi wane. Chiuta waŵe nawe. Iwe uŵenge wakwimilira ŵanthu panthazi pa Chiuta ndipo ŵizenge na mirandu yawo kwa iyo.

²⁰Uŵasambizge vilayizgo na marango. Uŵarongore nthowa iyo ŵakwenera kwendamo na icho ŵakwenera kuchita.

²¹Kweniso usore ŵanthu ŵamahara kufuma mu ŵanthu wose, ŵeneawo ŵakopa Chiuta, awo mbakugomezgeka ndipo ŵakutinkha vimbundi. Ŵanthu ŵa ntheura ndiwo uŵimike kuŵa ŵarongozgi pa ŵanthu 1,000, pa ŵanthu 100, pa ŵanthu 50, ndipo na pa ŵanthu khumi.

²²Ŵeneaŵa ndiwo ŵeruzgenge mirandu ya ŵanthu nyengo zose. Mrandu ukuru ndiwo ŵizenge nawo kwa iwe, kweni mirandu yichoko ŵeruzge ndiwo. Ntheura chiti chikuŵire chipusu kwa iwe ndipo ŵati ŵayeghenge uzitu uwu pamoza nawe.

²³Usange ukuchita ichi nga ndi umo Chiuta wakukulangulira, kuti uti uvukenge chara ndipo ŵanthu wose aŵa ŵati ŵarutenge ku malo ghawo, mirandu yawo yeruzgika mu mutende.”

²⁴Mozesi wakapulikira urongozgi wa wiskevyara ndipo wakachita nga ndi umo wakayowoyera.

²⁵Wakasorapo ŵanarume ŵamahara kufuma ku ŵaIsraele wose ndipo ŵakaŵimika kuŵa ŵarongozgi pa ŵanthu 1,000, pa ŵanthu 100, pa ŵanthu 50 na pa ŵanthu khumi.

²⁶Aŵa ndiwo ŵakeruzganga mirandu ya ŵanthu nyengo zose. Mirandu yikuru ŵakizanga nayo kwa Mozesi, kweni mirandu yose yichoko ŵakeruzganga ndiwo.

²⁷Pamanyuma pa ivi Yeturo wakalayirana nayo Mozesi, ndipo wakawerera ku kwawo.