Read new_tumbuka_bible Kufuma 19 Bible Online

Kufuma 19 - new_tumbuka_bible bible

Kufuma 19

¹Pa zuŵa lakudanga la mwezi wa chitatu, ŵaIsraele ŵakati ŵafuma mu charu cha Eguputo, pa zuŵa leneilo ŵakiza mu mapopa gha Sinayi.

²Ŵakenda kufuma ku Refidimu na kwiza mu mapopa gha Sinayi, ndipo ŵakazenga misasa yawo kwenekura pafupi na Phiri la Sinayi.

³Penepapo Mozesi wakakwera phiri kuya kakumana na Chiuta. Ndipo FUMU yikamuchema kufuma pa phiri yikati, “Ntheura ndimo ukwenera kuyowoyera ku ŵaIsraele, mbumba ya Yakhobe:

⁴Imwe mwekha muli kuwona icho nkhachita ku ŵaEguputo na umo nkhamuyegherani pa mapapindo nga ndi nombo na kwiza namwe kwa ine ndamwene.

⁵Ntheura sono, usange mundipulikirenge ine na kusunga phangano lane, muti muŵenge ŵanthu ŵane mukati mu ŵamitundu wose. Nangauli charu chose nchane,

⁶ndipo kwa ine imwe muti muŵenge ufumu wa ŵasofi na fuko lakupatulika. Agha ndi mazgu agho ukwenera kuyowoya ku ŵaIsraele.”

⁷Ntheura Mozesi wakawerako ndipo wakachema ŵarara ŵa ŵanthu na kuŵaphalira mazgu ghose agho FUMU yikamulayizga.

⁸Ndipo ŵanthu wose wakazgora pamoza ŵakati, “Vyose ivyo FUMU yayowoya titi tichitenge.” Penepapo Mozesi wakaya kaphara zgoro la ŵanthu kwa FUMU.

⁹FUMU yikati kwa Mozesi, “Ine nditi ndizeso kwa imwe mu bingu lakuti waka bii mwakuti ŵanthu ŵapulike na kukugomezga para nkhuyowoya nawe kwa muyirayira.” Penepapo Mozesi wakaphara mazgu gha ŵanthu kwa FUMU.

¹⁰Ndipo FUMU yikati kwa Mozesi, “Ruta ku ŵanthu ndipo uŵapatule muhanya uno na na machero. Ŵachape vyakuvwara vyawo,

¹¹kuti ŵaŵe ŵakunozgeka pa zuŵa la chitatu, pakuti pa zuŵa ilo, ine FUMU namukhira pa Phiri la Sinayi kuti ŵanthu wose ŵandiwone.

¹²Ndipo ukaŵaŵikire mphaka kuzingirizga phiri na kuti kwa iwo, ‘Chenjerani, mureke kukwera phiri nesi kukhwaska umo likuperera. Yose uyo wamkukhwaska phiri wamkukomeka nadi.

¹³Ŵangamukhwaskanga chara kweni ŵakamudine na mawe panji ŵakamulase na mivwi. Pakaŵavye chakuŵa na umoyo manyi ndi chakuŵeta panji munthu, chose chikakomeke. Para mbata yamkulira chomene kwa nyengo yitali, ndipo ŵakakwerenge phiri.’ ”

¹⁴Ntheura Mozesi wakakhira kufuma ku phiri na kuruta ku ŵanthu, wakaŵapatula ŵanthu ŵara ndipo iwo ŵakachapa vyakuvwara vyawo.

¹⁵Penepapo wakati ku ŵanthu, “Nozgekerani zuŵa la chitatu ndipo mungagonananga na mwanakazi chara.”

¹⁶Na mulenje pa zuŵa la chitatu kukaŵa vikhayokhayo na ŵaleza, na chibingu chakuti waka bii pa phiri ndipo na kulira kukuru kwa mbata. Penepapo ŵanthu wose awo ŵakaŵa pa misasa ŵakatenthema.

¹⁷Mozesi wakarongozgera ŵanthu kufuma mu misasa kuti ŵakakumane na FUMU, ndipo wose ŵakiza kimilira musi mu phiri.

¹⁸Ndipo Phiri lose la Sinayi likabenekerereka na josi pakuti FUMU yikakhilira pa ilo mu moto. Josi likakwera kuchanya nga ndi ilo likufuma mu ng'anjo. Ndipo phiri lose lukasunkhunyika chomene.

¹⁹Ndipo apo mazgu gha mbata ghakakulirangakuliranga kulira, Mozesi wakayowoyanga, ndipo Chiuta wakamuzgoranga mu vikhayokhayo.

²⁰FUMU yikakhilira pachanya pa Phiri la Sinayi, ndipo yikamuchema Mozesi kuti wakwere pachanya pa phiri. Penepapo Mozesi wakwera.

²¹Ndipo FUMU yikati kwa iyo, “Khira ndipo ukaŵachenjezge ŵanthu mzire ŵajumphe mphaka kuti ŵize kwa ine kwiza kandiwona ndipo ŵanandi ŵafwe.

²²Ŵasofi nawoso awo ŵakusenderera kufupi na FUMU, wajipatule mzire FUMU yiŵavundumukire.”

²³Ndipo Mozesi wakati kwa FUMU, “Ŵanthu kuti ŵangakwerera ku Phiri la Sinayi chara, pakuti imwe mwekha ndimwe mukatichenjezga kuti, ‘Ŵikani mphaka kuzingirizga phiri ndipo mulizgore kuŵa lakupatulika.’ ”

²⁴FUMU yikati kwa Mozesi, “Khira kuti ukamutore Aroni na kwizaso kwa ine. Kweni ŵasofi na ŵanthu ŵangajumphanga mphaka chara nanga nkhukwerera kwa ine mzire ndiŵavundumukire.”

²⁵Ntheura Mozesi wakakhira ku phiri ndipo wakaŵaphalira ŵanthu.