Read new_tumbuka_bible Kufuma 21 Bible Online

Kufuma 21 - new_tumbuka_bible bible

Kufuma 21

¹FUMU yikati kwa Mozesi, “Sono agha ndi maweruzgo agho uti uŵaphalire ŵaIsraele kuti ŵaghasunge:

²Usange wagula muzga uyo ndi muHebere, wakuteŵetere virimika vinkhonde na chimoza, kweni mu chirimika cha chinkhonde na chiŵiri iyo wamkuŵa mwanangwa ndipo wamkuruta kwambula chakuwombolera.

³Usange wakwiza yekha, pakuwera warute yekha. Kweni para wakwiza na muwoli wakhe, pakuwera warute nayo pamoza.

⁴Usange sekuru wakhe wakumupa mwanakazi kuŵa muwoli wakhe ndipo wakumubabira ŵana ŵanarume panji ŵanakazi, mwanakazi na ŵana ŵakhe ŵamkuŵa ŵa sekuru wakhe, kweni mwanarume yekha ndiyo warutenge.

⁵Kweni usange muzga yura wakuyowoya pakweru kuti, ‘Ine nkhumutemwa sekuru wane, muwoli wane, na ŵana ŵane, ntheura nkhukhumba kuŵa mwanangwa chara.’

⁶Penepapo sekuru wakhe wamutolere ku ŵeruzgi ŵa malo ghakusoperapo Chiuta. Ndipo kwenekura wize nayo pa muryango panji pa mphanjizgo ya muryango ndipo wamudolore khutu lakhe na chakudolorera. Ntheura wati waŵe muteŵeti wakhe pa umoyo wakhe wose.”

⁷“Usange munthu wakuguliska mwana wakhe mwanakazi kuti waŵe muzga, iyo wareke kuwera nga ndi umo ŵakuwerera ŵazga ŵanarume.

⁸Usange wakureka kumukondweska sekuru wakhe mweneuyo wakamugula kuti waŵe muwoli wakhe, sekuru wakhe wazomerezge kuti wawomboleke. Mazaza walije kuti wamuguliske ku ŵalendo, pakuti wamuchitira icho nchambula kwenerera.

⁹Usange wakumugula kuti waŵe muwoli wa mwana wakhe mwanarume, wamupime nga ndi mwana wakhe mwanakazi.

¹⁰Usange wakutora mwanakazi munyakhe, wareke kuchepeska vyakurya panji vyakuvwara ku mwanakazi wakudanga nanga nkhureka kunjiramo mwa iyo.

¹¹Usange wakureka kumuchitira vinthu ivi vitatu, mwanakazi uyo wamusuzule kuti waŵe mwanangwa, kweni kwambula kulipirapo ndarama.”

¹²“Munthu yose uyo wakutimba munyakhe mpaka kufwa, nayo wakomeke.

¹³Kweni usange vyachitika mwa ngozi ndipo Chiuta wazomerezga kuti viŵe ntheura, wachimbilire ku malo agho nditi ndimwimikirani.

¹⁴Kweni usange munthu wakumuwukira waka munyakhe na kumukoma mwa uryarya, nayo wakwenera kukomeka nangauli wangachimbilira ku jochero lane.

¹⁵“Yose uyo wakutimba ŵawiske panji ŵanyina, wakwenera kukomeka.

¹⁶“Yose uyo wakwiba munthu, manyi wamuguliske panji wasangika kuti wachali nayo, wakwenera kukomeka.

¹⁷“Yose uyo wakutemba ŵawiske panji ŵanyina, wakwenera kukomeka.

¹⁸“Para ŵanarume ŵambana ndipo yumoza wamutimba munyakhe na libwe panji na nkhonyo, ndipo munthu uyo wandafwe, kweni warwara na kugona pa chitara,

¹⁹ndipo munthu uyo wakatimbika wakuwuka na kugontha pakwenda kuwaro na ndodo, uyo wakamutimba wareke kuŵa na mrandu. Kweni wamulipe chifukwa cha nyengo yakhe iyo wamutayiska ndipo wamupwererere wasuke wachilirethu.

²⁰“Para munthu wakutimba muzga wakhe mwanarume panji mwanakazi na ndodo, ndipo muteŵeti uyo wafwa penepapo, munthu uyo wamutimba walangike.

²¹Kweni wakwenera kulangika chara usange muzga wakuwuka pa zuŵa limoza panji pa mazuŵa ghaŵiri pakuti muzga ndi chuma chakhe.

²²“Para ŵanarume ŵakutimbana na kupweteka mwanakazi wa nthumbo, ndipo nthumbo iyo yafuma, kweni kulije kaheni kalikose, uyo wamupweteka walipe kwakuyana na umo mufumu wakhe wapimirenge, ndiposo na umo wadumulira weruzgi.

²³Kweni usange kaheni kamuwira mwanakazi, walipe umoyo pa umoyo,

²⁴jiso lilifyane na jiso, jino na jino, woko na woko, lundi na lundi,

²⁵kocheka na moto nayo walipe pakocheka na moto, chilonda na chilonda, kuthyapulika na kuthyapulika.

²⁶“Ndipo para munthu watimba jiso la muzga wakhe mwanarume panji mwanakazi na kuliturura, wamureke kuti warute mu wanangwa chifukwa cha jiso lakhe.

²⁷Usange wakhura jino la muzga wakhe mwanarume panji mwanakazi, wamureke warute mu wanangwa chifukwa cha jino lakhe.

²⁸“Usange ng'ombe yagwaza mwanarume panji mwanakazi na lusengwe lwakhe ndipo wafwa, ng'ombe iyo yikomeke pakudinyika na mawe. Nyama yakhe mureke kurya, ndipo mwenecho wa ng'ombe kuti wati waŵe na mrandu chara.

²⁹Kweni usange ng'ombe iyo yanguŵa na kaluso kakugwaza ŵanthu na masengwe ghakhe ndipo mwenecho wakuchenjezgeka kweni wakuyikaka chara, ndipo yikukoma munthu mwanarume panji mwanakazi, yikwenera kukomeka pakuyidinya na mawe. Mwenecho wa ng'ombe nayo wakwenera kukomeka.

³⁰Usange ŵakumupimira chakuwombolera umoyo wakhe, ipo walipe chose icho ŵamupimira kuwombolera umoyo wakhe.

³¹Usange ng'ombe yagwaza mwana mwanarume panji mwanakazi, ŵayichitire kwakuyana na dango leneili.

³²Usange ng'ombe yagwaza muzga mwanarume panji mwanakazi, mwenecho wa ng'ombe wapereke kwa sekuru wawo ndarama za siliva 30, ndipo ng'ombe yikomeke pakuyidina na mawe.

³³“Para munthu wakulireka mwazi khururu, panji para wajima khururu na kulireka lambula kubenekerera, ndipo ng'ombe panji mbunda yaŵene yawamo,

³⁴mwenecho wa khururu walipe pakupereka ndarama ku mwenecho, ndipo ng'ombe yakufwa yira yamkuŵa yakhe.

³⁵Para ng'ombe ya munthu yapweteka ng'ombe ya munthu munyakhe ndipo yafwa, ŵayiguliske ng'ombe yira yamoyo na kugaŵana ndarama zira. Ng'ombe yakufwa yira nayo, nyama yakhe ŵagaŵane.

³⁶Usange kwamanyikwa kuti ng'ombe iyo nkhaluso kakhe kakurasa ng'ombe zinyakhe, ndipo mwenecho wakayikakilira chara, walipe ng'ombe yamoyo ndipo yakufwa iyo ndiyo yiŵenge yakhe.