Read new_tumbuka_bible Kufuma 24 Bible Online

Kufuma 24 - new_tumbuka_bible bible

Kufuma 24

¹FUMU yikati kwa Mozesi, “Kwerera kuno kwa ine ku phiri, iwe na Aroni, Nadabu, Abihu na ŵarara ŵa ŵaIsraele 70, ndipo mundilambire ine apo muli chapatali.

²Kweni Mozesi pera, ndiyo wasenderere kufupi na FUMU. Ŵanyakhe ŵareke kusenderera kufupi, nanga ndi ŵanthu nawo ŵareke kukwera nayo pamoza.”

³Ntheura Mozesi wakaruta kuya kaŵaphalira ŵanthu mazgu ghose na maweruzgo ghose gha FUMU. Ndipo ŵanthu wose ŵakazgora na lizgu limoza, ŵakati, “Vyose ivyo FUMU yalangula, titi tichitenge.”

⁴Ntheura Mozesi wakalemba marango ghose agho FUMU yikayowoya. Wakawuka machero ghakhe na mulenje chomene na kuzenga jochero musi mu phiri na mizati ya mawe 12 kwakuyana na mafuko 12 gha ŵaIsraele.

⁵Ntheura wakatuma ŵanyamata kufuma mu ŵaIsraele kuya kapereka sembe zakocha na sembe za wenenawene za nkhambako kwa FUMU.

⁶Ndipo Mozesi wakatora hafu wa ndopa na kuziŵika mu bakule ndipo zinyakhe hafu wakamijira ku jochero.

⁷Penepapo wakatora buku la phangano na kuŵazga panthazi pa ŵanthu. Ŵanthu ŵakazgora kuti, “Titi tichite vyose ivyo FUMU yalangula. Ndipo titi timupulikire iyo.”

⁸Ntheura Mozesi wakatora ndopa zira na kumijira ŵanthu ndipo wakati, “Izi ndi ndopa za phangano ilo FUMU yikapangana namwe kwakuyana na mazgu ghose agha.”

⁹Penepapo Mozesi, Aroni, Nadabu, Abihu, na ŵararaŵarara 70 ŵara ŵakakwera phiri,

¹⁰ndipo wakamuwona Chiuta wa Israele. Kusi ku malundi ghakhe kukaŵa nga ndi para kuli mawe ghakwalikika gha safire gha bululu nga ndi mtambo.

¹¹Kweni Chiuta kuti wakawuska woko lakhe kuŵatimba ŵarongozgi ŵa ŵaIsraele chara. Iwo ŵakamuwona Chiuta ndipo ŵakarya na kumwa.

¹²FUMU yikati kwa Mozesi, “Kwerera kuno kwa ine ku phiri ndipo mundilindizgenge kwenekuno. Ndipo ndizamkukupa mawe ghapapati agho ghali na marango na malangulo gheneagho ndalemba kuti ndiŵasambizge.”

¹³Ntheura Mozesi na muteŵeti wakhe Yoshuwa wakawuka, ndipo Mozesi wakakwera ku phiri la Chiuta.

¹⁴Mozesi wakati ku ŵararaŵarara ŵa ŵaIsraele, “Kharani pano mutilindililenge tisuke tikawere. Aroni na Huru muli nawo papano. Yose uyo wali na mrandu, warutenge kwa iwo.”

¹⁵Para Mozesi wakakwera Phiri la Sinayi, bingu likabenekerera phiri lira.

¹⁶Uchindami wa FUMU, ukakhazikika pa Phiri la Sinayi. Pa mazuŵa ghankhonde na limoza, bingu likabenekerera phiri lira ndipo zuŵa la chinkhonde na chiŵiri, FUMU yikachema Mozesi kufuma mukati mwa bingu.

¹⁷Sono uchindami wa FUMU ukawoneka ku ŵaIsraele nga ndi moto wakulilima pachanya pa phiri.

¹⁸Mozesi wakanjira mu bingu lira ndipo wakaya kafika pachanya pa phiri. Ndipo wakakhara pa phiri mazuŵa 40 muhanya na usiku.