Read new_tumbuka_bible Kufuma 25 Bible Online

Kufuma 25 - new_tumbuka_bible bible

Kufuma 25

¹FUMU yikati kwa Mozesi,

²“Uŵaphalire ŵaIsraele kuti ŵizenge na vyawanangwa kwa ine. Iwe ndiwe undipokerenge vyawanangwa ivi kwa munthu waliyose uyo wakupereka na mtima wose.

³Vyakupereka ivyo uti upokere ndi ivi: golide, siliva, mkuŵa,

⁴salu ya bululu, yichesamu na yiswesi, salu ya bafuta muweme, weya wa mbuzi,

⁵vikumba vyakunyuka vya mberere zanarume vyakuroŵeka na utoto uswesi, vikumba vya mbuzi, mathabwa gha makuni gha akesha,

⁶mafuta gha olive ghakukozgera nyali, vyakununkhiskira vya mafuta ghakuphakazgira, ndiposo na lubani,

⁷mawe gha onike na mawe ghanji ghakuzirwa ghakusoneka pa chakuvwara cha musofi cha efodi ndiposo na cha pa chifuŵa.

⁸Ŵanthu ŵakwenera kundizengera Chihema Chakupatulika mwakuti ndikharenge mukati mwawo.

⁹Undizengere Chihema ichi na vyose vya mukati kwakuyana waka nga ndi umo ndikurongorerenge.

¹⁰“Ŵanthu ŵandipangire Bokosi la Phangano na mathabwa gha khuni la akesha. Utali wakhe liŵe masentimita 110, usani wakhe likaŵa masentimita 66. Ndipo mukukwera liŵe masentimita 66

¹¹Ndipo uliphake na golide mwenecho mukati na kuwaro ndipo uliroŵe na kamuzere ka golide zingirizge.

¹²Upange mphete zinayi za golide zakuyeghera bokosi ndipo uzikakilire ku malundi ghanayi ya bokosi. Ziŵiri ku dera limoza ndipo ziŵiri ku dera linyakheso.

¹³Ukapange michiko yakuyeghera ya makuni gha akesha ndipo ughaphake golide.

¹⁴Ndipo unjizge michiko mu mphete izo zili ku madera ghose ghaŵiri gha Bokosi la Phangano kuti yiŵe yakuyeghera bokosi.

¹⁵Michiko iyo yikharenge mu mphete za Bokosi la Phangano, yingawuskikikangamo chara.

¹⁶Mukati mwa Bokosi la Phangano ukaŵikemo mawe gha marango gheneagho nditi ndikupenge.

¹⁷“Upange chibenekerero chakuphepiskirapo cha golide mwenecho. Utali wakhe chiŵe masentimita 110, ndipo usani wakhe chiŵe masentimita 66.

¹⁸Upange ŵakerubi ŵa golide ŵaŵiri pakuŵafura na nyondo ndipo wamkuŵakhomerera ku umaliro wa chibenekerero chakuphepiskirapo.

¹⁹Ukaŵike kerubi yumoza ku umaliro wa dera limoza, ndipo munyakhe ku umaliro wa dera linyakhe. Ŵakerubi aŵa ŵaŵiri kosekose ŵamkudemererana na chibenekerero chakuphepiskirapo.

²⁰Ŵakerubi aŵa ŵatandazgire mapapindo ghawo muchanya, kubenekerera chibenekerero chakuphepiskirapo ichi ndipo ghakarazgirane. Visko vyawo vikarazge ku chibenekerero chakuphepiskirapo.

²¹Chibenekerero chakuphekiskirapo icho uzakachiŵike pachanya pa Bokosi la Phangano ndipo mukati mwa bokosi wamkuŵikamo mawe ghaŵiri gha marango agho nditi ndikupe.

²²Ndipo ine nditi ndikumane na kudumbiskana nawe apo ndili pachanya pa chibenekerero chakuphepiskirapo pakati pa ŵakerubi ŵaŵiri awo ŵali pachanya pa Bokosi la Phangano na kukupa iwe marango agho wamkuŵapa ŵaIsraele.

²³“Upange thebulu la mathabwa gha makuni gha akesha. Utali wakhe liŵe masentimita 90. Mu usani liŵe masentimita 46 ndipo mu kukwera liŵe masentimita 66.

²⁴Uliphake na golide mwenecho, na kuliroŵa na kamuzere ka golide zingirizge.

²⁵Ukalikhome tumathabwa mu mphepete mwakhe. Usani wakhe uŵe masentimita ghankhonde na ghatatu ndipo wakaturoŵa na kamuzere ka golide zingirizge.

²⁶Upange mphete zinayi za golide na kuzikakilira mphete izo ku ngodya zinayi za malundi gha thebulu.

²⁷Mphete izo ukaziŵike pafupi na tumathabwa tura kuŵa zakukhozga michiko pakuyegha thebulu.

²⁸Ukapange michiko ya khuni la akesha na kuyiphaka golide kuti yiŵe yakuyeghera thebulu.

²⁹Ukapange mbale na ŵadira ŵa vyakununkhira, viŵiya na nkhombo zakupungilira vinyo la sembe. Vyose ivi uvipange na golide mwenecho.

³⁰Ukaŵikengemo chingwa cha uŵapo wane pa thebulu kuti chiŵenge panthazi pa ine nyengo zose.

³¹“Ukapange chakuŵikapo nyali cha golide mwenecho. Chikongera na chithupi chakhe viŵe vyakufura na nyondo. Nkhombo zakhe, mitu yakhe na maluŵa ghakhe vikaŵa vyakubamphikana pamoza.

³²Mu mphepete mwakhe chiŵe na minthavi yinkhonde na umoza kufuma mu chakuŵikapo nyali chira, minthavi yitatu ku dera limoza ndiposo yitatu ku dera linyakhe.

³³Pa munthavi umoza pakaŵe nkhombo zitatu zakuŵa nga ndi maluŵa gha khuni la alimondi, ndiposo nkhombo zitatu zakuŵa nga ndi maluŵa gha khumi la alimondi pa munthavi unyakhe. Vikaŵe ntheura pa minthavi yose yinkhonde na umoza iyo yikufuma mu chakuŵikapo nyali chira.

³⁴Ndipo pa chakuŵikapo nyali pakaŵa nkhombo zinayi zakuŵa nga ndi maluŵa gha khuni la alimondi, mitu yawo ndiposo na maluŵa ghawo.

³⁵Pakaŵa luŵa limoza musi mwa minthavi yiŵiri kufuma mu chakuŵikapo nyali, luŵa la chiŵiri musi mwa minthavi yiŵiri ndipo luŵa la chitatu, musi mwa minthavi yinkhonde na umoza na maluŵa ghawo ghatatu.

³⁶Maluŵa na minthavi vipangikire lumoza na chakuŵikapo nyali kuti chose chiŵe chimoza. Chiŵe chakufura na nyondo kufuma ku golide mwenecho.

³⁷Upange nyali zakhe zinkhonde na ziŵiri na kuziŵika pa chakuŵikapo nyali mwakuti ziperekenge ungweru panthazi pakhe.

³⁸Mbano zakhe na vyakuyoreramo vyoto vyakhe viŵe vya golide mwenecho.

³⁹Chakuŵikapo nyali na viteŵetero vyakhe vyose uvipange na golide mwenecho. Uzitu wakhe uyane na makilogiramu 35.

⁴⁰Uwoneseske kuti upange vyeneivi kwakuyana na chiyerezgero icho nkhakurongora mu phiri.