Read new_tumbuka_bible Kufuma 26 Bible Online

Kufuma 26 - new_tumbuka_bible bible

Kufuma 26

¹“Upange Chihema cha salu zakuchingira khumi za bafuta zakurukika mwa luso zakusoneka na salu ya bululu, yichesamu na yiswesi. Uziroŵe na vithuzithuzi vya ŵakerubi ŵakurukika mwa unkhwantha.

²Salu zose ziŵe zakuyana waka, mu utali ziŵe mamita 12 ndipo mu usani ziŵe mamita ghaŵiri.

³Salu zinkhonde uzibamphike pamoza kuŵa salu yimoza ndipo salu zinyakhe zinkhonde nazo uzibamphikeso pamoza kuŵa salu yimoza.

⁴Mu mphepete mwa salu yakudanga yakubamphikana yira, ku umaliro wakhe usonerepo tuvingwe twa chovyo twa bululu, ndipo uchite ntheura pera na salu ya chiŵiri yakubamphikana yinyakhe yira.

⁵Usonereposo tuvingwe twa chovyo 50 ku umaliro wa salu yakubamphikana yakudanga yira ndiposo tuvingwe twa chovyo 50 pa salu yakubamphikana ya chiŵiri yinyakhe yira. Tuvingwe twa chovyo tukathyane waka na twa pa salu yakudanga.

⁶Upangeso nkhoroŵeko za golide 50 izo zamkubamphika salu ziŵiri zira zakubamphikana mwakuti Chihema chizgoke kuŵa chimoza.

⁷“Upange salu zakuchingira 11 za maweya gha mbuzi kuti ziŵe zakuchingira Chihema.

⁸Salu 11 zakuchinga izi ziŵe zakuyana zose, mu utali mamita 13, ndipo mu usani mamita ghaŵiri.

⁹Ukabamphike salu zinkhonde kuŵa salu yimoza ndipo salu zinkhonde na yimoza nazo ukazibamphike kuŵa salu yimoza. Ukazipeteke paŵiri salu zinkhonde na yimoza izi panthazi pa Chihema.

¹⁰Usonererepo tuvingwe twa chovyo 50 ku umaliro wa salu yakubamphikana yakudanga yira mu mphepete mwakhe ndiposo tuvingwe twa chovyo 50 mu mphepete mwa salu yakubamphikana ya chiŵiri yinyakhe yira.

¹¹Upange nkhoroŵeko 50 za mkuŵa na kukoroŵeka mu tuvingwe twa chovyo kuti vibamphikane kuŵa Chihema chimoza.

¹²Salu yakuchinga Chihema iyo yikakharako, hafu wa salu yakuchinga, mukayipayike kunyuma kwa Chihema.

¹³Salu zakukwana masentimita 50 mu utali izo zikharengeko ku salu zose ziŵiri zakubamphikana zira ndipo ukazipayike mu mphepete kufuma kwa Chihema malwegha ghose ghaŵiri kuti zibenekerere Chihema.

¹⁴“Upangeso vyakuchinga vinyakhe viŵiri vya Chihema Chakupatulika kufuma ku vikumba vyakunyuka makora vya mberere zanarume na vya mbuzi vyakuroŵeka na utoto uswesi ndipo ukaviŵika pachanya.

¹⁵“Upange mafuremu ghakwimilira gha khuni la akesha gha Chihema.

¹⁶Utali wa furemu limoza ukaŵa mamita ghanayi pachanya masentimita 50 ndipo usani ukaŵa masentimita 50 pachanya masentimita 20.

¹⁷Furemu lose la Chihema ukalikhome tumathabwa tuŵiri kuti tukorane pamoza. Ukachite ntheura pera na mafuremu ghose gha Chihema.

¹⁸Kurwande lwa ku mwera lwa Chihema upangireko mafuremu 20.

¹⁹Upange vikongera vya siliva 40 kuti mafuremu 20 ghara ghimepo. Pasi pa furemu lirilose paŵe vikongera vya siliva viŵiri vyakukora tumathabwa tuŵiri tura.

²⁰Ku dera linyakhe la ku mpoto kwa Chihema nako upangeko mafuremu 20,

²¹na vikongera vya siliva 40, vikongera viŵiri pasi pa furemu limoza ndiposo vikongera vinyakhe viŵiri pasi pa furemu linyakhe.

²²Kunyuma kwa Chihema, ku dera la ku manjiliro gha dazi, upangireko mafuremu ghankhonde na limoza.

²³Ndipo kunyuma kwa Chihema kwenekura, pa ngodya, ukapangireko mafuremu ghaŵiri.

²⁴Mafuremu gha pangodya agha ghapatukane musi mwakhe, kweni ghabamphikane pachanya pa mphete yakudanga. Ntheura ndimo ghamkuŵira mafuremu ghaŵiri pa ngodya ziŵiri.

²⁵Ntheura kwamkuŵako mafuremu ghankhonde na ghatatu pamoza na vikongera vya siliva vyawo 16 vyamkwimapo mafuremu, vikongera viŵiri pa furemu lirilose, ndipo vikongera viŵiri pa furemu linyakhe.

²⁶“Ukapange mitambiko ya khuni la akesha, yinkhonde ya mafuremu gha ku lwegha limoza la Chihema Chakupatulika,

²⁷yinkhonde pa mafuremu gha lwegha linyakhe ndiposo yinkhonde pa mafuremu gha ku manjiliro gha dazi, kunyuma kwa Chihema.

²⁸Pakaŵe mtambiko wa pakatikati uwo ukende pa mafuremu kufuma ku uyambiro mpaka ku umaliro.

²⁹Mafuremu ughaphake na golide ndipo unjizgemo mphete kuti yikore mitambiko, yeneiyo nayo uyiphake na golide.

³⁰Uzenge Chihema ichi kwakuyana na umo ndakurongorera pa phiri.

³¹“Upangeso chisalu chakuchinga chakukoroŵeka na salu ya bululu, yichesamu, yiswesi, na bafuta muweme. Uchiroŵeso mwa luso na vithuzithuzi vya ŵakerubi.

³²Chisalu chira uchipayike pa mizati yinayi ya khuni la akesha, kuti yikore chisalu chakuchinga chira. Mizati iyo uyiphake golide na kuyinjizga nkhoroŵeko za golide. Mizati yira uyipangire vikongera vyawo vya siliva vinayi.

³³Uchipayike chisalu chakuchinga icho pa nkhoroŵeko na kuŵika Bokosi la Phangano mukati mwenemura, ndipo chisalu chakuchinga pa chipinda ndicho chamkugaŵa Malo Ghakupatulika na Malo Ghakupatulika Nkhanira.

³⁴Uŵike chibenekerero chakuphepiskirapo pachanya pa Bokosi la Phangano ku Malo Ghakupatulika Nkhanira.

³⁵Ukaŵike thebulu kuwaro kwa chisalu chakuchinga ku dera la ku mpoto. Chakuŵikapo nyali ukachiŵike ku dera la ku mwera kwa Chihema kuthyana na thebulu.

³⁶“Pa muryango wa Chihema Chakupatulika, mukapangirepo chisalu chakuchinga chakuroŵeka mwa luso na salu ya bululu, yichesamu, yiswesi, na bafuta muweme.

³⁷Chisalu cha pa muryango icho uchipangire mizati ya khuni la akesha yinkhonde ndipo uyiphake golide ndipo nkhoroŵeko zakhe nazo ziŵe za golide. Ndipo uyipangire vikongera vinkhonde vya mkuŵa.