Read new_tumbuka_bible Kufuma 3 Bible Online

Kufuma 3 - new_tumbuka_bible bible

Kufuma 3

¹Sono Mozesi wakaliskanga mberere na mbuzi za wiskevyara Yeturo, musofi wa Midiyani. Iyo wakazirongozgera kutali ku mphepete kwa mapopa na kuya kafika ku Sinayi, phiri la Chiuta.

²Ndipo mungelo wa FUMU wakamuwonekera iyo mu dimi la moto uwo ukagoleranga mu chivwati. Iyo wakalaŵiska ndipo wakawona chivwati chikugolera, kweni kuti chikanyekanga chara.

³Ntheura Mozesi wakati, “Ndipatukileko kuti nkhawone chinthu cha chilendo ichi, na chifukwa icho chivwati chikurekera kunyekera.”

⁴Para FUMU yikawona kuti Mozesi wakuruta kuya kawona, Chiuta wakamuchema kufuma mu chivwati wakati, “Mozesi, Mozesi!” Iyo wakati, “Ndine pano.”

⁵Chiuta wakati, “Ungasenderanga pafupi. Vura skapato zako ku malundi ghako, pakuti malo gheneagho wimilirapo ngakupatulika.”

⁶Ndipo wakatiso, “Ine ndine Chiuta wa ŵawusokuru, Chiuta wa Abrahamu, wa Yisake, na wa Yakhobe.” Ntheura Mozesi wakabisa chisko chakhe, pakuti wakopa kulaŵiska Chiuta.

⁷Penepapo FUMU yikati, “Nadi ndawona nkhaza izo zikuchitikira ŵanthu ŵane awo ŵali mu Eguputo, ndipo ndapulika kulira kwawo chifukwa cha ŵarara ŵakuŵalaŵirira awo ŵakuŵachitira nkhaza. Sono ndamanya makora visuzgo vyawo.

⁸Ntheura ndakhira kuti ndiŵathaske ku ŵaEguputo, na kuŵafumyamo mu charu icho ndipo ndiŵatorere ku charu chiweme na chisani icho ncha mkaka na uchi, charu cha ŵaKanani, ŵaHiti, ŵaAmori, ŵaPerezi, ŵaHivi na ŵaYebusi.

⁹Sono kulira kwa ŵaIsraele kwafika kwa ine, ndipo ndawonaso kunyekezga uko ŵaEguputo ŵakuŵanyekezga nako.

¹⁰Ntheura sono ruta, nkhukutuma kwa Faro kuti ukafumiske ŵanthu ŵane kufuma mu Eguputo.”

¹¹Kweni Mozesi wakati kwa Chiuta, “Kasi ndine njani ine kuti ndirute kwa Faro na kuya kufumiska ŵaIsraele kufuma mu Eguputo?”

¹²Chiuta wakati, “Ine ndiŵenge nawe. Ndipo chimanyikwiro chakuti ndakutuma ndine ndi ichi. Para waŵafumiska ŵanthu ŵane mu charu cha Eguputo, wizamkundisopa ine pa phiri leneili.”

¹³Mozesi wakati kwa Chiuta, “Usange ndingaruta ku ŵaIsraele na kuti kwa iwo, ‘Chiuta wa ŵawiskemwekuru wandituma kwa imwe,’ ndipo iwo ŵakandifumbe kuti, ‘Zina lakhe ndi njani?’ Sono kasi nkhaŵaphalire vichi?”

¹⁴Chiuta wakati kwa Mozesi, “Ine ndine mweneuyo ndine. Ntheura ndimo ukwenera kuŵaphalirira ŵaIsraele kuti uyo wakuchemeka kuti, ‘INE NDINE, wandituma kwa imwe.’ ”

¹⁵Chiuta wakatiso kwa Mozesi, “Ukayowoye ichi ku ŵaIsraele, kuti, ‘FUMU, Chiuta wa ŵawiskemwekuru, Chiuta wa Abrahamu, Chiuta wa Yisake, na Chiuta wa Yakhobe, wandituma kwa imwe. Ili ndilo zina lane kwa muyirayira ndipo ntheura ndimo nkhwenera kuzunurikira mu miwiro yose.’

¹⁶Ruta, ndipo ukaŵawunganye ŵarara ŵa ŵaIsraele, ndipo ukati kwa iwo, FUMU, Chiuta wa ŵawiskemwekuru, Chiuta wa Abrahamu, wa Yisake na wa Yakhobe wakandiwonekera ine na kuti: Ine ndamwenderani ndipo ndawona ivyo vikumuchitikirani imwe mu Eguputo.

¹⁷Ndipo nkhupangana kumufumyanimo mu visuzgo vya ŵaEguputo na kumutorerani ku charu cha ŵaKanani, ŵaHiti, ŵaAmori, ŵaPerezi, ŵaHivi, na ŵaYebusi, charu cha mkaka na uchi.”

¹⁸“Ŵarara ŵa ŵaIsraele ŵamkupulika mazgu ghako ndipo iwe pamoza na iwo mukarute kwa karonga wa ku Eguputo na kuti kwa iyo, ‘FUMU, Chiuta wa ŵaHebere wakumana nase. Ntheura sono tikumuŵeyani, rekani tirute ulendo wa mazuŵa ghatatu ku mapopa kuti tikapereke sembe kwa FUMU, Chiuta withu.’

¹⁹Nkhumanya kuti karonga wa Eguputo kuti wamkumuzomerezgani chara, pekhapekha wachichizgike mwa nkhongono.

²⁰Ntheura nditi ndinyoroske woko lane na kutimba ŵaEguputo na vya vikuzizwiska vyose ivyo ndamkuchita mukati mwawo. Pamanyuma pa ivi wamkumuzomerezgani kuti murute.”

²¹“Ndipo ine nditi ndichite kuti ŵaIsraele ŵasange lusungu pa maso pa ŵaEguputo. Ntheura para mukuruta kuti mwamkuruta kwambula kanthu chara.

²²Mwanakazi yose muIsraele wamurombe mwanakazi muEguputo uyo wazengezgana nayo na uyo wakukhara mu nyumba yakhe kuti wamupeko vitowelo vya siliva na vya golide ndiposo na vyakuvwara. Ivi ndivyo mwizamukuvwarika ŵana ŵinu ŵanarume na ŵanakazi. Mwa ntheura ndimo muŵaskoyerenge vyuma ŵaEguputo.”