Read new_tumbuka_bible Kufuma 30 Bible Online

Kufuma 30 - new_tumbuka_bible bible

Kufuma 30

¹“Upange jochero la kocherapo vyakununkhira, ndipo liŵe la mathabwa gha khuni la akesha.

²Liŵe lakuyana waka mu utali na mu usani wakhe. Mu utali liŵe masentimita 45, ndipo mu usani namo ntheura pera masentimita 45. Mukukwera liŵe masentimita 90. Masengwe ghakhe ghabatikane na jochero lira.

³Uliphake jochero lose na golide mwenecho, pachanya pakhe na mu mphepete mwakhe zingirizge na mu masengwe ghakhe. Uliroŵe na kamuzere ka golide zingirizge.

⁴Upange mphete ziŵiri za golide na kuzibatika ku jochero musi mu kamuzere kakuroŵeka na golide ku malwegha ghakuthyana waka kuti zikorenge michiko yakuyeghera.

⁵Upange michiko ya khuni la akesha na kuyiphaka golide.

⁶Jochero ili uliŵike panthazi pa chisalu chakuchinga icho chili panthazi pa Bokosi la Phangano kuthyana na chibenekerero chakuphepiskirapo icho chili pachanya pa Bokosi la Phangano apo ndamkukumana nawe.

⁷Aroni wakwenera kocha vyakununkhira vya sungu liweme pa jochero lenelira mulenje uliwose para wakukozga nyali.

⁸Para Aroni wakukozga nyali ku na mise napo wakwenera kocha vyakununkhira mwakuti vyakununkhira vyochekenge nyengo na nyengo panthazi pa FUMU mu miwiro yinu yose.

⁹Pa jochero ili, ureke kuya kaperekerapo vyakununkhira vyambula kupatulika, nanga ndi sembe yakocha, sembe ya ufu. Ndipo kuti mwamkupungulirapo sembe ya vyakumwa chara.

¹⁰Aroni watozgenge jochero pakumija ndopa za sembe yakuphepiskira kwananga pa masengwe gha jochero ili kamoza pa chirimika. Kamoza pa chirimika, wakwenera kuphepiska kwananga pa jochero ili pa miwiro yose. Jochero ili ndakupatulika nkhanira kwa FUMU.”

¹¹FUMU yikati kwa Mozesi,

¹²“Para wamkupenda ŵaIsraele, munthu waliyose wakapereke chakuwombolera umoyo wakhe kwa FUMU, mwakuti chilengo chilichose chireke kuŵamo pa nyengo iyo ŵakupendekera.

¹³Munthu yose uyo wapendeka, wapereke ndarama za siliva zakukwana magiramu ghankhonde na limoza izo ndi ndarama zakupimikira ku Chihema Chakupatulika. Yeneiyi ndiyo yiŵenge yakuperekeka kwa FUMU.

¹⁴Yose uyo wapendekenge waŵenge wa virimika 20 na kujumphirapo ndipo ndiyo waperekenge ndarama iyi kwa FUMU.

¹⁵Para mukupereka vyawanangwa kwa FUMU kuŵa vyakujiphepiskira mwekha, musambazi wareke kupereka vinandi kuruska hafu wa ndarama ya siliva ndipo mukavu wareke kupereka yichoko kuruska ndarama iyi.

¹⁶Ndarama yakuwombolera iyi ukayipoke ku ŵaIsraele ndipo ukayipatuliskire mlimo wa mu Chihema Chakukumaniranamo. Iyi ndiyo yiti yiŵenge chikumbusko cha ŵaIsraele panthazi pa FUMU kuti ŵachitenge mphepiska ya umoyo wawo.”

¹⁷Ntheura FUMU yikati kwa Mozesi,

¹⁸“Upange beseni lakugezeramo la mkuŵa, ndipo chikongera chakhe nacho chiŵe cha mkuŵa. Uchiŵike pakati pa Chihema Chakukumaniranamo na jochero na kuthiramo maji.

¹⁹Ndipo Aroni na ŵana ŵakhe ŵagezerengemo mawoko na malundi ghawo kufuma mu cheneichi.

²⁰Para ŵakunjira mu Chihema Chakukumaniranamo, panji para ŵakwiza kuti ŵateŵetere pa jochero na sembe yakocha kwa FUMU, ŵagezenge maji kuti ŵareke kufwa.

²¹Ŵagezenge mawoko na malundi ghawo kuti ŵareke kufwa. Ili liŵenge dango la muyirayira kwa Aroni na ku ŵa mphapu yakhe mu miwiro yawo yose.”

²²Ntheura FUMU yikati kwa Mozesi,

²³“Utore vyakununkhira viweme chomene ivi: Makilogiramu ghankhonde na limoza gha mure wa majimaji, makilogiramu ghatatu gha vyakununkhira makora vya kinamoni, makilogiramu gha vyakununkhira makora vya zinde,

²⁴makilogiramu ghankhonde na limoza gha kasiya (kwakuyana na ndarama za kapimikiro ka mu Chihema Chakupatulika). Ndipo usazgeko mafuta ghakukwana malita ghatatu gha olive,

²⁵ndipo na vyeneivi wengeko mafuta ghakuphakazgira. Uzakaghasazge makora nga ndi gha mwengi wa vyakununkhira. Gheneagha ghati ghaŵenge mafuta ghakupatulika ghakuphakazgira.

²⁶Na mafuta gheneagho uphakazge Chihema Chakukumaniranamo na Bokosi la Phangano,

²⁷thebulu na viteŵetero vyakhe vyose, chakuŵikapo nyali na viteŵetero vyakhe, na jochero la sembe ya vyakununkhira,

²⁸jochero la sembe yakocha na viteŵetero vyakhe vyose, beseni lakugezeramo, pamoza na chikongera chakhe.

²⁹Vyose uvipatule kuti viŵe vyakupatulika nkhanira, ndipo chose icho chamkukhwaska vyeneivi chamkuŵa chakupatulika.

³⁰Ukamuphakazge Aroni na ŵana ŵakhe ndipo ukaŵapatule kuti wanditeŵetere ine pa mlimo wa usofi.

³¹Ndipo uŵaphalire ŵaIsraele kuti, ‘Agha ndigho ghati ghaŵenge mafuta ghane ghakupatulika, gheneagho ghaŵenge ghakuphakazgira mu miwiro yinu yose.

³²Mafuta agha ghareke kupungulirika pa ŵanthu bweka, nesi kwengekaso ghanyakhe ghakuŵa nga ndi agha. Mafuta agha ngakupatulika ndipo ghati ghaŵenge ghakupatulika na kwa imwe uwo.

³³Yose uyo wakwenga mafuta ghakuŵa nga ndi agha, panji uyo wakupungulira pa munthu bweka kwambula kuti mpha musofi, wati wawuskikengeko mukati mu ŵabali ŵakhe.’ ”

³⁴Ntheura FUMU yikati kwa Mozesi, “Tora vyakununkhira vya sungu liweme ivi: sitakite, onika, galibanumu na lubani ndipo vyose viŵe mweso wakuyanayana waka.

³⁵Ndipo usazge pamoza kuti upange sungu liweme la vyakununkhira nga ndi gha mwengi wa vyakununkhira. Viŵe vyakurungika na muchere, viŵenge viweme chomene na vyakupatulika.

³⁶Usire vinyakhe vya ivyo kuti viŵe ufu, ndipo ukaviŵike panthazi pa Bokosi la Phangano mukati mu Chihema Chakukumaniranamo mwenemumo ndamkukumana nawe. Vyakununkhira ivi viŵenge vyakupatulika nkhanira kwa imwe.

³⁷Ndipo vyakununkhira ivyo upange kwakuyana na umo mwasazgira. Mureke kuya kajichitira kuŵa vya mlimo winu, chifukwa ndi vyakupatulikira FUMU.

³⁸Yose uyo wati wapange mafuta ghakuŵa nga ndi agha, mu kanunkhiro kakhe, wamkuwuskikako mukati mu ŵabali ŵakhe.”