Read new_tumbuka_bible Kufuma 31 Bible Online

Kufuma 31 - new_tumbuka_bible bible

Kufuma 31

¹Ntheura FUMU yikati kwa Mozesi,

²“Wona ndamusora Bezalele mwana wa Uri muzukuru wa Huru wa fuko la Yuda,

³ndipo ndamuzuzga na mzimu wane na kumupa vinjeru, umanyi na unkhwantha wose pa mlimo wa kuŵaja,

⁴kuti walembenge nchito za mlimo wa golide, siliva na mkuŵa.

⁵Iyo wati wazongenge mawe ghakwimikapo tunthu na kuŵaja mathabwa mwa unkhwantha pa mlimo wakupambanapambana.

⁶Ndipo ndasoraso Oholiyabu mwana wa Ahisamaki wa fuko la Dani kuti wavwiranenge na Bezalele. Ndapereka unkhwantha ku ŵanthu wose kuti ŵachitenge chose icho ndakulangula iwe.

⁷Iwo ŵati ŵapange Chihema Chakukumaniranamo, Bokosi la Phangano, chibenekerero chakuphepiskirapo na viteŵetero vyose vya mu Chihema Chakukumaniranamo,

⁸thebulu na viteŵetero vyakhe vyose, jochero lakocherapo vyakununkhira,

⁹jochero la sembe yakocha na viteŵetero vyakhe vyose, beseni na chikongera chakhe,

¹⁰vyakuvwara vyakupatulika vyakusoneka makora, vya musofi Aroni na vya ŵana ŵakhe, para ŵakuteŵeta pa mlimo wawo wa usofi,

¹¹mafuta ghakuphakazgira, ndiposo na vyakununkhira vya sungu liweme, vya mu Chihema Chakupatulika. Ŵakachitenge vyose ivi kwakuyana na umo nkhakulayizgira.”

¹²Ntheura FUMU yikati kwa Mozesi,

¹³“Uŵaphalire ŵaIsraele kuti, ‘Musungenge maSabata ghane, pakuti ichi nchimanyikwiro pakati pa imwe na ine mu miwiro yinu yose mwakuti mumanye kuti ine ndine FUMU uyo wakumupatulani.

¹⁴Mukumbukenge zuŵa la Sabata, chifukwa ndakupatulika kwa imwe. Yose uyo wakulinanga zuŵa ili, wamkukomeka, ndipo yose uyo wakuchita mlimo pa zuŵa ili, wamkuwuskikako mukati mu ŵabali ŵakhe.

¹⁵Mu mazuŵa ghankhonde na limoza, mukachitenge milimo yinu, kweni pa zuŵa la chinkhonde na chiŵiri ndi Sabata lakupumulira, lakupatulikira FUMU. Yose uyo wakuchita mlimo pa zuŵa la Sabata wakomeke.

¹⁶Ntheura ŵaIsraele ŵasunge zuŵa la Sabata pakulikumbuka zuŵa ili mu miwiro yawo yose nga ndi phangano la muyirayira.

¹⁷Liti liŵenge chimanyikwiro cha muyirayira pakati pa ine na ŵaIsraele kuti mu mazuŵa ghankhonde na limoza FUMU yikalenga mtambo na charu cha pasi, ndipo pa zuŵa la chinkhonde na chiŵiri yikapumula na kuwezgeramo nkhongono zakhe.’ ”

¹⁸Para FUMU yikamara kuyowoya na Mozesi pa Phiri la Sinayi, yikamupa mawe ghapapati ghaŵiri gha phangano gheneagho FUMU yikalembapo marango ghakhe na munwe wakhe.