Read new_tumbuka_bible Kufuma 32 Bible Online

Kufuma 32 - new_tumbuka_bible bible

Kufuma 32

¹Para ŵanthu ŵakawona kuti Mozesi wachedwa kwiza kufuma mu phiri, wakamuwunganira Aroni na kuti kwa iyo, “Utipangire chiuta uyo wangatirongozga pakuti Mozesi uyo wakatifumya mu charu cha Eguputo, tikumanya chara icho chamuwira.”

²Aroni wakati kwa iwo, “Vurani ndewerewe za golide izo zili mu makutu gha ŵawoli ŵinu na ŵana ŵinu ŵanarume na ŵanakazi ndipo mwize nazo kwa ine.”

³Ntheura ŵanthu wose ŵakavura ndewerewe za golide izo zikaŵa mu makutu gha ŵawoli ŵawo na kwiza nazo kwa Aroni.

⁴Wakazipokera ndewerewe za golide zira na kuzisongonora, ndipo wakapanga mwana wa ng'ombe wa golide. Ndipo ŵanthu ŵakachemerezga ŵakati, “Iwe Israele, uyu ndiyo Chiuta wako uyo wakakufumya mu charu cha Eguputo.”

⁵Para Aroni wakawona ichi, wakazenga jochero panthazi pa mwana wa ng'ombe wa golide yura na kuchemerezga kuti, “Na machero ndi zuŵa la chiphikiro cha kuchindikira FUMU,”

⁶Ntheura na machero ghakhe ŵanthu ŵakawuka na mulenje chomene na kupereka sembe yakocha na sembe ya wenenawene. Ŵakakhara pasi kuti ŵarye na kumwa ndipo ŵakawuka na kwamba kuvina mwa ukazuzi.

⁷Penepapo FUMU yikati kwa Mozesi, “Khira, pakuti ŵanthu ŵako awo ukaŵafumya mu charu cha Eguputo wajinangiska.

⁸Ŵawukamo luŵiro chomene mu nthowa iyo nkhaŵalangulira kuti ŵendemo. Ŵajipangira chiuta ngoza wa mwana wa ng'ombe wa golide wakusongonora na kumulambira ndipo ŵapereka sembe kwa iyo na kuyowoya kuti, ‘Iwe Israele, uyu ndiyo chiuta wako uyo wakakufumya mu charu cha Eguputo.’

⁹FUMU yikatiso kwa Mozesi, ‘Ndaŵawona ŵanthu aŵa kuti mba mtima unonono.’

¹⁰Ntheura sono undireke kuti ukari wane ugolere chomene pa iwo mwakuti ndiŵamare petu. Kweni iwe, nditi ndikuzgorenge kuŵa fuko likuru.”

¹¹Kweni Mozesi wakaŵeya kwa FUMU, Chiuta wakhe wakati, “Mwe FUMU, kasi nchifukwa uli ukari winu wagolerera pa ŵanthu ŵinu awo mukaŵafumya mu charu cha Eguputo na nkhongono zikuru na woko la mazaza?

¹²Nchifukwa uli ŵaEguputo ŵayowoye kuti, ‘Pakuŵaghanaghanira chiheni, Chiuta wakaŵafumya kuti wizakaŵakomera mu mapiri na kuŵamara petu pa charu’? Gowokaniko ku ukari winu wakofya ndipo chiheni ichi chireke kwiza pa ŵanthu ŵinu.

¹³Kumbukani Abrahamu, Yisake, na Yakhobe, ŵateŵeti ŵinu kwa ŵeneawo mukajirapizga mwekha na kuŵaphalira kuti, ‘Ndamkwandaniska mphapu yako kuti yiŵe nga ndi nyenyezi za kuchanya, ndipo charu chose icho ndili kupangana, ndamkupereka ku mphapu yako kuti chiŵe chawo kwa muyirayira.’ ”

¹⁴Ntheura FUMU yikagowoka ku chinthu chiheni icho yikatenge yiŵachitire ŵanthu ŵakhe.

¹⁵Mozesi wakafumako na kŵikha kufuma ku phiri uku wayegha mawe ghapapati ghaŵiri gha phangano agho ghakalembeka malwegha ghose ghaŵiri.

¹⁶Mawe ghapapati ghara ghakanozgeka na Chiuta ndipo malembo nagho ghakalembeka na Chiuta mwenecho pakughazonga pa mawe ghara.

¹⁷Para Yoshuwa wakapulika kupoma na kuchemerezga kwa ŵanthu, ŵakati kwa Mozesi, “Kuli chiwawa cha nkhondo ku misasa.”

¹⁸Kweni Mozesi wakati, “Ichi kuti nchiwawa chakuchemerezga kwa awo ŵatonda chara, nesi chiwawa cha kulira kwa awo ŵatondeka chara. Icho nkhupulika ndi chiwawa cha kwimba.”

¹⁹Para Mozesi wakiza kufupi na msasa na kuwona mwana wa ng'ombe ndiposo na ŵanthu ŵakuvina, ukari wakhe ukagolera. Ntheura wakaghaponya pasi mawe ghapapati ghaŵiri ghara na kughaswera musi mu phiri.

²⁰Ndipo wakatora mwana wa ng'ombe uyo ŵakapanga, ŵakamocha pa moto na kusira mpaka wakazgoka fuvu ndipo wakathira fuvu lira mu maji na kuŵamweska ŵaIsraele.

²¹Mozesi wakati kwa Aroni, “Kasi ŵanthu aŵa ŵakachitachi kwa iwe kuti uŵatorere kwananga kukuru uku.”

²²Aroni wakazgora wakati, “Rekani kukaripa, sekuru wane. Namwe mukumanya waka kuti ŵanthu aŵa ŵali kwima pakuchita uheni.

²³Iwo ŵanguti kwa ine, ‘Utipangire chiuta wakuti watirongozgenge pakuti Mozesi uyo wakatifumya mu charu cha Eguputo, tikumanya chara icho chamuwira.’

²⁴Ntheura ine nkhati kwa iwo, ‘Yose uyo wali na golide, wawuskepo. Ndipo ŵakati ŵandipa, nkhaponya pa moto, ndipo kukafuma mwana wa ng'ombe uyu!’ ”

²⁵Penepapo Mozesi wakawona kuti ŵanthu ŵagaruka pakuti Aroni ndiyo waŵarekerera kuti ŵagaruke na kukhozgeka soni ku ŵarwani wawo.

²⁶Ntheura Mozesi wakimilira pa chipata cha msasa na kuti kwa iwo, “Kasi ndi njani uyo wali pamoza na FUMU? Wize kwa ine. Ŵana ŵanarume wose ŵa Levi ŵakiza na kumuwunganira iyo.”

²⁷Mozesi wakati kwa iwo, “FUMU, Chiuta wa Israele wakuti, munthu yose watore lupanga lwakhe ku lwegha lwakhe na kwenda kufuma ku chipata mpaka ku chipata cha msasa na kukoma mubali wakhe, mubwezi wakhe, na muzengezgani wakhe.”

²⁸Ndipo ŵana ŵanarume ŵaLevi ŵakachita nga ndi umo Mozesi wakaŵalangulira ndipo zuŵa lira ŵakakoma ŵanthu 3,000.

²⁹Penepapo Mozesi wakati ku ŵana ŵanarume ŵaLevi, “Muhanya uno, mwajipatuliska mwekha kuti muŵe ŵasofi ŵakuteŵetera FUMU pakukoma ŵana ŵinu na ŵabali ŵinu. Ntheura FUMU yamutumbikani muhanya uno.”

³⁰Na machero ghakhe Mozesi wakati ku ŵanthu, “Mulikunanga chomene, kweni sono nditi ndikwerere kwa FUMU panji ndingakamuphepiskirani zakwananga zinu.”

³¹Ntheura Mozesi wakawerera kwa FUMU ndipo wakati, “Mbaya mwe! Ŵanthu aŵa ŵananga chomene. Ŵajipangira chiuta ngoza wa golide.

³²Kweni sono phepani, muŵagowokere kwananga kwawo, usange chara, musisite zina lane mu buku umo muli kulemba.”

³³FUMU yikamuzgora Mozesi kuti, “Yose uyo wandinangira, ndiyo yekha ndisisitenge zina lakhe mu buku lane.

³⁴Kweni sono rutanga, ukaŵarongozge ŵanthu ku malo agho ndakuphalira ndipo mungelo wane wati wakudangirire panthazi. Ndipouli nyengo yiti yizenge apo nditi ndiŵalange chifukwa cha kwananga kwawo.”

³⁵Ntheura FUMU yikaŵatumira nthenda ŵanthu chifukwa ŵakamuchichizga Aroni kuti wa ŵapangire mwana wa ng'ombe wa golide.