Read new_tumbuka_bible Kufuma 34 Bible Online

Kufuma 34 - new_tumbuka_bible bible

Kufuma 34

¹FUMU yikati kwa Mozesi, “Uŵaje mawe ghapapati ghaŵiri ghakuyana waka na gha pakudanga ghara, ndipo ine ndamkulembapo mazgu agho ghakaŵa pa mawe gha pakudanga agho ukaswa.

²Uŵe wakunozgeka ndipo na machero na mulenje ukwerere kuno ku Phiri la Sinayi kuti wiza kakumane nane pachanya pa phiri.

³Paŵavye munthu wakukwera nawe pa phiri nesi yumoza kuwoneka palipose pa phiri ili, nanga ndi mberere na mbuzi panji ng'ombe kuti ziryenge musi mwa phiri ili.”

⁴Ntheura Mozesi wakaŵaja mawe ghapapati ghaŵiri ghakuyana waka na ghapakudanga ghara, ndipo wakacherera na mulenje kuruta ku Phiri la Sinayi nga ndi umo FUMU yikamulangulira uku wayegha mawe ghaŵiri ghapapati ghara.

⁵Ntheura FUMU yikakhira mu bingu, na kwiza kimilira pamoza nayo penepara na kuphara zina lakhe, lakuti FUMU.

⁶FUMU, yikajumpha panthazi pa Mozesi na kuphara kuti, “FUMU, FUMU, Chiuta wa chiwuravi na wa uchizi, wakuziwurika kukaripa, wakuzura na chisungusungu na wakugomezgeka,

⁷wakurongora chisungusungu chakhe ku ŵanthu vikwivikwi, ndipo wakugowokera majuvyo, mauheni na zakwananga. Kweni ŵakubendera kuti wati waŵareke waka chara, wati walange ŵana na ŵazukuru kuya kafika ku muwiro wa chitatu na wa chinayi chifukwa cha maubendezi gha ŵawiskewo.”

⁸Penepapo Mozesi wakasindamira pasi chisko chakhe na kusopa.

⁹Ndipo wakati, “Mwe FUMU, usange ndasanga uchizi pa maso pinu, nkhumuŵeyani, mwendenge nase. Nangauli ŵanthu aŵa mba mtima unonono, kweni imwe mutigowokere kwananga kwithu, na mauheni ghithu na kutitora ise nga ŵanthu ŵinu.”

¹⁰Ntheura FUMU yikati kwa Mozesi, “Sono nditi ndichite phangano na imwe. Panthazi pa imwe mose nditi ndichite vyakuzizwiska ivyo vindachitikepo mu fuko lirilose mu charu cha pasi. Ŵanthu awo mukukhara nawo ŵati ŵawone chakofya icho ine FUMU ndamkuŵachitira.

¹¹Upulikire icho nkhukulangula muhanya uno. Ine nditi ndiŵachimbizge panthazi pinu ŵaAmori, ŵaKanani, ŵaHiti, ŵaPerezi, ŵaHivi, na ŵaYebusi.

¹²Uchenjere, ureke kuya kachita phangano na ŵanthu ŵa ku charu icho mukuruta kuya kakharamo mzire ŵakaŵe chipingo mukati mwinu.

¹³Mukapankhulire pasi majochero ghawo na kubwangandulira pasi mizati yawo ya mawe ndipo mukadumulire pasi vikumbusko vya chiuta ngoza wawo Ashera.

¹⁴“Mureke kuya kalambira ŵachiuta ŵanyakhe chifukwa FUMU, yeneiyo zina lakhe ndi Sanje, ndi Chiuta wa sanje.

¹⁵Mureke kuya kachita phangano na ŵanthu ŵa ku charu icho mukuruta kuya kakharamo, mzire para ŵakulambira ŵachiuta ngoza ŵawo na kupereka sembe kwa iwo, ŵamuchemani kuti murye nawo pamoza sembe iyo ŵakupereka kwa chiuta ngoza wawo.

¹⁶Mureke kuya katora ŵana ŵawo ŵanakazi kuŵa ŵawoli ŵa ŵana ŵinu ŵanarume, mzire para ŵana ŵanakazi ŵawo ŵakulambira ŵachiuta ngoza ŵawo, ŵana ŵinu ŵanarume nawo ŵati ŵalambire ŵachiuta ngoza ŵawo.

¹⁷“Mureke kuya kajipangira ŵachiuta ŵakusongonora.

¹⁸“Mukachitenge chiphikiro chaChingwa chambula chirungo. Mukaryenge chingwa chambula chirungo pa mazuŵa ghankhonde na ghaŵiri pa nyengo yakwimikika ya mwezi wa Abibu nga ndi umo nkhamulangulirani, pakuti weneuwo ndi mwezi uwo mukafumiramo mu Eguputo.

¹⁹“Mwana mwanarume yose wakudanga kubabika ngwane, pamoza na ŵana wose ŵakudanga kubabika ŵa viŵeto vyinu manyi mba ng'ombe panji ŵa mberere na mbuzi.

²⁰Mwana wa uŵere wa mbunda mukamuwombolenge na mwana-mberere, kweni usange wamkureka kumuwombola, mukamuphyore singo. Mukawombolenge ŵana ŵanarume ŵinu wose ŵakudanga kubabika. “Paŵavye munthu wakuwoneka panthazi pane wambula kanthu mu mawoko ghakhe kakuti wapereke.

²¹“Mu mazuŵa ghankhonde na limoza uchitenge mlimo wako, kweni pa zuŵa la chinkhonde na chiŵiri ukapumulenge nanga ungaŵa mu nyengo ya kulima panji yakuvuna.

²²“Mukachitenge chiphikiro cha maSabata, cha vipambi vyakudanga vya vuna ya tirigu, na chiphikiro cha kuronga vuna ku umaliro wa chirimika.

²³“Katatu pa chirimika chilichose, ŵanarume wose ŵawonekenge panthazi pane na kulambira FUMU, Chiuta wa Israele.

²⁴Pakuti nditi ndichimbizge mafuko panthazi pinu na kukuzga mphaka zinu ndipo paŵavyenge na yumoza wakukhumba kwiza kapoka charu chinu, usange mukwiza katatu pa chirimika na kuwoneka panthazi pane na kulambira FUMU, Chiuta winu.

²⁵“Mureke kupereka ndopa za sembe kwa ine pamoza na chilichose icho chili na chirungo. Ndipo sembe yose iyo yakomekera chiphikiro cha Paska, yireke kukharako mpaka na mulenje na machero ghakhe.

²⁶“Mukizenge na vipambi viweme vyakudanga kuphya vya mu minda yinu, ku nyumba ya FUMU, Chiuta winu. “Mureke kuphika kana ka mbuzi mu mkaka wa nyina.”

²⁷FUMU yikati kwa Mozesi, “Lemba mazgu agha chifukwa mu gheneagha nkhuchita phangano na iwe na ŵaIsraele.”

²⁸Ntheura Mozesi wakakhara kwenekura na FUMU mazuŵa 40 muhanya na usiku kwambula kurya chakurya chilichose nanga nkhumwa maji. Ntheura wakalemba mazgu ghara pa mawe ghapapati mazgu gha phangano agho ndi marango khumi.

²⁹Para Mozesi wakati wakhira kufuma pa Phiri la Sinayi na mawe ghapapati ghaŵiri gha phangano ghara wakamanya chara kuti chisko chakhe chikaŵa chakugadima pakuti wakayowoyanga na Chiuta.

³⁰Para Aroni na ŵaIsraele wose ŵakawona Mozesi, ŵakawona chisko chakhe chikugadima ndipo ŵanthu wose wakopa kwiza pafupi nayo.

³¹Kweni Mozesi wakaŵachema, ndipo Aroni na ŵarongozgi ŵa mpingo ŵakawerera kwa Mozesi, ndipo iyo wakayowoya nawo.

³²Pamanyuma ŵaIsraele wose wakiza pafupi ndipo iyo wakaŵapa marango agho FUMU yikamupa pa Phiri la Sinayi.

³³Para Mozesi wakamara kuyowoya nawo, wakadikiska chisko chakhe na chidiko.

³⁴Kweni nyengo yose iyo wakanjiliranga mu Chihema Chakukumaniranamo, kuti wayowoye na FUMU wakawuskangako chidiko ku chisko chakhe mpaka pa nyengo ya kufumira. Para wafumira kuwaro, wakaŵaphaliranga ŵaIsraele vyose ivyo walangulika kuŵaphalira.

³⁵Ndipo ŵaIsraele ŵakawonanga kuti chisko cha Mozesi chikugadima, ntheura wakabenekereraso chisko chakhe mpaka pa nyengo yinyakhe apo wati wanjilire mu Chihema na kuyowoya na FUMU.