Read new_tumbuka_bible Kufuma 35 Bible Online

Kufuma 35 - new_tumbuka_bible bible

Kufuma 35

¹Mozesi wakawunganya mpingo wose wa ŵaIsraele na kuti kwa iwo, “Ivi ndivyo FUMU yamulangulani kuti muchitenge.

²Mu mazuŵa ghankhonde na limoza muchitenge mlimo winu, kweni pa zuŵa la chinkhonde na chiŵiri, mukaŵenge na Sabata lakupatulika la kupumulira kwa FUMU. Yose uyo wakuchita mlimo pa zuŵa ili wakomeke.

³Mureke kupemba moto mu nyumba zinu zose pa zuŵa la Sabata.”

⁴Mozesi wakati ku mpingo wose wa ŵaIsraele, “Ichi ndicho FUMU yalangula.

⁵Kufuma pa ivyo munthu wali navyo, waperekenge vyawanangwa kwa FUMU. Yose uyo wali na mtima wakujipereka, wizenge kwa FUMU na vyawanangwa ivi: golide, siliva, na mkuŵa,

⁶salu ya bululu, yichesamu na yiswesi, salu ya bafuta muweme, weya wa mbuzi,

⁷vikumba vyakunyuka vya mberere zanarume vyakuroŵeka na utoto uswesi, vikumba vya mbuzi, mathabwa gha makuni gha akesha,

⁸mafuta gha olive ghakukozgera nyali, vyakununkhiskira vya mafuta ghakuphakazgira, ndiposo na lubani,

⁹mawe gha onike na mawe ghanji ghakuzirwa ghakusoneka pa chakuvwara cha musofi cha efodi ndiposo na cha pa chifuŵa.”

¹⁰“Ŵanthu wose mukati mwinu awo ndi nkhwantha ŵize ndipo ŵapange vyose ivyo FUMU yalangula.

¹¹Ŵapange Chihema Chakupatulika, chisalu chakuchinga, nkhoroŵeko zakhe, mafuremu ghakhe, mitambiko yakhe, mizati yakhe, vikongera vyakhe,

¹²Bokosi la Phangano na michiko yakhe, chibenekerero chakuphepiskirapo, na salu yakuchinga bokosi,

¹³thebulu na michiko yakhe, viteŵetero vyakhe vyose, na Chingwa cha uŵapo wa Chiuta,

¹⁴chakuŵikapo nyali yakungweruskira pamoza na viteŵetero vyakhe, nyali zakhe, mafuta ghakukozgera nyali,

¹⁵jochero la vyakununkhira na michiko yakhe, mafuta ghakuphakazgira, vyakununkhira, salu yakuchinga pa muryango wa Chihema,

¹⁶jochero la sembe lakocherapo sembe zakocha na chakusonkherapo moto chakhe cha mkuŵa, michiko yakhe na viteŵetero vyakhe, beseni lakugezeramo na chikongera chakhe,

¹⁷salu zakuchingira baraza, pamoza na mizati yakhe na vikongera vyakhe ndiposo na salu zakuchingira pa muryango wa baraza,

¹⁸vikhomo vya Chihema na vya baraza, ndiposo na vingwa vyakhe,

¹⁹malaya ghakusoneka makora gha awo ŵakuteŵetera mu Chihema Chakupatulika, agho ndi malaya ghakupatulika gha musofi Aroni na gha ŵana ŵakhe kuti ŵanditeŵetere nga mbasofi.”

²⁰Penepapo mpingo wose wa ŵaIsraele ukawukapo panthazi pa Mozesi.

²¹Ndipo wose awo ŵakaŵa na mtima wakujipereka na wose awo ŵakakhumba kuchita, wakiza na vyakupereka kwa FUMU vya mlimo wose wa mu Chihema Chakukumaniranamo, na vyakupangira malaya ghakupatulika.

²²Ntheura wose ŵanarume na ŵanakazi awo ŵakaŵa na mtima wakujipereka ŵakiza na vitowelo vya mitundumitundu vya golide nga ndi ndewerewe, mphete, makhoza, majuda ndipo waliyose wakavipereka ku mlimo wa FUMU nga ndi sembe yakuzungunya.

²³Yose uyo wakaŵa na salu ya bululu, yichesamu, yiswesi, ya bafuta muweme, weya wa mbuzi, vikumba vya mberere zanarume na vya mbuzi vyakuroŵeka na vyakunyuka makora wakiza navyo.

²⁴Ŵanthu wose awo ŵakaŵa na siliva na mkuŵa ŵakiza navyo nga nchakupereka kwa FUMU. Ndipo yose uyo wakaŵa na mathabwa gha makuni gha akesha wakiza nagho ku mlimo wa FUMU.

²⁵Ŵanakazi wose awo ŵakaŵa nkhwantha pa vyakuruka ŵakizanga na vyakuruka vyawo nga ndi salu za bululu uchesamu, ziswesi na za bafuta muweme.

²⁶Ndipo ŵanakazi wose awo ŵakaŵa ŵakujipereka ndipo ŵakaŵa nkhwantha, ŵakarukanga salu za weya wa mbuzi.

²⁷Ŵarongozgi ŵakiza na mawe gha onike na mawe ghanyakhe ghakuzirwa ghakusonelera pa chakuvwara cha efodi na pa chakuvwara cha pa chifuŵa cha musofi.

²⁸Ŵakizaso na vyakununkhira, mafuta ghakukozgera nyali, mafuta ghakuphakazgira, na vyakununkhira vya sungu liweme.

²⁹ŴaIsraele wose ŵanarume na ŵanakazi awo ŵakaŵa na mtima wakujipereka na yose uyo wakakhumba kuchita, ŵakiza na chakupereka ku mlimo wa FUMU, ivyo Mozesi wakaŵalangula kuti wapereke.

³⁰Mozesi wakati ku ŵaIsraele, “Wonani FUMU yasora Bezalele mwana wa Uri, muzukuru wa Huru, wa fuko la Yuda.

³¹FUMU yamuzuzga na Mzimu wakhe ndipo yamupa vinjeru, umanyi na unkhwantha wose pa mlimo wa kuŵaja.

³²Iyo wakumanya kulemba nchito za mlimo wa golide siliva na mkuŵa.

³³Wakumanyaso kuzonga mawe ghakwimikapo kanthu na kuŵaja mathabwa mwa unkhwantha pa mlimo wakupambanapambana.

³⁴FUMU yamupa iyo na Oholiyabu mwana wa Ahisamaki wa fuko la Dani vinjeru vyakusambizga ŵanyawo unkhwantha wawo.

³⁵Iwo ŵali kupika unkhwantha wakuchita mlimo uliwose manyi ngwa kuzonga mawe, manyi ngwa kuroŵa, manyi ngwa kuruka salu za bululu, zichesamu, ziswesi na za bafuta muweme. Iwo ŵakumanya nadi kuchita milimo yakupambanapambana ya unkhwantha.”