Read new_tumbuka_bible Kufuma 36 Bible Online

Kufuma 36 - new_tumbuka_bible bible

Kufuma 36

¹“Sono Bezalele, Oholiyabu, na nkhwantha zinyakhe zose, izo FUMU yikaŵapa vinjeru na umanyi kuti zimanye umo zingachitira mlimo wose wakuzenge Chihema Chakupatulika, ŵakenera kuchita mlimo uwu nga ndi umo FUMU yikaŵalangulira.”

²Penepapo Mozesi wakachema Bezalele, Oholiyabu, na nkhwantha yose iyo FUMU yikayipa vinjeru na yose uyo wakaŵa wakujipereka kuchita mlimo uwu.

³Ndipo ŵakapokerera kufuma kwa Mozesi vyose ivyo ŵaIsraele ŵakapereka mwa wanangwa kuti ŵazengere Chihema Chakupatulika. Ndipo ŵaIsraele wakarutilira kwiza na vyakupereka vyawo kwa Mozesi mu mulenje uliwose.

⁴Ntheura nkhwantha zose izo zikachitanga mlimo wose wakuzenga Chihema Chakupatulika, zikareka mlimo wawo uwo zikachitanga,

⁵ndipo wakati kwa Mozesi, “Ŵanthu ŵakwiza na vinandi kuruska ivyo vikukhumbikwa pa mlimo uwo FUMU yikalangula kuti uchitike.”

⁶Ntheura Mozesi wakapereka languro ilo likapharazgika mu misasa yose lakuti, “Paŵavye mwanarume panji mwanakazi uyo warutizge kwiza na chakupereka cha mlimo wakuzenga Chihema Chakupatulika.” Penepapo ŵanthu ŵakarekeskeka kwiza na vyakupereka,

⁷pakuti ivyo ŵakaŵa navyo vikaŵa vyakukwanira kufiska mlimo, na kukharaposo.

⁸Ntheura nkhwantha zose mukati mwa awo ŵakaŵa pa mlimo wakuzenga wakapanga Chihema na salu zakuchingira khumi za bafuta zakurukika makora, zakusona na salu ya bululu, yichesamu, na yiswesi. Wakaziroŵa na vithuzithuzi vya ŵakerubi ŵakurukika mwa luso.

⁹Salu zose zikaŵa zakuyana waka, mu utali zikaŵa mamita 12 ndipo mu usani zikaŵa mamita ghaŵiri.

¹⁰Salu zinkhonde wakazibamphika pamoza kuŵa salu yimoza ndipo salu zinyakhe zinkhonde nazo wakazibamphikaso pamoza kuŵa salu yimoza.

¹¹Mu mphepete mwa salu yakudanga yakubamphikana yira, ku umaliro wakhe wakasonerapo tuvingwe twa chovyo twa bululu, ndipo ŵakachita ntheura pera na salu ya chiŵiri yakubamphikana yinyakhe yira.

¹²Wakasoneraposo tuvingwe twa chovyo 50 ku umaliro wa salu yakubamphikana yakudanga yira ndiposo tuvingwe twa chovyo 50 pa salu yakubamphikana ya chiŵiri yinyakhe yira. Tuvingwe twa chovyo tura tukathyana waka na twa pa salu yakudanga.

¹³Ŵakapangaso nkhoroŵeko za golide 50 izo zamkubamphika salu ziŵiri zira zakubamphikana. Ntheura Chihema chikazgoka kuŵa chimoza.

¹⁴Ŵakapangaso salu zakuchingira 11 za maweya gha mbuzi kuti ziŵe zakuchingira Chihema chira.

¹⁵Salu 11 zakuchinga izi zikaŵa zakuyana zose, mu utali mamita 13, ndipo mu usani mamita ghaŵiri.

¹⁶Ŵakazibamphika pamoza salu zinkhonde kuŵa salu yimoza ndipo salu zinkhonde na yimoza nazo ŵakazibamphika kuŵa salu yimoza.

¹⁷Ŵakasonererapo tuvingwe twa chovyo 50 ku umaliro wa salu yakubamphikana yakudanga yira mu mphepete mwakhe ndiposo tuvingwe twa chovyo 50 mu mphepete mwa salu yakubamphikana ya chiŵiri yinyakhe yira.

¹⁸Ŵakapanga nkhoroŵeko 50 za mkuŵa na kukoroŵeka mu tuvingwe twa chovyo kuti vibamphikane kuŵa Chihema chimoza.

¹⁹Ndipo ŵakapangaso vyakuchinga vinyakhe viŵiri vya Chihema Chakupatulika kufuma ku vikumba vyakunyuka makora vya mberere zanarume na vya mbuzi vyakuroŵeka na utoto uswesi ndipo wakaviŵika pachanya.

²⁰Ŵakapanga mafuremu ghakwimilira gha khuni la akesha gha Chihema.

²¹Utali wa furemu limoza ukaŵa mamita ghanayi pachanya masentimita 50 ndipo usani ukaŵa masentimita 50 pachanya masentimita 20.

²²Furemu lose la Chihema ukalikhome tumathabwa tuŵiri kuti tukorane pamoza. Mafuremu ghose ghara ukachite ntheura pera.

²³Kurwande lwa ku mwera lwa Chihema ŵakapangirako mafuremu 20.

²⁴Ndipo ŵakapangaso vikongera vya siliva 40 kuti mafuremu 20 ghara ghimepo. Pasi pa furemu lirilose pakaŵa vikongera vya siliva viŵiri vyakwimapo kuti vikore tumathabwa tuŵiri tura.

²⁵Ku dera linyakhe la ku mpoto kwa Chihema nako ŵakapangirako mafuremu 20,

²⁶na vikongera vya siliva 40, vikongera viŵiri pasi pa furemu limoza ndiposo vikongera vinyakhe viŵiri pasi pa furemu linyakhe.

²⁷Kunyuma kwa Chihema, ku dera la ku manjiliro gha dazi, upangireko mafuremu ghankhonde na limoza.

²⁸Ndipo kunyuma kwa Chihema kwenekura, pa ngodya ŵakapangirapo mafuremu ghaŵiri.

²⁹Mafuremu gha pa ngodya ghakapatukana musi mwakhe, kweni ghakabamphika pachanya pa mphete yakudanga. Ntheura ndimo ghamkuŵira mafuremu ghaŵiri gha pangodya ziŵiri.

³⁰Ntheura pakaŵa mafuremu ghankhonde na ghatatu na vikongera vya siliva vyakwimapo mafuremu 16, vikongera viŵiri pa furemu lirilose.

³¹Ŵakapangaso mitambiko ya khuni la akesha, yinkhonde ya mafuremu gha ku lwegha limoza la Chihema,

³²yinkhonde ya mafuremu gha ku lwegha linyakhe lwa Chihema ndipo yinkhonde ya mafuremu gha ku manjiliro, kunyuma kwa Chihema.

³³Ŵakapangaso mtambiko wa pakatikati uwo ukenda pa furemu kufuma ku uyambiro mpaka ku umaliro.

³⁴Ŵakaghaphaka mafuremu na golide ndipo ŵakaghanjizga mphete kuti yikore mitambiko, yeneiyo nayo wakayiphaka golide.

³⁵Ŵakapangaso chisalu chakuchinga chakukoroŵeka na salu ya bululu, yichesamu, yiswesi, na bafuta muweme. Ŵakachiroŵaso mwa luso na vithuzithuzi vya ŵakerubi.

³⁶Ŵakapangaso mizati yinayi ya khuni la akesha, kuti yikore salu yakuchinga yira. Mizati yira ŵakayiphaka golide na kuyinjizga nkhoroŵeko za golide. Mizati yira ŵakayipangira vikongera vyawo vya siliva vinayi.

³⁷Pa muryango wa Chihema Chakupatulika, ŵakapangirapo salu yakuchinga yakuroŵeka mwa unkhwantha na salu ya bululu, yichesamu, yiswesi, na bafuta muweme.

³⁸Ŵakapanga mizati yinkhonde iyo yikaŵa na nkhoroŵeko zakunjizgamo salu yira. Mitu ya mizati yira na mitambiko yakhe wakaviphaka golide, ndipo vikongera vyawo vinkhonde vikaŵa vya mkuŵa.