Read new_tumbuka_bible Kufuma 37 Bible Online

Kufuma 37 - new_tumbuka_bible bible

Kufuma 37

¹Bezalele wakapanga Bokosi la Phangano na mathabwa gha khuni la akesha. Utali wakhe likaŵa masentimita 110, usani wakhe likaŵa masentimita 66. Ndipo mukukwera likaŵa masentimita 66.

²Ŵakaliphaka na golide mwenecho mukati na kuwaro wuwo na kuliroŵa na kamuzere ka golide zingirizge.

³Wakapanga mphete zinayi za golide zakuyeghera bokosi ndipo wakazikakilira ku ngodya zakhe zinayi, ziŵiri ku dera limoza ndipo ziŵiri ku dera linyakhe.

⁴Wakapanga michiko yakuyeghera ya makuni gha akesha ndipo wakaghaphaka golide.

⁵Ndipo wakanjizga michiko yira mu mphete izo zikaŵa ku madera ghose ghaŵiri gha Bokosi la Phangano kuti yiŵe yakuyeghera.

⁶Wakapanga chibenekerero chakuphepiskirapo cha golide mwenecho. Utali wakhe chikaŵa masentimita 110. Usani wakhe chikaŵa masentimita 66.

⁷Wakapangaso ŵakerubi ŵa golide ŵaŵiri pakufura na nyondo, ndipo wakaŵakhomerera ku umaliro wa chibenekerero chakuphepiskirapo.

⁸Wakakhoma kerubi yumoza ku dera limoza, munyakhe ku dera linyakhe. Wakaŵapanga ŵakerubi ŵara ŵaŵiri mwakuti chikaŵa chimoza na chibenekerero chakuphepiskirapo.

⁹Ŵakerubi ŵara ŵakatandazgira mapapindo ghawo muchanya, kubenekerera chibenekerero chakuphepiskirapo chira ndipo ŵakarazgirana. Visko vyawo vikarazga ku chibenekerero chakuphepiskirapo.

¹⁰Wakapangaso thebulu la mathabwa gha makuni gha akesha. Utali wakhe likaŵa masentimita 90. Mu usani likaŵa masentimita 46 ndipo mu kukwera likaŵa masentimita 66.

¹¹Wakaliphaka na golide mwenecho, na kuliroŵa na kamuzere ka golide zingirizge.

¹²Ŵakalikhoma tumathabwa mu mphepete mwakhe. Usani wakhe ukaŵa masentimita ghankhonde na ghatatu ndipo wakaturoŵa na kamuzere ka golide zingirizge.

¹³Wakalipangiraso mphete za golide zinayi na kuzikakilira pa ngodya zinayi za malundi gha thebulu.

¹⁴Mphete izo ukaziŵike pafupi na tumathabwa twa mu mphepete kuŵa zakukhozga michiko pakuyeghera thebulu.

¹⁵Wakapanga michiko ya khuni la akesha kuti ŵayegherenge thebulu ndipo wakayiphaka golide.

¹⁶Wakapangaso viteŵetero vya golide mwenecho vya pa thebulu, nga ndi mbale na ŵadira ŵa vyakununkhira, ŵabakule, na nkhombo zakupungulira vinyo la sembe.

¹⁷Ŵakapanga chakuŵikapo nyali cha golide mwenecho. Chikongera na chithupi chakhe vikaŵa vyakufura na nyondo. Nkhombo zakhe, mitu yakhe, na maluŵa ghakhe vikaŵa vyakubamphikana pamoza.

¹⁸Mu mphepete chikaŵa na minthavi yinkhonde na umoza yikafuma mu chakuŵikapo nyali chira, minthavi yitatu ku dera limoza ndiposo yitatu ku dera linyakhe.

¹⁹Pa munthavi umoza pakaŵa nkhombo zitatu zakuŵa nga ndi maluŵa gha khuni la alimondi, mitu na maluŵa ghakhe. Pakaŵaso nkhombo zitatu zakuŵa nga ndi maluŵa gha khuni la alimondi pa munthavi unyakhe. Vikaŵa ntheura pa minthavi yose yinkhonde na umoza iyo yikafuma pa chakuŵikapo nyali chira.

²⁰Ndipo pa chakuŵikapo nyali pakaŵa nkhombo zinayi zakuŵa nga ndi maluŵa gha khuni la alimondi, mitu yawo ndiposo na maluŵa ghawo.

²¹Pakaŵa luŵa limoza musi mwa minthavi yiŵiri kufuma mu chakuŵikapo nyali, luŵa la chiŵiri musi mwa minthavi yiŵiri ndipo luŵa la chitatu, musi mwa minthavi yinkhonde na umoza na maluŵa ghawo ghatatu.

²²Mitu yawo na minthavi vikapangikira kumoza na chakuŵikapo nyali. Chose chikaŵa waka chimoza, cha golide mwenecho wakufura na nyondo.

²³Wakapangaso nyali zinkhonde na ziŵiri za pa chakuŵikapo nyali chira pamoza na mbano zakhe na vyakuyoreramo vyoto vyakhe. Vyose ivi vikaŵa vya golide mwenecho.

²⁴Kupanga chakuŵikapo nyali chira pamoza na viteŵetero vyakhe vyose ivi, wakatora makilogiramu gha uzitu wakukwana 35 gha golide mwenecho.

²⁵Wakapanga jochero la kocherapo vyakununkhira, ndipo liŵe la mathabwa gha khuni la akesha. Likaŵa lakuyana waka mu utali na usani wakhe. Mu utali likaŵa masentimita 45, ndipo mu usani namo ntheura pera masentimita 45. Mukukwera likaŵa masentimita 90. Masengwe ghakhe ghakaŵa ghakubatikana na jochero lira.

²⁶Wakaliphaka jochero lose lira na golide mwenecho pachanya pakhe, mu mphepete mwakhe zingirizge na masengwe ghakhe ndipo wakaliroŵa na kamuzere ka golide zingirizge.

²⁷Wakapanga mphete ziŵiri za golide na kuzibatika ku jochero musi mu kamuzere kakuroŵeka na golide ku malwegha ghakuthyana waka kuti zikorenge michiko yakuyeghera.

²⁸Wakapanga michiko ya khuni la akesha na kuyiphaka golide.

²⁹Wakapangaso mafuta ghakupatulika ghakuphakazgira na vyakununkhira vya sungu liweme, kwakuyana na mlimo wa nkhwantha pakusazga vyakununkhira.