Read new_tumbuka_bible Kufuma 38 Bible Online

Kufuma 38 - new_tumbuka_bible bible

Kufuma 38

¹Wakapanga jochero la sembe yakocha na mathabwa gha khuni la akesha. Mu utali likaŵa masentimita 230, ndipo mu usani likaŵa ntheura pera. Likaŵa lakuyana waka. Mukukwera likaŵa masentimita 130.

²Wakalipangira masengwe ghanayi mu ngodya zakhe zinayi gheneagho ghakabatikana na jochero lira mwakuti chikaŵa chimoza. Ndipo wakaliphaka na mkuŵa.

³Jochero wakalipangira viteŵetero vyose ivyo vikaŵa majonjo, mafosholo, mabakule, maforoko na vyakupalira moto. Viteŵetero vyakhe vyose wakavipanga vya mkuŵa.

⁴Jochero wakalipangira chakupembapo moto cha mkuŵa chakuŵa nga ndi sefa ndipo wakachiŵika musi mwa chipupa cha jochero kuti chiŵe pakatikati pa jochero.

⁵Wakapanga mphete zinayi za mkuŵa kuti zikorenge michiko ku ngodya zinayi za chakupembapo moto chira.

⁶Wakapanga michiko ya khuni la akesha na kuyiphaka mkuŵa,

⁷michiko yira wakayinjizga mu mphete zira izo zikaŵa mu mphepete mwa jochero kuŵa yakuyeghera. Jochero lira walipanga na mathabwa ndipo likaŵa la mphuwu.

⁸Wakapanga beseni lakugezeramo la mkuŵa na chikongera chakhe nacho chikaŵa cha mkuŵa kufuma ku magalasi gha ŵanakazi awo ŵakateŵetanga pa muryango wa Chihema Chakukumaniranamo.

⁹Wakapanga baraza la Chihema Chakupatulika na salu za bafuta muweme. Ku dera la ku mwera, salu zakhe zikaŵa mamita 46.

¹⁰Mizati yakhe yikaŵa 20 ndipo vikongera vyakhe vikaŵa 20 vya mkuŵa, kweni nkhoroŵeko zakhe na mitambiko ya mizati vikaŵa vya siliva.

¹¹Ku dera la ku mpoto kwa baraza la Chihema, salu zakhe zakuchinga baraza zikaŵa ntheura pera za bafuta muweme. Mu utali zikaŵa mamita 46. Likaŵa na mizati 20 na vikongera vyakhe 20 ivyo vikaŵa vya mkuŵa. Nkhoroŵeko zakhe na mitambiko yakhe ya mizati vikaŵa vya siliva.

¹²Ku dera la ku zambwe kwa baraza, salu zakuchinga zikaŵa mamita 23, mizati khumi na vikongera vyawo khumi. Nkhoroŵeko zakhe na mitambiko yakhe pa mizati vikaŵa vya siliva.

¹³Ku dera la ku vuma kwa baraza uko kukaŵa muryango nako kuŵe ntheura pera. Mu utali liŵe mamita 23.

¹⁴Salu zakuchinga ku lwegha lumoza la muryango zikaŵa mamita ghankhonde na ghaŵiri, mizati yawo yitatu na vikongera vyawo vitatu.

¹⁵Salu zakuchinga ku lwegha lunyakhe lwa muryango yikaŵa mamita ghankhonde na ghaŵiri. Mizati yawo yitatu na vikongera vyawo vitatu.

¹⁶Salu zose zakuchinga kuzingirizga baraza la Chihema zikaŵa za bafuta muweme pera.

¹⁷Vikongera vya mizati vyakhe vikaŵa vya mkuŵa. Nkhoroŵeko na michiko pa mizati vikaŵa vya siliva, ndipo mitu ya mizati yikaphakika siliva. Ntheura mizati yose ya baraza la Chihema likaŵa na mitambiko ya siliva.

¹⁸Salu yakuchinga ya pa muryango wa baraza yikaroŵeka bululu, yichesamu, yiswesi, na bafuta muweme, yakusoneka mwa unkhwantha. Utali wakhe yikaŵa mamita ghankhonde na ghanayi. Mukukwera yikaŵa mamita ghaŵiri pachanya masentimita 230 kuyana waka na salu zakuchinga za baraza.

¹⁹Mizati yawo yikaŵa yinayi ndipo vikongera vyawo vinayi vikaŵa vya mkuŵa. Nkhoroŵeko zawo na mitambiko yawo vikaŵa vya siliva ndipo mitu ya mizati yikaphakika siliva.

²⁰Vikhomo vya Chihema Chakupatulika na vikhomo vyose kuzingirizga baraza la Chihema vikaŵa vya mkuŵa.

²¹Uwu ndi unandi wa visulo vyakuteŵetera mu Chihema icho ndi Chihema cha Phangano ivyo vikaperekeka kwakuyana na languro la Mozesi. ŴaLevi ndiwo ŵakavipendanga pasi pa urongozgi wa Itamara mwana wa musofi Aroni.

²²Bezalele mwana wa Uri, muzukuru wa Huru, wa fuko la Yuda ndiyo wakachita vyose ivyo FUMU yikalangula Mozesi.

²³Oholiyabu mwana wa Ahisamaki wa fuko la Dani ndiyo wakavwirana nayo. Iyo wakaŵa nkhwantha mukuzonga mawe mukulemba nchito zakupambanapambana, mukuroŵa salu na uzi wa bululu, uchesamu, uswesi, na bafuta muweme.

²⁴Golide lose ilo likaperekeka kwa FUMU kuti ŵazengere Chihema Chakupatulika, likaŵa makilogiramu 1,000 kwakuyana na umo ŵakapimiranga mu Chihema Chakupatulika.

²⁵Ndipo siliva ilo likafumira ku mpingo ilo likapendeka likakwana makilogiramu 3,430 kwakuyana na umo ŵakapimiranga Chihema Chakupatulika.

²⁶Munthu yose wakapereka beka limoza ilo ndi ndarama za siliva nga ndi umo zikapimikiranga mu Chihema Chakupatulika. Ŵanthu wose awo ŵakaruta kuya kapendeka ŵakaŵa ŵanarume pera kwamba ŵa virimika 20 na ŵakujumphirapo, ŵakukwana 603,550.

²⁷Siliva wakukwana makilogiramu 3,430 wakaŵa na nchito yakusongorora vikongera vya Chihema Chakupatulika na vya salu yakuchinga. Ndipo vikongera 100 vikafuma ku makilogiramu 34. Kilogiramu limoza wakasongonoranga chikongera chimoza.

²⁸Ndipo makilogiramu 30 gha siliva, ndiyo ŵakapangira nkhoroŵeko za mizati, mitu ya mizati na mitambiko yawo, ndipo wakaviphaka siliva.

²⁹Mkuŵa uwo ŵanthu ŵakapereka kwa FUMU ukaŵa makilogiramu 2,425.

³⁰Ntheura na mkuŵa mweneuyu ŵakapangako vikongera vya pa muryango wa Chihema Chakukumaniranamo, jochero lakupembapo moto, na viteŵetero vyose vya pa jochero,

³¹vikongera kuzingirizga baraza ndiposo na vya pa muryango, vikhomo vyose vya Chihema kuzingirizga baraza.