Read new_tumbuka_bible Kufuma 39 Bible Online

Kufuma 39 - new_tumbuka_bible bible

Kufuma 39

¹Ntheura ŵakasona malaya gha ŵasofi ghakuteŵetera mu Chihema Chakupatulika kufuma mu vyakupereka vya salu ya bululu, yichesamu, na yiswesi. Ŵakamupangiraso Aroni malaya ghakupatulika nga ndi umo FUMU yikamulangulira Mozesi.

²Ŵakasona chakuvwara cha efodi na salu ya golide, ya bululu, yichesamu, yiswesi, na wa bafuta mwenecho.

³Ŵakadinya golide mpaka likaŵa lipepefu ndipo ŵakalidumula na kulinozga kuŵa tunthambo na kurukira pamoza na salu ya bululu, yichesamu, yiswesi, ndiposo na bafuta wakurukika makora, ndipo ŵakavichitira mwa unkhwantha chomene.

⁴Ŵakapanga tusalu twa pa viŵegha pa laya la efodi uto ŵakatubatika ku songo zakhe ziŵiri za laya lira.

⁵Lamba wakurukika mwa unkhwantha, kuti waŵe wakukakira ndipo wakarukika pamoza na laya la efodi, na uzi wa golide wa bululu, uchesamu, uswesi, na salu ya bafuta muweme yakurukika makora nga ndi umo FUMU yikalangulira Mozesi.

⁶Ŵakanozga mawe gha onike na kughaŵika pa chakukharikapo cha golide ndipo ŵakazonga nga ndi chidindo mazina gha ŵana Israele.

⁷Ndipo ŵakaghasonerera pa tusalu twa pa viŵegha twa laya la efodi kuti ghaŵe mawe gha chikumbusko ku ŵana ŵa Israele nga ndi umo FUMU yikalangulira Mozesi.

⁸Ŵakapanga mwa unkhwantha chakuvwara cha pa chifuŵa nga ndi umo wakapangira laya la efodi na uzi wa golide, wa bululu, uchesamu, uswesi, na bafuta muweme.

⁹Chakuvwara ichi chikaŵa chakuyana waka. Mu utali chikaŵa masentimita 22, ndipo mu usani ntheura pera masentimita 22, ndipo ŵakachipeteka paŵiri.

¹⁰Ndipo ŵakasonerapo mizere yinayi ya mawe ghakuzirwa. Pa mzere wakudanga ŵakasonerapo mawe gha rubi, topazi na gha garineti.

¹¹Pa mzere wa chiŵiri ŵakasononerapo mawe gha emeradi, safire, na gha dayimondi.

¹²Pa mzere wa chitatu ŵakasonerapo mawe gha yasinthi, agate, na gha ametisiti.

¹³Pa mzere wa chinayi wakasonerapo mawe gha berile, onike, na gha yasipara. Vyose ivi ŵakaviŵika pa chakukharikapo cha golide.

¹⁴Pakaŵa mawe 12, kwakuyana na mazina 12 gha fuko la Israele. Libwe lose wakalizonga zina nga ndi chidindo kwakuyana na fuko limoza la Israele.

¹⁵Chakuvwara cha pa chifuŵa ŵakachipangira maunyoro gha golide mwenecho ghakurukika mwa unkhwantha nga ndi tuvingwe.

¹⁶Ŵakapanga vyakukharikapo mawe vya golide viŵiri na mphete ziŵiri na kuzikakilira pa ngodya pachanya pa chakuvwara cha pa chifuŵa.

¹⁷Ndipo ŵakakakirira maunyoro ghakurukika ghaŵiri gha golide ghara ku mphete ziŵiri pa chakuvwara cha pa chifuŵa.

¹⁸Ndipo songo zinyakhe ziŵiri za maunyoro ghakurukika ŵakakakirira ku songo ziŵiri za chakuŵikapo mawe chira, ntheura ŵakakakirira panthazi pa tulamba tuŵiri twa pa viŵegha twa efodi.

¹⁹Ŵakapangaso mphete ziŵiri za golide na kuzikakilira pa ngodya ziŵiri musi mwa chakuvwara cha pa chifuŵa ku songo ya mukati pafupi na chakuvwara cha efodi.

²⁰Ŵakapangaso mphete zinyakhe ziŵiri za golide na kuzikakilira musi panthazi pa tulamba tuŵiri twa pa viŵegha pafupi na misono pachanya pa lamba wakusoneka mwa unkhwantha yura wa efodi.

²¹Ŵakakaka mphete za pa chakuvwara cha pa chifuŵa zira na mphete za chakuvwara cha pa efodi na vingwe vya bululu, mwakuti chakuvwara cha pa chifuŵa chikhare pachanya pa lamba wakurukika mwa unkhwantha wa efodi kuti chireke kufwatuka ku laya la efodi nga ndi umo FUMU yikalangulira Mozesi.

²²Ŵakapanga munjilira wa efodi uwo wose ukaŵa wakuruka na salu ya bululu.

²³Pakati pa munjilira ura pakaŵa chidorozi chakunjizgirapo mutu, ndipo mu mphepete mwa chidorozi chira wakabinyiramo kasalu zingirizge kuti munjilira ureke kuparuka.

²⁴Musi mwa munjilira ura zingirizge wakasonerapo vithuzithuzi vya vipambi vya magalagadeya ivyo ŵakavisona na salu ya bululu, yichesamu, yiswesi na bafuta muweme.

²⁵Wakapangaso mabelu gha golide mwenecho na kughakakilira pakatikati pa vithuzithuzi vya magalagadeya kuzingirizga umaliro wa munjilira wose.

²⁶Wakaŵika mwakudoŵa belu wa golide na chithuzithuzi cha chipambi cha magalagadeya, kuzingirizga musi mwa munjilira ura wakuteŵeterera, nga ndi umo FUMU yikalangulira Mozesi.

²⁷Aroni na ŵana ŵakhe ŵakaŵasonera malaya ghakurukika gha salu ya bafuta muweme,

²⁸chilemba, tuvisoti, na ŵakabunthu. Vyose ivi ŵakavisona na uzi wa bafuta wakurukika makora.

²⁹Ŵakapangaso lamba wa bafuta wakurukika makora na salu ya bululu, yichesamu, yiswesi, wakuroŵeka makora nga ndi umo FUMU yikalangulira Mozesi.

³⁰Ŵakapangaso kambale ka mphumphu yakupatulika ya golide mwenecho na kuzongapo mazgu nga ndi chidindo ghakuti, “Chakupatulikira FUMU.”

³¹Ntheura wakakakirira na kanthambo ka bululu pachanya pa chilemba nga ndi umo FUMU yikamulangulira Mozesi.

³²Penepapo mlimo wose wakuzenga Chihema Chakukumaniranamo ukamara. ŴaIsraele ŵakachita vyose kwakuyana na umo FUMU yikalangulira Mozesi.

³³Ndipo ŵakiza na Chihema Chakukumaniranamo chira kwa Mozesi, Chihema na viteŵetero vyakhe vyose vira na nkhoroŵeko zakhe, mafuremu ghakhe, mitambiko yakhe, mizati yakhe na vikongera vyakhe.

³⁴Ŵakizaso na salu zakuchinga za vikumba vyakunyuka vyakuroŵeka na utoto uswesi, vya mberere zanarume na vya mbuzi ndiposo salu yakuchingira,

³⁵Bokosi la Phangano na michiko yakhe na chibenekerero chakuphepiskirapo.

³⁶Ŵakizaso na thebulu na viteŵetero vyakhe vyose na Chingwa cha Uŵapo wa Chiuta,

³⁷chakuŵikapo nyali cha golide mwenecho na nyali zakhe pamoza na vikongera vya nyali, viteŵetero vyakhe ndiposo na mafuta ghakukozgera nyali.

³⁸Ndipo ŵakizaso na jochero la golide, mafuta ghakuphakazgira, vyakununkhira vya sungu liweme, salu yakuchinga pa muryango wa Chihema Chakukumaniranamo,

³⁹jochero la mkuŵa, chakusonkherapo moto chakhe cha mkuŵa, michiko yakhe na viteŵetero vyakhe vyose, beseni lakugezeramo na chikongera chakhe.

⁴⁰Ŵakizaso na salu yakuchingira baraza pamoza na mizati yakhe na vikongera vyakhe, salu yakuchingira pa muryango wa baraza, vikhomo na vingwe vya Chihema na viteŵetero vyakhe vyose vya milimo wakuzenga Chihema Chakukumaniranamo,

⁴¹malaya ghakusoneka makora gha awo ŵakuteŵetera mu malo ghakupatulika, malaya ghakupatulika gha musofi Aroni na gha ŵana ŵakhe kuti ŵateŵeterenge nga mbasofi.

⁴²Ntheura ŵaIsraele ŵakachita mlimo wose kwakuyana umo FUMU yikalangulira Mozesi.

⁴³Ndipo Mozesi wakawona mlimo wose uwo ŵaIsraele ŵakachita ndipo ukaŵa nga ndi umo FUMU yikalangulira. Ntheura Mozesi wakaŵatumbika.