Read new_tumbuka_bible Kufuma 4 Bible Online

Kufuma 4 - new_tumbuka_bible bible

Kufuma 4

¹Ntheura Mozesi wakazgora wakati, “Kweni ŵamkundigomezga chara panji kupulika mazgu ghane, pakuti ŵamkuyowoya kuti, ‘FUMU, kuti yili kukuwonekera iwe chara?’ ”

²FUMU yikati kwa iyo, “Kasi icho chili mu woko nchivichi?” Iyo wakati, “Ndi ndodo.”

³FUMU yikati, “Yiponye pasi.” Ntheura Mozesi wakayiponya pasi ndipo yikazgoka njoka, na kuyichimbira.

⁴Kweni FUMU yikati kwa Mozesi, “Nyoroska woko lako na kuyikora ku muchira.” Ntheura wakanyoroska woko lakhe na kuyikora, ndipo yikazgoka ndodo mu woko lakhe.

⁵FUMU yikati, “Ukachite vyeneivi ndipo ŵamkugomezga kuti FUMU, Chiuta wa ŵawiskewokuru, Chiuta wa Abrahamu, wa Yisake na wa Yakhobe wangukuwonekera iwe.”

⁶FUMU yikatiso kwa Mozesi, “Njizga woko lako mu munjilira wako. Ntheura Mozesi wakanjizga woko lakhe mu munjilira wakhe ndipo, wakati walifumiska, woko likaŵa na vyoni vyakutuŵa nga ndi thonje.”

⁷Penepapo FUMU yikati, “Wezgera woko lako mu munjilira wako.” Mozesi wakaliwezgera woko lakhe mu munjilira wakhe, ndipo wakati walifumiska likawereramo na kuŵa nga ndi thupi lose linyakhe.

⁸FUMU yikati, “Usange ŵamkureka kukugomezga nanga nkhupulikira ku chimanyikwiro chakudanga chira, ŵamkugomezgera ku chimanyikwiro chinyakhe cha chiŵiri.

⁹Kweni usange ŵamkureka kukugomezga pa vimanyikwiro viŵiri ivi, nanga nkhupulikira ivyo wamkuyowoya ukaneghe maji kufuma ku mronga wa Nayelo na kughathira pasi pomizo. Ndipo maji agho ghamkuzgoka ndopa.”

¹⁰Kweni Mozesi wakati kwa FUMU, “Mwe FUMU, ndaŵeya, ine kuti nkhumanya kuyowoya makora chara kufuma papo kale nanga ndi apo mwambira kuyowoya na muteŵeti winu. Lulimi lwane nduzitu ndipo ndine wa chikwikwi.”

¹¹FUMU yikati kwa iyo, “Kasi ndi njani uyo wali kumupa munthu mlomo? Kasi ndi njani wakumuzgora munthu kuŵa mbuwu panji wakumangwa makutu, panji kuti walaŵiske ndiposo panji kuti waŵe wa chiburumutira? Asi ndine nda FUMU?

¹²Ntheura sono rutanga. Ine ndamkukovwira kuyowoya ndipo ndamkukusambizga icho ukwenera kuyowoya.”

¹³Mozesi wakati kwa Fumu, “Mwe Fumu yane, nkhumuŵeyani tumani munthu munyakhe kuti wachite ichi.”

¹⁴Penepapo ukari wa FUMU ukagolera pa Mozesi ndipo yikati, “Asi waliko Aroni, muLevi, uyo ndi mukuru wako. Nkhumanya kuti iyo wangayowoya makora. Ndipo sono wali mu nthowa wakwiza kuti wakumane nawe. Para wizamkuwona iwe, wizamukondwa chomene.

¹⁵Ukayowoye nayo na kumuphalira mazgu agho wakwenera kuyowoya. Ine ndamkumovwirani mose kuyowoya na kumusambizgani icho mukwenera kuchita.

¹⁶Iyo ndiyo wamkukuyowoyera ku ŵanthu ndipo chiti chiŵenge nga ndi kuti iyo ndi mlomo wako ndipo iwe uti uŵenge kwa iyo nga Chiuta.

¹⁷Kweni iwe utore ndodo yako uyo yili mu woko lako ndipo na iyo ukachitenge vimanyikwiro.”

¹⁸Ntheura Mozesi wakawerera kwa wiskevyara Yeturo ndipo wakati kwa iyo, “Nkhumuŵeyani mundizomerezge kuti ndiwerere ku Eguputo, ku ŵabali ŵane kuti nkhaŵawone usange ŵachali ŵamoyo.” Ndipo Yeturo wakati kwa Mozesi, “Rutanga mu mutende.”

¹⁹FUMU yikati kwa Mozesi apo wakaŵa wachali ku Midiyani, “Werera ku Eguputo pakuti wose awo wakakhumbanga kukukoma ŵali kufwa.”

²⁰Ntheura Mozesi wakatora muwoli wakhe na ŵana ŵakhe ŵanarume, wakaŵakwezga pa mbunda na kuwerera ku Eguputo. Ndipo wakayegha ndodo ya Chiuta mu woko lakhe.

²¹FUMU yikatiso kwa Mozesi, “Para wawerera ku Eguputo, ukawoneseske kuti ukuchita vyaminthondwe vyose ivyo ndaviŵika mu mawoko ghako panthazi pa Faro. Kweni ine nditi ndinonofye mtima wakhe, mwakuti wareke kuzomerezga ŵanthu ŵane kuruta.

²²Ndipo iwe wamkuti kwa Faro, ‘FUMU yikuti: Israele ndi mwana wane wa uŵere.’

²³Ndipo nkhuti kwa iwe umuzomerezge mwana wane kuti warute kuya kandilambira. Usange ukukana kuti warute, nditi ndikome mwana wako wa uŵere.”

²⁴Pa malo ghakugonapo apo wakaŵa pa ulendo ku Eguputo, FUMU yikakumana nayo Mozesi ndipo yikakhumba kumukoma.

²⁵Kweni Zipora muwoli wakhe wakatora libwe lakuthwa na kukotorera mwana wakhe mwanarume, ndipo chikumba icho wakakotorako wakakhwaska nacho mavwaro gha Mozesi na kuti, “Nadi, iwe ndiwe mufumu wane wa ndopa.”

²⁶Ntheura FUMU yikareka kumukoma Mozesi. Ndipo muwoli wakhe wakati, “Iwe ndiwe mufumu wane wa ndopa chifukwa cha ukotori.”

²⁷Ndipo FUMU yikati kwa Aroni, “Ruta ku mapopa ukakumane na Mozesi.” Aroni wakaruta ndipo wakakumana nayo pa phiri la Chiuta na kumuvumbatira.

²⁸Mozesi wakamwandulira Aroni mazgu ghose gha FUMU gheneagho yikamutuma ndiposo na vimanyikwiro vyose ivyo yikamulangula kuchita.

²⁹Penepapo Mozesi na Aroni ŵakaruta ku Eguputo ndipo ŵakawunganya pamoza ŵarara wose ŵa ŵaIsraele.

³⁰Aroni wakayowoya mazgu ghose agho FUMU yikayowoya kwa Mozesi ndipo wakachitaso vimanyikwiro panthazi pa ŵanthu.

³¹Ntheura ŵakagomezga. Ndipo ŵakapulika kuti FUMU yaŵachezgera ŵaIsraele, na kuti yawona visuzgo vyawo. Ntheura ŵakasindama na kuyilambira.