Read new_tumbuka_bible Kufuma 40 Bible Online

Kufuma 40 - new_tumbuka_bible bible

Kufuma 40

¹Ntheura FUMU yikati kwa Mozesi,

²“Pa zuŵa lakudanga la mwezi wakudanga, ukimike Chihema Chakukumaniranamo.

³Ukaŵikemo Bokosi la Phangano na kuŵika salu yakuchingira bokosi.

⁴Ukanjizgemo thebulu na kuŵikamo mu ndondomeko vyose ivyo vikukhumbikwa kuŵikamo. Ndiposo ukanjizgemo chakuŵikapo nyali na nyali zakhe.

⁵Uŵikemo jochero la golide lakocherapo vyakununkhira panthazi pa Bokosi la Phangano ndipo ujarepo pa muryango wa Chihema Chakukumaniranamo na salu yakuchingira.

⁶Uŵike jochero la sembe yakocha pafupi na muryango wa Chihema Chakukumaniranamo.

⁷Uŵike beseni lakugezeramo pakati pa jochero na Chihema Chakukumaniranamo ndipo uthiremo maji mukati mwakhe.

⁸Ukapange baraza kuzingirizga Chihema Chakukumaniranamo na kupayika salu yakuchinga pa muryango wa baraza.”

⁹“Utore mafuta ghakuphakazgira ghara na kuphakazga Chihema Chakukumaniranamo na vyose ivyo vili mwenemumo kuti chipatulike pamoza na viteŵetero vyakhe vyose ndipo chiti chiŵenge chakupatulika.

¹⁰Ndipo uphakazge mafuta jochero la sembe yakocha ndiposo na viteŵetero vyakhe vyose. Ulipatuliske Jochero ndipo liti liŵenge lakupatulika nkhanira.

¹¹Beseni lakugezeramo na vyakwimapo vyako ukaviphakazge mafuta kuti viŵe vyakupatulika.

¹²“Wize nayo Aroni na ŵana ŵakhe ku muryango wa Chihema Chakukumaniranamo ndipo uŵageziske na maji penepara.

¹³Ukamuvwarike Aroni malaya ghakupatulika ghara, na kumuphakazga mafuta ndipo ukamupatuliske kuti wanditeŵetere nga ndi musofi.

¹⁴Ŵana ŵakhe nawoso wize nawo na kuŵavwarika malaya.

¹⁵Ndipo uŵaphakazge mafuta nga ndi umo waphakazgira wiskewo mwakuti ŵanditeŵetere ine nga mbasofi. Kuphakazgika kwawo kwamkuŵanjizga mu usofi wakurutilira mu miwiro yawo yose.”

¹⁶Mozesi wakachita vyose kwakuyana na umo FUMU yikamulangulira.

¹⁷Ntheura Chihema Chakukumaniranamo chikimikika pa zuŵa lakudanga la mwezi wakudanga mu chirimika cha chiŵiri.

¹⁸Pakwimika Chihema chira, Mozesi wakaŵika pasi vikongera vyakhe, wakimika mafuremu ghakhe, wakanjizga mitambiko yakhe, na kwimika mizati yakhe.

¹⁹Penepapo ŵakatandaulira chidiko pachanya pa Chihema Chakukumaniranamo chira na kuŵika chibenekerero pachanya pa Chihema nga ndi umo FUMU yikalangulira.

²⁰Wakatora mawe gha marango na kughaŵika mukati mwa Bokosi la Phangano na kunjizga michiko ku bokosi ndipo wakaŵika chibenekerero chakuphepiskirapo pachanya pa bokosi lira.

²¹Ndipo wakiza na Bokosi la Phangano mu Chihema Chakukumaniranamo na kupayika salu yakuchingira kuti yinchingenge bokosi lira nga ndi umo FUMU yikalangulira.

²²Wakaŵikamo thebulu mu Chihema Chakukumaniranamo ku dera la ku mpoto kuwaro kwa chisalu chakuchinga.

²³Ndipo pachanya pa thebulu lira wakandandika vingwa panthazi pa FUMU nga ndi umo FUMU yikalangulira Mozesi.

²⁴Wakaŵikamo chakuŵikapo nyali mu Chihema Chakukumaniranamo kuthyana na thebulu ku dera la ku mwera la Chihema.

²⁵Ntheura wakakozga nyali panthazi pa FUMU nga ndi umo FUMU yikalangulira Mozesi.

²⁶Wakaŵikamo jochero la golide mu Chihema Chakukumaniranamo panthazi pa chisalu chakuchinga,

²⁷na kocherapo vyakununkhira vya sungu liweme nga ndi umo FUMU yikalangulira.

²⁸Pa muryango wa Chihema, wakapayikapo chisalu chakuchinga.

²⁹Ndipo wakaŵikapo jochero la sembe yakocha pa muryango wa Chihema Chakukumaniranamo na kupereka sembe yakocha na sembe ya ufu nga ndi umo FUMU yikamulangulira iyo.

³⁰Wakaŵikamo beseni lakugezeramo pakati pa Chihema Chakukumaniranamo na jochero ndipo wakathiramo maji.

³¹Ndipo Mozesi, Aroni na ŵana ŵakhe ŵakagezerangamo mawoko na malundi ghawo.

³²Ŵakagezangamo para ŵakanjiranga mu Chihema Chakukumaniranamo na para ŵakasendereranga ku jochero, nga ndi umo FUMU yikalangulira Mozesi.

³³Pa umaliro wakimika baraza kuzingirizga Chihema Chakukumaniranamo na jochero, ndipo pa muryango wa baraza lira wakapayikapo salu yakuchinga. Umo ndimo Mozesi wakamalira mlimo wakhe wose.

³⁴Penepapo chibingu chikabenekerera Chihema Chakukumaniranamo ndipo uchindami wa FUMU ukazura mu Chihema Chakukumaniranamo.

³⁵Mozesi kuti wakamanya kunjira mu Chihema Chakukumaniranamo chara chifukwa chibingu chikakhara penepapo ndipo uchindami wa FUMU ukazura mu Chihema chira.

³⁶Mu maulendo ghawo ghose, nyengo yose para chibingu chawuskikapo kufuma pa Chihema Chakukumaniranamo, penepapo ndipo ŵaIsraele ŵakawukanga na kuruta kunthazi.

³⁷Kweni usange chibingu chikawuskikapo chara, kuti ŵakawukanga na kuruta kunthazi chara, kufikira pa zuŵa ilo chikawuskikangapo.

³⁸Ntheura chibingu cha FUMU chikaŵanga pachanya pa Chihema Chakukumaniranamo chira na muhanya ndipo na usiku moto ukaŵanga mu chibingu ndipo ŵaIsraele wose ŵakawuwonanga.