Read new_tumbuka_bible Kufuma 6 Bible Online

Kufuma 6 - new_tumbuka_bible bible

Kufuma 6

¹Kweni FUMU Chiuta wakati kwa Mozesi, “Sono uti uwone icho nditi ndichite kwa Faro. Pakuti na woko lane lankhongono, wati wazomerezge ŵanthu aŵa kuti ŵarute. Inya, na woko lane lankhongono wati waŵachimbizge mu charu chakhe.”

²Chiuta wakatiso kwa Mozesi, “Ine ndine FUMU,

³nkhawoneka kwa Abrahamu, kwa Yisake na kwa Yakhobe nga ndi Chiuta Mwenenkhongono zose kweni na zina lane lakuti FUMU kuti nkhajivumbula kwa iwo chara.

⁴Ndipo nkhachita phangano na iwo kuti ndiŵapenge charu cha Kanani uko ŵakakhara nga mbalendo.

⁵Ndipo ndapulika kutampha kwa ŵaIsraele ŵeneawo ŵaEguputo ŵaŵazgora ŵazga, ndipo ndakumbuka phangano lane.

⁶Ntheura yowoya ku ŵaIsraele, ‘Ine ndine FUMU ndipo ndimufumyanimo mu milimo yinonono ya ŵaEguputo. Nditi ndimuthaskani ku uzga wa ŵaEguputo na kumuwombolani na woko lakutambazuka ndiposo na milimo yikuru ya weruzgi.

⁷Nditi ndimutorani imwe nga mbanthu ŵane, ndipo ine ndiŵenge Chiuta winu. Penepapo muti mumanye kuti ine ndine FUMU, Chiuta winu uyo wamufumiskaniko ku milimo yinonono ya ŵaEguputo.

⁸Ndipo nditi ndimutorerani ku charu icho nkharapa kuti ndiperekenge kwa Abrahamu, kwa Yisake na kwa Yakhobe. Nditi ndimupaninge charu kuti chiŵe chinu na chinu. Ine ndine FUMU.’ ”

⁹Mozesi wakaphara ichi ku ŵaIsraele, kweni ŵakamupulika chara chifukwa ŵakaŵa ŵakugongowa mu mtima ndiposo na uzga wa nkhaza.

¹⁰Ntheura FUMU yikati kwa Mozesi,

¹¹“Ruta ukamuphalire Faro, karonga wa Eguputo kuti wazomerezge ŵaIsraele wafume mu charu chakhe.”

¹²Kweni Mozesi wakati kwa FUMU, “ŴaIsraele ŵandanipulikire ine, sono kasi Faro wangandipulikira uli ine pakuti ndine wachikwikwi?”

¹³Penepapo FUMU yikayowoya kwa Mozesi na kwa Aroni kuti ŵayowoye ku ŵaIsraele na kwa Faro. FUMU yikalangula Mozesi na Aroni kuti ŵafumiske ŵaIsraele mu charu cha Eguputo.

¹⁴Ŵarara ŵa mbumba za ŵawiskewokuru ndi aŵa: Ŵana ŵanarume ŵa Rubeni, mwana wa uŵere wa Yakhobe, ŵakaŵa aŵa: Hanoki, Palu, Hezironi na Karimi. Aŵa ndiwo mba mbumba ya Rubeni.

¹⁵Ŵana ŵa Simiyoni ndi aŵa: Yemuyele, Yamini, Ohadi, Yakini, Zohara, na Shawulu uyo wakababika ku mwanakazi wa ku Kanani. Aŵa ndiwo ŵa mu mbumba ya Simiyoni.

¹⁶Mazina gha ŵana ŵanarume ŵa Levi kwakuyana na miwiro wawo ndi iyi, Gerishoni, Kohati, na Merari. Virimika vya umoyo wa Levi vikaŵa 137.

¹⁷Ŵana ŵanarume ŵa Gerishoni kwakuyana na mbumba zawo ndi aŵa; Libini na Shimeyi.

¹⁸Ŵana ŵa Kohati ndi aŵa; Amuramu, Izihara, Heburoni, na Uziyele. Virimika vya umoyo wa Kohati vikaŵa 133.

¹⁹Ŵana ŵa Merari ndi aŵa: Mali na Mushi. Izi ndizo mbumba za Levi kwakuyana na miwiro yawo.

²⁰Amuramu wakatora Yokebedi mudumbu wa ŵawiske kuŵa muwoli wakhe ndipo wakababa Aroni na Mozesi. Virimika vya umoyo wa Amuramu vikaŵa 107.

²¹Ŵana ŵanarume ŵa Izihara ndi aŵa; Kora, Nefegi na Zikiri.

²²Ŵana ŵanarume ŵa Uziyele ndi aŵa, Mishayele, Elizafani, na Sithiri.

²³Aroni wakatora Elisheba, mwana mwanakazi wa Aminadabu ndiposo mudumbu wa Nashoni kuŵa muwoli wakhe ndipo wakababa Nadabu, Abihu, Eleyazara, na Itamara.

²⁴Ŵana ŵanarume ŵa Kora ndi aŵa: Asiri, Elikana, na Abiyasafu. Izi ndizo mbumba za Kora.

²⁵Eleyazara mwana wa Aroni wakatora yumoza wa ŵana ŵanakazi ŵa Putiyele kuŵa muwoli wakhe uyo wakambira Finehasi. Aŵa ndiwo ŵararaŵarara ŵa ŵaLevi kwakuyana na mbumba na mbumba.

²⁶Nkhwa Aroni na kwa Mozesi uko FUMU yikati, “Fumiskani ŵaIsraele kufuma mu Eguputo kwakuyana na mafuko ghawo.”

²⁷Ŵakaŵa Mozesi na Aroni ŵeneaŵa awo ŵakayowoya kwa Faro karonga wa Eguputo kuti wafumiske ŵaIsraele mu Eguputo.

²⁸Pa zuŵa lira FUMU yikati kwa Mozesi mu charu cha Eguputo,

²⁹“Ine ndine FUMU. Muphalire Faro, karonga wa ku Eguputo, vyose ivyo nkhukuphalira.”

³⁰Kweni Mozesi wakati kwa FUMU, “Ine ndine wachikwikwi kasi Faro wangandipulika uli?”