Read new_tumbuka_bible Kufuma 7 Bible Online

Kufuma 7 - new_tumbuka_bible bible

Kufuma 7

¹Ntheura FUMU yikati kwa Mozesi, “Wona nditi ndikuzgore iwe kuŵa nga ndi Chiuta, kwa Faro ndipo Aroni mukuru wako wati waŵenge nga ndi nchimi yako.

²Iwe ukwenera kumuphalira Aroni mukuru wako vyose ivyo ndili kukulangula, ndipo iyo wakwenera kumuphalira Faro kuti wazomerezge ŵaIsraele ŵafume mu charu chakhe.

³Kweni ine nditi ndinonofye mtima wa Faro, ndipo nanga ndandaniske vimanyikwiro na vyakuzizwiska vyane mu charu cha Eguputo,

⁴Faro kuti wati wapulikire imwe chara. Ntheura nditi ndiŵalange ŵaEguputo na woko lane, na kufumiska mafuko gha ŵanthu ŵane ŵaIsraele na milimo yikuru ya weruzgi.

⁵Ndipo ŵaEguputo ŵati ŵamanye kuti ine ndine FUMU, para ndanyoroskera woko lane pa iwo na kuŵafumiska ŵaIsraele mukati mwawo.”

⁶Mozesi na Aroni wakachita ntheura nga ndi umo FUMU yikaŵalangulira.

⁷Mozesi wakaŵa na virimika 80, ndipo Aroni wakaŵa na virimika 83 apo wakayowoya kwa Faro.

⁸FUMU yikati kwa Mozesi na kwa Aroni,

⁹“Para Faro wakuti kwa imwe, ‘Jirongorani mwaŵene pakuchita cha minthondwe.’ Ntheura iwe uti kwa Aroni, ‘Tora ndodo yako ndipo uyiponye pasi panthazi pa Faro ndipo yiti yizgoke njoka.’ ”

¹⁰Ntheura Mozesi na Aroni ŵakaruta kwa Faro ndipo ŵakachita nga ndi umo FUMU yikaŵalangulira. Aroni wakaponya ndodo yakhe panthazi pa Faro na pa ŵateŵeti ŵakhe ndipo yikazgoka njoka.

¹¹Ntheura Faro wakachema ŵanthu ŵamahara, ŵawukwi na ŵamayere ŵa ku Eguputo ŵakachita ntheura pera na maula ghawo.

¹²Sono waliyose wakaponya ndodo yakhe pasi ndipo yikazgoka njoka. Kweni ndodo ya Aroni yikamirimitizga ndodo zawo.

¹³Ndipouli mtima wa Faro ukanonofyeka ndipo kuti wakaŵapulikira chara, nga ndi umo FUMU yikayowoyera.

¹⁴Ntheura FUMU yikati kwa Mozesi, “Mtima wa Faro wanonofyeka, ndipo wakukana kuzomera kuti ŵanthu ŵarute.

¹⁵Ruta kwa Faro na mulenje apo wakuruta ku maji. Ukamulindilire mu mphepete mwa mronga wa Nayelo kuti ukakumane nayo, ndipo uyeghe mu woko lako ndodo yeneiyo yikazgoka njoka.

¹⁶Ndipo ukati kwa iyo kuti FUMU, Chiuta wa ŵaHebere wandituma kwa imwe ndipo wati, ‘Zomerezga ŵanthu ŵane ŵarute kuya kandilambira mu mapopa. Kweni wona mpaka sono undapulikire.’

¹⁷Ntheura FUMU yikuti, ‘Na cheneichi, uti umanye kuti ine ndine FUMU. Nditi nditimbe maji gha Nayelo na ndodo iyo yili mu woko lane ndipo maji ghati ghazgoke ndopa.

¹⁸Somba izo zili mu mronga ziti zifwenge, ndipo mronga uti ununkhenge. ŴaEguputo ŵati ŵachite mseru para ŵakukhumba kumwa maji gha mu mronga.’ ”

¹⁹FUMU yikati kwa Mozesi, “Yowoya kwa Aroni uti, ‘Tora ndodo yako ndipo nyoroskera woko lako pa maji gha mu Eguputo, pa mironga yawo, pa mifwerenje yawo, pa viziŵa vyawo, na pa visimi vyawo vyose vya maji ndipo ghati ghazgoke ndopa. Ndopa zamkuŵa posepose mu charu cha Eguputo mu zingwembe na mu viŵiya vya mawe.’ ”

²⁰Mozesi na Aroni ŵakachita nga ndi umo FUMU yikaŵalangulira. Aroni wakawuska ndodo yakhe pa maso pa Faro na ŵateŵeti ŵakhe ndipo wakatimba maji gha mronga wa Nayelo, ndipo maji ghose ghakazgoka ndopa.

²¹Somba za mu mronga zikafwa, ndipo mronga ukanunkha mwakuti ŵaEguputo kuti ŵakamwaso maji gha mu mronga chara. Ndopa zikaŵa posepose mu charu cha Eguputo.

²²Ndipo ŵamayere ŵa mu Eguputo ŵakachita ntheura pera na maula ghawo. Ntheura mtima wa Faro ukanonofyeka ndipo wakapulikira Mozesi na Aroni chara, nga ndi umo FUMU yikayowoyera.

²³Penepapo Faro wakazgoka, kuya kanjira mu nyumba yakhe. Ndipo ichi nacho kuti wakachiŵikako na ku mtima chara.

²⁴Ndipo ŵaEguputo wose ŵakanjira apa na apa mphepete mwa mronga wa Nayelo kupenja maji yakumwa pakuti ŵakamanya kumwa maji gha mu mronga chara.

²⁵Pajumphapo mazuŵa ghankhonde na ghaŵiri FUMU yikati yatimba mronga wa Nayelo.