Read new_tumbuka_bible Kufuma 8 Bible Online

Kufuma 8 - new_tumbuka_bible bible

Kufuma 8

¹Ntheura FUMU yikati kwa Mozesi, “Ruta kwa Faro ndipo ukati kwa iyo, ‘FUMU yikuti: Uŵazomerezge ŵanthu ŵane kuti ŵarute mwakuti ŵakandilambire.

²Usange ukukana kuŵazomerezga kuti ŵarute, nditi ndipereke chilengo cha ŵachule mu charu chako chose.

³Mronga wa Nayelo uti uzure na ŵachule, ŵeneawo ŵati ŵakwere na kunjira mu nyumba yako mpaka ku chipinda icho ukugona na pa chitara chako wuwo, ndiposo mu nyumba za ŵateŵeti ŵako na ŵanthu ŵako, mu Mauvuni ghako ghakuphikiramo na mu mbale zako zakukonkheramo chingwa.

⁴Ŵachule ŵati ŵakwere pa iwe na pa ŵanthu ŵako ndiposo na pa ŵateŵeti ŵako wose.’ ”

⁵Ndipo FUMU yikati kwa Mozesi, “Yowoya kwa Aroni, uti kwa iyo, ‘Nyoroskera woko na ndodo yako pa mironga pa mifwerenje, na pa viziŵa ndipo ŵachule ŵati ŵakwere mu charu cha Eguputo.’ ”

⁶Ntheura Aroni wakanyoroskera woko lakhe pa maji gha mu Eguputo ndipo ŵachule ŵakakwera na kuŵa posepose mu charu.

⁷Kweni ŵamayere nawo ŵakachita ntheura pera na maula ghawo ndipo nawo wakachita kuti ŵachule ŵaŵemo mu charu cha Eguputo.

⁸Faro wakachema Mozesi na Aroni ndipo wakati kwa iwo, “Mundiŵeyerere kwa FUMU kuti yifumyeko ŵachule kwa ine na ku ŵanthu ŵane ndipo nditi ndizomerezge kuti ŵanthu ŵarute kuya kapereka sembe kwa FUMU.”

⁹Mozesi wakati kwa Faro, “Nkhupereka nchindi kwa imwe, kuti imwe ndimwe mulangure apo ine ndingamuŵeyerani imwe, ŵateŵeti ŵinu, na ŵanthu ŵinu kuti ŵachule ŵafumeko kwa imwe na ku nyumba zinu, kweni ŵakhare ŵa mronga wa Nayelo pera.”

¹⁰Faro wakati, “Na machero.” Penepapo Mozesi wakati, “Kuŵe ntheura nga ndi umo mwayowoyera mwakuti mumanye kuti kulije munyakhe wakuŵa nga ndi FUMU, Chiuta withu.

¹¹Ŵachule ŵati ŵafumeko kwa imwe na ku nyumba zinu, ku ŵateŵeti ŵinu na ku ŵanthu ŵinu, kweni awo wakharengeko mba ku mronga wa Nayelo pera.”

¹²Ntheura Mozesi na Aroni wakafumako kwa Faro, ndipo Mozesi wakaromba kwa FUMU na za ŵachule nga ndi umo wakazomerezgerana na Faro.

¹³Ndipo FUMU yikachita nga ndi umo Mozesi wakarombera. Ŵachule awo ŵakaŵa mu zinyumba, mu mabaraza, na mu minda ŵakafwa.

¹⁴Ndipo ŵakaŵawunjika pamoza mu viwuruviwuru. Ntheura charu chikanunkha.

¹⁵Kweni para Faro wakawona kuti wapumuzgikapo, wakanonofya mtima wakhe ndipo wakapulikira Mozesi na Aroni chara nga ndi umo FUMU yikayowoyera.

¹⁶Ntheura FUMU yikati kwa Mozesi, “Yowoya kwa Aroni uti kwa iyo, ‘Nyoroska ndodo yako, utimbe pa charu kuti fuvu lakhe lizgoke nthata mu charu chose cha Eguputo.’ ”

¹⁷Ndipo ŵakachita ntheura. Aroni wakanyoroska woko lakhe na ndodo yakhe na kutimba fuvu la charu. Penepapo fuvu likazgoka nthata ndipo zikiza pa ŵanthu na pa vyakuŵeta. Fuvu lose la mu Eguputo likazgoka nthata charu chose.

¹⁸Ndipo ŵamayere ŵakayezga na maula ghawo kuti ŵawoneske nthata, kweni ŵakatondeka. Ntheura pakaŵa nthata pa ŵanthu na pa vyakuŵeta.

¹⁹Ŵamayere ŵakati kwa Faro, “Ili ndi woko la FUMU” Kweni mtima wa Faro ukanonofyeka ndipo kuti wakaŵapulikira chara nga ndi umo FUMU yikayowoyera.

²⁰Ntheura FUMU yikati kwa Mozesi, “Wuka na mulenjelenje chomene ukakumane na Faro para wakuruta ku maji ndipo ukati kwa iyo, ‘FUMU yikuti, “Zomerezga ŵanthu ŵane kuti ŵarute mwakuti ŵakalambire.”

²¹Ndipo usange wareka kuŵazomerezga ŵanthu ŵane kuti ŵarute, nditi nditume milembwera ya vimembe pa iwe, pa ŵateŵeti ŵako, pa ŵanthu ŵako, na mu nyumba zako. Nyumba za ŵaEguputo zamkuzura na milemwera ya vimembe ndiposo na pa malo pose apo iwo ŵakukhara.

²²Kweni pa zuŵa ilo ndizamkupatula chigaŵa cha Gosheni uko ŵakukhara ŵanthu ŵane kweneuko kuti kwamkuŵako milembwera ya vimembe chara mwakuti umanye kuti ine FUMU, ndili mu charu icho.

²³Ntheura nditi ndiŵike mphambano pakati pa ŵanthu ŵane na ŵanthu ŵako. Chimanyikwiro ichi chiti chiŵengeko na machero.’ ”

²⁴Ntheura FUMU yikachita ichi. Kukiza milembwera yikuru ya vimembe mu nyumba ya Faro, mu nyumba za ŵateŵeti ŵakhe, ndiposo na mu charu chose cha Eguputo. Ndipo mu charu chose cha Eguputo mukanangika chifukwa cha vimembe.

²⁵Penepapo Faro wakachema Mozesi na Aroni na kuti kwa iwo, “Rutani mukapereke sembe kwa Chiuta winu mwenemumo mu charu ichi.”

²⁶Kweni Mozesi wakati, “Kuti chingaŵa chiweme kuchita ntheura chara. Pakuti sembe izo tikupereka kwa FUMU, Chiuta withu, mbukazuzi ku ŵaEguputo. Ndipo usange tikupereka sembe izo mbukazuzi pa maso pawo, asi ŵamkutidina na mawe?

²⁷Tikwenera kuruta ulendo wa mazuŵa ghatatu ku mapopa kuti tikapereke sembe kwa FUMU, Chiuta withu, nga ndi umo wali kutilangulira.”

²⁸Ntheura Faro wakati, “Nditi ndimuzomerezgani kuti murute mukapereke sembe kwa FUMU, Chiuta winu, ku mapopa, kweni mureke kuruta kutali. Ndipo sono mundiŵeyerere.”

²⁹Ntheura Mozesi wakati, “Para ndafumapo waka kwa imwe, nditi ndimuŵeyererani kwa FUMU, ndipo na machero milembwera ya vimembe yiti yimureke Faro na ŵateŵeti ŵakhe ndiposo na ŵanthu ŵakhe. Kweni Faro wareke kupusikaso pakukana kuti ŵanthu ŵarute kuya kapereka sembe kwa FUMU.”

³⁰Penepapo Mozesi wakamureka Faro na kumuŵeyerera kwa FUMU.

³¹Ndipo FUMU yikachita nga ndi umo Mozesi wakaŵeyerera na kufumiskako milembwera ya vimembe kwa Faro, ku ŵateŵeti ŵakhe na ku ŵanthu ŵakhe. Kukakharako nanga ndi membe yimoza chara.

³²Kweni Faro wakanonofyaso mtima wakhe na pa nyengo iyi wuwo, kuti wakaŵazomerezga ŵanthu kuti ŵarute chara.