Read new_tumbuka_bible Yobe 10 Bible Online

Yobe 10 - new_tumbuka_bible bible

Yobe 10

¹“Umoyo wane kuti nkhuwukhumbaso chara, nditi ndiyowoyenge na kusinginika kwane kwambula wofi, nditi ndiyowoye vyakuŵinya vya mu mtima wane.

²Nditi ndiyowoye kwa Chiuta kuti, ‘Imwe mureke kundisuska, kweni mundiphalire chifukwa icho mukulimbirana nane.’

³Kasi chikumukondweskani kuti munyekezgenge ŵanthu, kuti muyuyurenge mlimo wa mawoko ghinu, na kurumba ivyo ŵanthu ŵaheni ŵakunozgera?

⁴Kasi maso ghinu ghali nga gha munthu? Kasi mukuwona umo munthu wakuwonera?

⁵Kasi mazuŵa ghinu ngachoko nga gha munthu, panji virimika vya umoyo winu nga vya munthu?

⁶Ipo sono, chifukwa uli mukupenjerera majuvyo ghane, na kupenjapenja kwananga kwane?

⁷Imwe mukumanya kuti ine ndine wakwananga chara, na kuti palije na yumoza uyo wangandithaska ku woko linu.

⁸“Imwe ndimwe mukandiwumba na kundipanga, kweni sono mukuzgokaso na kukhumba kundikoma.

⁹Kumbukani kuti mukandiwumba kufuma ku dongo, kasi mundiwezgerengeso ku fuvu?

¹⁰Asi imwe ndimwe mukapereka ku ŵadada nkhongono zakuti ŵandibabe? Asi imwe ndimwe mukandikhomeska mu nthumbo ya amama?

¹¹Ndimwe mukandivwarika munofu na chikumba, na kurunga viwangwa vyane na misipa.

¹²Ndimwe Chiuta mwandipa umoyo, na kundirongora chisungusungu chinu, ndipo mu kupwererera kwinu, mukasungilira umoyo wane.

¹³“Ndipouli vinthu ivi mukavibisa mu mtima winu, ndipo nkhumanya kuti ili ndilo likaŵa dazgo linu.

¹⁴Para nkhunanga, imwe mukundiwona, ndipo mukureka ubendezi wane kwambula kulangika chara.

¹⁵Usange ndine wakwananga, soka kwa ine. Usange ndine wakunyoroka, napo nkhutondeka kwinuska mutu wane. Pakuti ndakoreka na soni zinandi, para nkhuwona visuzgo vyane.

¹⁶Usange nkhulaŵiska kuchanya kwa imwe, mukundiŵenda nga ndi nkharamu, mukundofya na vyakuzizwiska vyinu.

¹⁷Mukundiŵikiraso ŵakaboni kuti ŵasuskane nane, ukari winu pa ine ukukulirakulira, mukwizaso na ŵasilikari ŵaphya kuti ŵimikane nane.

¹⁸“Imwe Chiuta, kasi nchifukwa uli mukazomerezga kuti ndibabike? Mphanyi nkhafwa waka pambere waliyose wandandiwone.

¹⁹Ine ndiŵenge nga ndi nthayo, mphanyi pakubabika ŵakanditorera ku dindi.

²⁰Asi mazuŵa gha umoyo wane ngachoko waka, mundireke kuti ndisanguruke pachoko waka,

²¹pambere ndindarute uko kuti ndamkuwerako chara, ku charu cha mdima na cha chisi chikuru,

²²ku charu cha mdima na cha vitimbaheti, uko ungweru ukulingana waka na chisi.”