Read new_tumbuka_bible Yobe 11 Bible Online

Yobe 11 - new_tumbuka_bible bible

Yobe 11

¹Penepapo Zofara wa ku Naama wakazgora wakati,

²“Kasi mazgu ghose agha ghangazgoreka chara? Kasi munthu uyo wakuŵereŵeta wangaŵa murunji?

³Iwe Yobe, kasi kuŵereŵeta kwako kungachetamiska ŵanthu? Kasi munthu wangakuchenya chara para iwe ukuyuyura?

⁴Iwe ukuti, ‘Mazgu ghane nga unenesko, ndipo ndine wambula kalema panthazi pa Chiuta.’

⁵Kweni Chiuta pera mphanyi ndiyo wayowoya kwa iwe, iyo pera mphanyi ndiyo wangukususka iwe.

⁶Chiuta mphanyi wanguvumbulira chisisi cha mahara, pakuti mahara ghali na vigaŵa vinandi. Umanye kuti Chiuta wakukulanga pachoko waka, kuruska umo kwananga kwako kuliri.

⁷Kasi iwe ungapulikiska vya muchindindi vya Chiuta? Kasi ungasangapo pa chigoti cha Mwenenkhongono zose?

⁸Mahara ghali kuchanya chomene kuruska mtambo. Kasi iwe ungachitachi? Ghali kunyang'amira kuruska malo gha ŵakufwa. Kasi iwe ungamanyapo vichi?

⁹Mahara ngatali kuruska charu, ngasani kuruska nyanja.

¹⁰Usange Chiuta wangiza na kukujalira mu gadi, na kuwunganya mphara kuti wakweruzge, kasi ndi njani wangamukanizga?

¹¹Iyo wakumanya awo mbambula kwenerera, para wawona kwananga, kasi wangareka kumanya?

¹²Kweni usange chindere chingaŵa na mahara, ipo boli wangababa munthu.

¹³“Iwe Yobe, usange mtima wako ngurunji, uwuskirenge mawoko ghako kwa Chiuta.

¹⁴Usange ungawuskako zakwananga mu woko lako, ungazomerezganga uheni kukhara mu nyumba yako.

¹⁵Penepapo uti uwuskenge chisko chako kwambula soni. Uti ukhazikikenge kwambula kopa.

¹⁶Wizamkuviruwa visuzgo vyako. Wizamkuvikumbuka nga ndi maji agho ghajumpha kale.

¹⁷Umoyo wako uti uŵalenge kuruska zuŵa, mdima wakhe uti uŵenge nga ndi mulenje.

¹⁸Uti uŵenge mu mutende pakuti chigomezgo chilipo, uti uvikiririke ndipo wamkupumula mu mutende.

¹⁹Wamkugona ndipo munthu kuti wamkukofya chara, ŵanandi ŵizamkukuŵeya kuti uŵachitire viweme.

²⁰Kweni ŵaheni kuti ŵawonenge kalikose chara, nthowa yose yakuponeramo yamkuŵazgeŵa. Chigomezgo chawo chamkuŵa chakuti mphanyi ŵafwa waka.”