Read new_tumbuka_bible Yobe 12 Bible Online

Yobe 12 - new_tumbuka_bible bible

Yobe 12

¹Penepapo Yobe wakazgora wakati,

²“Kwambula kukayika, imwe ndimwe ŵanthu nadi, ndipo vinjeru vyinu vizamkufwira namwe pamoza.

³Ine nane ndili na mahara nga ndimwe. Imwe kuti mukundiruska chara. Kasi ndi njani wakureka kumanya vinthu nga ndi ivi?

⁴“Ine ndine wakusekeka na ŵabwezi ŵane, ine nkhuromba kwa Chiuta ndipo wakundizgora. Ine ndine wakunyoroka na wambula kafukwa, kweni sono ndine munthu uyo ŵakumuseka.

⁵Maghanoghano gha uyo wali mu chimango, kuti ghakupwererako chara uyo wali mu soka. Ngakunozgeka kumupweteka uyo wakuteremuka.

⁶Nyumba za vigeŵenga zikuŵa mu mutende, ndipo awo ŵakutuka Chiuta ŵakukhara mu kufwasa, ŵeneawo ŵakugomezga nkhongono zawo kuŵa chiuta wawo.

⁷“Kweni iwe fumba vikoko, ndipo viti vikusambizge, fumba viyuni vya mudera, ndipo viti vikuphalire.

⁸Panji yowoya ku vilengiwa vya charu cha pasi, ndipo viti vikusambizge, panji ku somba za mu nyanja, nazo ziti zikwandulirenge.

⁹Mu vyose ivi, ndi nchi icho chikureka kumanya, kuti FUMU ndiyo wakavilenga?

¹⁰Chiuta ndiyo wakupereka umoyo ku vilengiwa vyose, muvuchi wa munthu waliyose uli mu woko lakhe.

¹¹Asi khutu likuyezga mazgu, nga ndi umo lulimi lukuchetera chakurya.

¹²Asi mahara ghakusangika ku awo mbarara? Asi awo ŵakhara mazuŵa ghanandi, ndiwo ŵali na umanyi?

¹³“Chiuta ndiyo wali na mahara na nkhongono, wali na urongozgi na umanyi wa vinthu vyose.

¹⁴Para wabwangandula, palije uyo wangazengaso, para wajalira munthu mu gadi, palije uyo wangamufumya.

¹⁵Usange Chiuta wakora vura, charu chikomira. Para wayisutula, maji ghakubizga charu.

¹⁶Chiuta wali na nkhongono na mahara, wose wakupusikika na wakupusika mbakhe.

¹⁷Awo ŵakurongozga, wakuŵapoka mahara, ŵeruzgi wakuŵazgora vindere.

¹⁸Wakuŵakhizgira pasi ŵakaronga na kuŵavwarika nkhwamba mu viwuno vyawo.

¹⁹Wakupuruska ŵasofi para waŵapoka mahara ghawo, wakuŵakhizga ŵarongozgi ŵamazaza.

²⁰Wakuchetamiska ŵarongozgi ŵakugomezgeka, ndipo ŵararaŵarara wakuŵapoka umanyi wawo.

²¹Wakunyoza nduna, na kugowozga nkhongono za vinkhara.

²²Chiuta wakuvumbula vinthu vya mu mdima, ndipo mdima ukuru wakuwuzgora kuŵa ungweru.

²³Chiuta wakukwezga mafuko, na kughamara petu, wakwandaniska mafuko, na kughaparanyaso.

²⁴Ŵarongozgi ŵa vyaru wakuŵapoka umanyi wawo, na kuŵayingiska mu mapopa mwambula nthowa.

²⁵Ŵakupapaska nthowa mu mdima, kwambula ungweru, wakuŵachitiska kuti ŵende penthyapenthya nga ndi para ŵaloŵera.