Read new_tumbuka_bible Yobe 13 Bible Online

Yobe 13 - new_tumbuka_bible bible

Yobe 13

¹“Wonani, maso ghane ghawona vyose ivi, makutu ghane ghapulika na kuvimanya.

²Ivyo mukuvimanya, ine nane nkhuvimanya, imwe kuti mukundiruska chilichose chara.

³Kweni mphanyi ndayowoya kwa Mwenenkhongono zose, na kususkana na Chiuta pa mrandu wane.

⁴Kweni imwe mukutozga vinthu na mazgu gha utesi, mose ndimwe zing'anga zawakawaka.

⁵Mphanyi mwangukhara waka chete, icho mphanyi changupimika kuŵa mahara ghinu.

⁶“Pulikani sono ivyo nkhughanaghana, tegherezgani ku ivyo ine nkhuŵeyerera.

⁷Kasi Chiuta muti mumuyowoyere mu utesi, na kuyowoyera iyo mwakupusika?

⁸Kasi mungarongora kutemwera kwa iyo? Kasi imwe muti mumweruzgire Chiuta?

⁹Kasi usange wangamusandanisandani, mukupima kuti chingamuŵirani chiweme? Kasi mungamupusika Chiuta umo mungapusikira munthu?

¹⁰Nadi Chiuta wati wamuchenyani, usange mu ubende mukurongora kutemwera.

¹¹Asi ufumunkhuru wakhe uti umofyani imwe? Asi nkhongono zakhe zizamkumupani chitenthe?

¹²Vinthanguni vyinu nvyawakawaka nga ndi vyoto, kujivikirira kwinu kukufukutuka nga ndi dongo.

¹³“Imwe mukhare waka chete, ine ndine ndiyowoyenge, icho chapukwa kundichitikira, chindichitikire waka.

¹⁴Ine ndanozgeka kupereka umoyo wane ku urwani, umoyo wane uli mu woko lane.

¹⁵Nanga wandikome, nditi ndimugomezgenge ndipera, nditi ndivikirire mrandu wane panthazi pakhe.

¹⁶Nadi ichi ndicho chiti chiŵenge chiponosko chane, kuti munthu wambula kopa Chiuta, kuti wangiza panthazi pakhe chara.

¹⁷Pulikani makora mazgu ghane, makutu ghinu ghategherezge ku icho nkhuyowoya.

¹⁸Mrandu wane ndawunozga, nkhumanya kuti ndisangikenge wambula kafukwa.

¹⁹“Kasi ndi njani uyo wangamanya kususkana nane? Usange waliko, ine ndikharenge chete na kufwa.

²⁰“Imwe Chiuta nkhumurombani vinthu ivi viŵiri, ndipo nditi ndibisame kwa imwe chara.

²¹Wezganiko woko linu kuti liŵe kutali na ine, ndipo mureke kunditenthemeska na ukari winu.

²²Penepapo mundichema ndipo nditi ndimuzgorani, panji ndizomerezgani kuyowoya, imwe mundizgore.

²³Kasi mauheni ghane ngalinga ndipo zakwananga nzilinga? Mundirongore mphuvya zane na kwananga kwane.

²⁴“Kasi nchifukwa uli mukubisa chisko chako? Kasi nchifukwa uli mukundipima kuŵa murwani winu?

²⁵Kasi muti mofye hamba ilo likuputa na mphepo, na kumuchimbilira gaga wakomira?

²⁶“Pakuti mukulemba vinthu ivyo vikundipweteka, ndipo mukundipa nga nchiharo zakwananga za pa uwukirano wane.

²⁷Imwe mukukaka malundi ghane mu magwede, mukulaŵirira nthowa zane zose, mukuŵanika pose apo nkhukanda.

²⁸“Munthu wakumara nga ndi chinthu chakuvunda, wali nga ndi laya ilo laryeka na fufuzi.