Read new_tumbuka_bible Yobe 14 Bible Online

Yobe 14 - new_tumbuka_bible bible

Yobe 14

¹“Munthu wakubabika na mwanakazi, wali na mazuŵa ghachoko waka ghakuzura na visuzgo.

²Wakuphukira nga ndi maluŵa, pamanyuma wakufota, wakuzgeŵerekera nga ndi muzgezge kuti wakukhalirira chara.

³Kasi pa munthu wa ntheura ndipo mukudodoliska? Kasi mungamutorera ku mphara kuti mumweruzge?

⁴Kasi ndi njani uyo wangafumyamo chakutozgeka, mu icho nchambula kutozgeka? Palije na yumoza.

⁵Pakuti mazuŵa gha munthu ngakupimika, unandi wa myezi ghakhe imwe ndimwe mukuwumanya. Muli kwimika mphaka za munthu, izo kuti wangajumpha chara.

⁶Ntheura imwe Chiuta, munthu murekani yekha, mungamulaŵiskanga mwakuti wafwasenge nalo zuŵa lakhe, nga ndi waganyu.

⁷“Pakuti khuni liri na chigomezgo chakuti, para ladumulika likuphukaso, ndipo phukira zakhe kuti zamkutondeka chara.

⁸Misisi yakhe yingachekura mu dongo, ndipo chisinga chakhe chingomira pasi,

⁹ndipouli para kamtika kafikapo likusundaso, na kuŵa na minthavi nga ndi chakupandika chiphya.

¹⁰Kweni munthu wakufwa na kuŵikika mu dindi, wakukhuta kwa umaliro ndipo wakuwonekaso chara.

¹¹Umo maji ghakuphwira mu nyanja, na mronga ukukamuka na komira,

¹²ndimo munthu wakufwira, na kuwukaso chara. Wawukengeso chara mpaka vya mu mtambo vimare, nanga nkhuwuskika ku tulo twakhe.

¹³“Mwe, mphanyi mwandibisa kusi ku malo gha ŵakufwa, mwakuti mundisunge kwenekuko, mpaka mutune ku ukari winu. Mphanyi mwandipimira nyengo, na kundikumbukaso pamanyuma.

¹⁴Usange munthu wafwa, kasi wizamkuŵaso na umoyo? Ine ndingalindirira mazuŵa ghose gha umoyo wane, mpaka apo kusutuka kwane kwizirenge.

¹⁵Imwe mphanyi mwandichema, ndipo ine mphanyi ndamuzgorani. Imwe mphanyi mwanwekera kuwona mlimo wa mawoko ghinu.

¹⁶Pakuti penepapo ndipo mphanyi mwapenda mendero ghane, mphanyi mwaŵanika zakwananga zane chara.

¹⁷Kwananga kwane mphanyi kwajalirika mu thumba, mphanyi mwabenekerera ubendezi wane.

¹⁸“Kweni phiri likuwa na kugumuka, jarawe nalo likusezgeka pa malo ghakhe,

¹⁹umo maji ghakukweskera majarawe, ndiposo umo chigumura chikukukulira dongo pa charu, ndimo imwe mukuparanyira chigomezgo cha munthu.

²⁰Imwe mukumutonda munthu kamoza pera, ndipo wakuzgeŵerekera waka, mukuzgora chisko chakhe, na kumutaya kutali.

²¹Para ŵana ŵakhe ŵakuchindikika, iyo kuti wakumanya chara, para ŵakuyuyurika, iyo kuti wakuchiwona chara.

²²Iyo wakupulika vyakuŵinya vya mu thupi lakhe pera, wakujitengerera waka iyomwene.”