Read new_tumbuka_bible Yobe 15 Bible Online

Yobe 15 - new_tumbuka_bible bible

Yobe 15

¹Penepapo Elifazi wa fuko la Temani wakazgora wakati,

²“Kasi munthu wa mahara wangazgora mazgu ghawakawaka, kasi wangazuzga nthumbo yakhe na mazgu ghambula chandulo?

³Kasi wakwenera kususka na mazgu ghambula chandulo, panji na mazgu agho ghangachita kaweme chara?

⁴Kweni iwe ukuwuskapo wofi kwa Chiuta, ukujandizga kujipereka panthazi pa Chiuta.

⁵Kwananga kwako kukurongora icho ukuyowoya, ndipo ukusankha kayowoyero ka uryarya.

⁶Mazgu agho ukuyowoya ndigho ghakukususka, kuti ndine chara, mayowoyero ghako ndigho ghakukupanikizga.

⁷“Kasi iwe ndiwe wakwamba kubabika, panji kasi ukaŵako pambere mapiri ghandaŵeko?

⁸Kasi uli kupulikapo vya mu ungano wa Chiuta? Kasi mahara ukughaperezga pa iwe wekha pera?

⁹Kasi iwe ukumanya vichi icho ise tikuchimanya chara? Kasi iwe ukupulikiska chivichi icho ise tikuchipulikiska chara?

¹⁰Ŵanthu ŵa mbuha na ŵachekuru ŵali na ise, ŵarara chomene kuruska ŵawuso.

¹¹“Kasi masangurusko gha Chiuta ngachoko kwa iwe, mazgu agho tayowoya makora kwa iwe?

¹²Kasi nchifukwa uli mtima wako ukukutorera kutali, nchifukwa uli ukutidodoliskira maso mu ukari,

¹³mwakuti ukufumiskira ukari wako kwa Chiuta, na kujizomerezga kuyowoya mazgu gha ntheura?

¹⁴“Kasi nchipusu kuti munthu waŵe wakuphotoka, panji wakubabika na mwanakazi kuti waŵe murunji?

¹⁵Chiuta kuti wakugomezga ŵangelo ŵakhe chara, vya mu mlengalenga navyo kuti nvyakuphotoka panthazi pakhe chara.

¹⁶Kasi kungaŵa uli na munthu, uyo ngwa kukazuzgika na wakubendera, mweneuyo wakuchita uheni nga ndi para wakumwa maji.

¹⁷“Tegherezga kwa ine ndipo nditi ndikwandulirenge, reka ndikuphalire icho ndili kuchiwona.

¹⁸Ndikuphalire icho ŵamahara ŵali kuphara, icho ŵakasambira ku ŵasekuru ŵawo,

¹⁹ŵeneawo pera charu chikaperekeka, para ŵalendo ŵakendanga mukati mwawo chara.

²⁰“Muheni wakunyongozeka na vyakuŵinya, mazuŵa ghose gha umoyo wakhe, wa nkhaza wakusuzgika virimika vyose ivyo vili kwimikikira iyo.

²¹Mazgu ghakofya ndigho ŵakupulika. Vigeŵenga vikwiza pa iyo para vinthu vikwenda makora.

²²Wakugomezgaso kuthaskika ku mdima wa nyifwa chara, iyo wakwenera kukomeka ndipera.

²³Wakuyingayinga uku na uku kupenja vyakurya, ndipo wakuti, ‘Kasi vili nkhu?’ Iyo wakumanya kuti zuŵa la mdima liri pafupi na iyo.

²⁴Visuzgo na vinjenje vikumofya, vikumuthereska nga ndi karonga uyo wanozgekera nkhondo.

²⁵“Vyose ivi vikuchitikira chifukwa wakwimikana na Chiuta, iyo wakujitukumura kwimikana na Mwenenkhongono zose.

²⁶Wakutora nguru yakhe uku wanonofya mtima wakhe, ndipo wakuchimbilira kuti wamikane na Chiuta.

²⁷“Apo watutuŵa, wati waka matama mbwefu, chinthumbo chakhe chati waka mbwekete.

²⁸Wa ntheura wati wakharenge mu misumba ya kubwanganduka, mu nyumba izo na yumoza wali kukharamo, nyumba izo zili kupimikira kuŵa mu mulu wa mahami.

²⁹Kuti wizamkuŵa musambazi chara, ndipo usambazi wakhe kuti ukhariske chara, chuma chakhe kuti chamkurutilira mu charu chara.

³⁰Kuti wizamkutaskika ku mdima wa nyifwa chara. Wati waŵenge nga ndi khuni ilo minthavi yakhe yaphya na moto, muvuchi wa Chiuta umuphutirenge kutali zii!

³¹Munthu wa ntheura wareke kujipuruska, pakugomezga ivyo ndi vyambula chandulo, chifukwa vyeneivi ndivyo viŵenge njombe yakhe.

³²Wati wapokerenge njombe yakhe yose wachali wandafwe, munthavi wakhe kuti utikitirenge chara.

³³Wati waŵenge nga ndi khuni la mpheska, ilo vipambi vyakhe vikurakata vyambula kuphya, nga ndi maolive agho ghakuyoyoska maluŵa ghakhe.

³⁴Pakuti mpingo wa ŵambula kopa Chiuta, kuti ukuŵa na vipambi chara. Ŵanthu awo ŵakutemwa vimbundi, nyumba zawo zamkuphya na moto.

³⁵Iwo ŵakughanaghana viheni na kuchita uheni pera, ndipo mitima yawo yikunozgekera kupusika pera.”