Read new_tumbuka_bible Yobe 16 Bible Online

Yobe 16 - new_tumbuka_bible bible

Yobe 16

¹Penepapo Yobe wakazgora wakati,

²“Vinthu vya ntheura ndavipulikapo vinandi chomene, mose ndimwe ŵasanguruski ŵawakawaka.

³Kasi mazgu ghinu ghawakawaka ghamarenge pauli? Kasi icho chikumuchiskani kuyowoya mazgu ghakususka nchivichi?

⁴Ine nane mphanyi ndayowoyanga nga ndimwe, usange imwe muŵenge mu visuzgo vyane. Ine nane mphanyi ndayowoyanga mazgu ghakususkana namwe, na kumupukunyirani mutu wane.

⁵Ine mphanyi ndamukhwimiskani na mazgu ghane ghaweme, mazgu ghane ghakusanguruska, mphanyi ghakumupembuzgani.

⁶“Ndipouli, usange nkhuyowoya, vyakuŵinya vyane kuti vikumara chara, ndipo usange ndingareka kuyowoya, vyakuŵinya vyane kuti vikumara chara.

⁷Nadi, Chiuta wandisakaza, mbumba yane yose wayimalirathu.

⁸Wandikaka, icho ndi ukaboni kuti ndine wakwananga, thupi lane laghandirathu, kupanikizga kuti ndine munthu muheni.

⁹Chiuta wandiparuraparura mu ukari wakhe, ndipo sono wakunditinkha na kundimemenera mino, murwani wane wadodoliskira maso ghakhe pa ine.

¹⁰Ŵanthu ŵakundiyasamulira milomo yawo, ŵakunditimba mu matama ghane mwankhaza, ndipo ŵakuwungana kuti ŵimikane nane.

¹¹Chiuta wandipereka ku awo ŵakuchita uheni, Wandiponya mu mawoko gha ŵakwananga.

¹²Vyose vikaŵa makora kwa ine, kweni wali kunditekenyura. Wakandikora pa singo na kunditeketa tuchokotuchoko, wali kundimika kuŵa chikhomo chakhe.

¹³Ŵamauta ŵakhe ŵakundizingirizga. Wakulasa ziso zane kwambula kuŵa na lusungu, ndipo wapungulira pasi nduru yane.

¹⁴Wakundipweteka kaŵirikaŵiri, wakurotokera pa ine nga ndi musilikari.

¹⁵“Ntheura ndavwara chigudulu mu thupi lane, ndipo ndakhara wakuthereskeka pasi pa fuvu.

¹⁶Maso ghane ghachesama na kulira, vikope vyane vyatupa na kuzingirizgika na mdima.

¹⁷Kweni ine ndindachitepo nkhaza, ndipo malurombo ghane nagho ngaweme waka.

¹⁸“Iwe charu cha pasi, ungabisanga ndopa zane chara, ndipo kulira kwane kungarekanga chara.

¹⁹Nanga ndi sono kaboni wane wali kuchanya, ndipo nkhoswe yane yili mu mlengalenga.

²⁰Awo mbanasi ŵane ndiwo ŵakundipepura, apo ine nkhulirira kwa Chiuta.

²¹Kuŵenge yunji wakundiŵeyerera kwa Chiuta, mphanyi wakuchita umo wakuŵeyerera mzengezgani wakhe.

²²“Pakuti para kwizenge virimika vichoko waka, apo ndamkwenda mu nthowa, iyo kuti ndamkuwerako chara.