Read new_tumbuka_bible Yobe 19 Bible Online

Yobe 19 - new_tumbuka_bible bible

Yobe 19

¹Penepapo Yobe wakazgora wakati,

²“Kasi imwe muti mundisuzge mpaka pauli? Kasi muti mundipweteke na mazgu ghinu mpaka pauli?

³Mwanditombozga ine kwakuyana na kakhumi, ndipo kasi soni mulije kuti mukundinangira ine?

⁴Nanga kungaŵa unenesko kuti ndananga, kwananga uku nkhwa ine ndamwene.

⁵Usange mukujikuzga nadi kwimikana nane, na kuzgora kuyuyurika kwane kuŵa mazgu ghakusuzga ine,

⁶mumanyani kuti Chiuta ndiyo wandichitira vyeneivi, ndiyo wandizingirizga na ukonde wakhe.

⁷“Ine nkhulira nkhuti, ‘Nkhufwa ine!’ Kweni palije na yumoza uyo wakundizgora. Nanga nkhuchemerezga kuti ndovwirike, kweni kulije weruzgi wakunyoroka.

⁸Wandijalira nthowa mwakuti ndireke kujumpha, nthowa yane wayisikizga na mdima.

⁹Wandivura uchindami wane, ndipo wawuskako mphumphu ku mutu wane.

¹⁰Wandiparuraparura ndipo wandireka wakumara, chigomezgo chane wachizgura nga ndi khuni.

¹¹Ukari wakhe ukugolera uli pa ine, ndipo wandipima ine nga ndi murwani wane.

¹²Watuma ŵasilikari ŵakhe ŵanandi chomene, ŵazenga vibumira kwimikana nane, wazenga misasa kuzingirizga hema lane.

¹³“Ŵabali ŵane waŵasezgera kutali na ine, awo mbanyane waŵazgora kuŵa ŵalendo kwa ine.

¹⁴Ŵabali ŵane ŵandichimbira, ŵabwezi ŵane ŵandiruwa.

¹⁵Ŵalendo awo ŵali mu nyumba yane ŵandiruwa, ŵateŵeti-kazi ŵane ŵakundipima kuŵa mulendo kwa iwo.

¹⁶Para nkhuchema muteŵeti wane, kuti wakundizgora chara, ine nkhuchita kumuŵeyerera kuti wize.

¹⁷Muwoli wane wakukondwa na muvuchi wane chara, ŵana ŵanyane ŵakundinyanyara.

¹⁸Nanga ndi ŵana ŵachoko ŵakundiyuyura, para nkhuwuka ŵakundihoya.

¹⁹Ŵabwezi ŵane ŵa pa mtima ndaŵanunkhira, awo nkhatemwananga ŵandigarukira.

²⁰Ndamara, ndine wakughanda, wa viwangwa pera, ndati waka kwinyimbu, kweni ndili wamoyo.

²¹Muŵe nane na chitima, muŵe nane na chitima, Mwe mwa ŵabwezi ŵane, pakuti woko la Chiuta landinyekezga.

²²Kasi chifukwa uli imwe mukundizikizga nga ndi Chiuta? Kasi chifukwa uli imwe mundakhorwe na kusuzgika kwane?

²³“Mbaya mwe, mphanyi mazgu ghane ghalembeka, mphanyi ghakasindikizgika mu buku!

²⁴Mbaya mwe, mphanyi na chakugwarurira cha chisulo na cha muthovu, ghakazongeka pa mawe kwa muyirayira!

²⁵Ine nkhumanya kuti muwomboli wane ngwamoyo, ndipo pa umaliro wizamkwimilira pa charu kuti wandivikirire.

²⁶Ndipo pamanyuma pakumara kwa thupi lane, ndipouli na thupi lane leneili ndamkumuwona Chiuta.

²⁷Ine ndamwene ndamkuwona Chiuta na maso ghane, kuti ndi munyakhe chara, ndipo mtima wane ukunwekera zuŵa leneilo.

²⁸“Imwe mukuti, ‘Kasi tikumusungirachi na vinthu vyose ivi, pakuti chakwambira visuzgo vyose ivi chili pa iyomwene.’

²⁹Imwe mwaŵene mopenge lupanga, pakuti ukari ukwiza na chilango cha lupanga, penepapo mwamkumanya kuti weruzgi ulipo nadi.”