Read new_tumbuka_bible Yobe 2 Bible Online

Yobe 2 - new_tumbuka_bible bible

Yobe 2

¹Zuŵa linyakheso, ŵana ŵa Chiuta[1] ŵakiza panthazi pa FUMU ndipo Satana nayo wakiza pamoza nawo kuti wajirongore panthazi pa FUMU.

²FUMU yikamufumba Satana yikati, “Kasi iwe Satana wafumira nkhu?” Satana wakazgora FUMU wakati, “Ndafumira mu kuyingayinga mu charu na mu kwendendeka uku na uko.”

³FUMU yikafumba Satana yikati, “Kasi waghanaghanapo za muteŵeti wane Yobe. Iyo kuti wakuyana na munthu waliyose pa charu cha pasi chara. Iyo ngwambula kalema na wakunyoroka. Ndi munthu wakopa Chiuta na wakulambalala uheni. Iyo ngwakwimilira nganganga mu chipulikano chakhe, nangauli iwe ukandichichizga kuti ndimumare kwambula chifukwa.”

⁴Satana wakayizgora FUMU wakati, “Munthu wakupereka chilichose icho wali nacho kuti waŵe na umoyo usange wakupulika vyakuŵinya mu thupi lakhe.

⁵Kweni sono munyoroskere woko linu pa iyo pakunanga thupi na viwangwa vyakhe ndipo wati wamutukani panthazi pinu.”

⁶FUMU yikamuzgora Satana yikati, “Nchiweme, Yobe ndamuŵika mu mawoko ghako, uchite chilichose kwa iyo. Kweni umoyo wakhe pera ndiwo ureke.”

⁷Penepapo Satana wakawukapo panthazi pa FUMU ndipo wakaruta kuya kamusuzga Yobe na vilonda vyazoza kufuma ku malundi mpaka ku mutu wakhe.

⁸Sono Yobe wakatora dengere kuti wajikwanthenge nalo uku wakhara pa chizara cha vyoto.

⁹Penepapo muwoli wakhe wakati kwa iyo, “Kasi uchali kwimilira nganganga mu chipulikano chako? Umutuke Chiuta kuti ufwe.”

¹⁰Yobe wakamuzgora muwoli wakhe wakati, “Ukuyowoya nga ndi mwanakazi wakupusa. Kasi tipokerenge viweme kwa Chiuta kwambula kupokeraso viheni?” Mu vyose ivi Yobe kuti wakanjira mu kwananga chara mu kayowoyero kakhe.

¹¹Ŵabwezi ŵa Yobe ŵatatu, Elifazi wa ku Temani, Bilidadi wa fuko la Shuwa ndiposo na Zofara wa fuko la Naama ŵakati ŵapulika kuti Yobe wali mu visuzgo vikuru, ŵakapulikana kuti ŵize pamoza kwa iyo kuti ŵarongore chitima chawo kwa iyo na kumusanguruska.

¹²Apo ŵakaŵa ŵachali patali, ŵakamuwona Yobe kweni kuti ŵakamumanya chara. Ŵakati ŵasenderera pafupi ŵakamumanya ndipo ŵakamba kulira na kutengera chomene. Iwo ŵakaparura vyakuvwara vyawo na kujithilira fuvu ku mitu yawo.

¹³Ndipo ŵakakhara pasi pamoza nayo kwa mazuŵa ghankhonde na ghaŵiri, muhanya na usiku. Pakaŵavye na yumoza uyo wakayowoya nayo chifukwa ŵakawona kuti Yobe wakusuzgika chomene.