Read new_tumbuka_bible Yobe 20 Bible Online

Yobe 20 - new_tumbuka_bible bible

Yobe 20

¹Penepapo Zofara wa fuko la Naama wakazgora wakati,

²“Iwe Yobe, ukutimbanizga maghanoghano, sono kuti ndichedwenge kukuzgora chara.

³Nkhupulika mazgu ghakundichenya na ghakundilengeska, ndipo kumanya kwane kukandichiska kuti ndizgore.

⁴“Kasi ichi ukuchimanya chara kufuma papo kale, kufuma apo munthu wakalengekera pa charu,

⁵kuti kujikuzga kwa ŵaheni, nkhwa nyengo yichoko waka, ndiposo kuti chimwemwe cha ŵanthu wambula kopa Chiuta, kuti chikurutilira chara?

⁶Nangauli munthu wangajikuzga mpaka kuchanya, ndipo uchindami wakhe ukakhwaske ku maŵingu,

⁷iyo wati wamare petu kwa muyirayira nga ndi ulongwe wakhe. Ndipo awo ŵali kumuwonapo ŵizamkufumba kuti, ‘Kasi wali nkhu?’

⁸Nga ndi maloto wizamkumara petu, kuti wizamkusangika chara. Wizamkumara nga ndi mboniwoni ya usiku.

⁹Awo ŵakamuwonapo kale kuti ŵizamkumuwonaso chara, nanga ndi malo ghakhe kuti ghizamkumuwonaso chara.

¹⁰Ŵana ŵakhe ŵizamkuŵeyerera ku ŵakavu, usambazi uwo wakapoka ŵizamkuŵawezgera.

¹¹Nkhongono za uwukirano wakhe mu viwangwa vyakhe, yizamkugona pasi pa dindi pamoza nayo.

¹²“Nangauli ubendezi ngwa kunowa mu mlomo mwakhe, ndipo wakuwubisa kusi ku lulimi lwakhe,

¹³nangauli kuti wakukhumba kuwutaya chara na kuwusungilira ndipera mu mlomo wakhe,

¹⁴ndipouli chakurya chakhe chikuŵaŵa mu nthumbo yakhe, chikuŵa nga ndi urwirwi wa njoka mwa iyo.

¹⁵Usambazi uwo wakamirimitizga wizamkuwuwukura, Chiuta ndiyo wizamkuchitiska kuti nthumbo yakhe yiviwukure.

¹⁶Ivyo waryanga vili nga ndi urwirwi wa njoka, ndipo luwozga lwa njoka ya chipiri luti lumukome.

¹⁷Kuti wati wawoneso mironga chara, tumironga twakufuruka uchi na mkaka.

¹⁸Ivyo wakufukafukira wizamkuwezga kwambula kuryako, wizamkusekerera chara chandulo cha malonda ghakhe.

¹⁹Pakuti wakaŵatindiŵizgira pasi ŵakavu, na kuŵareka ŵambula chilichose, wakapoka nyumba izo kuti wakazenga chara.

²⁰“Pakuti uzukusi wakhe uli na pakurekera chara, wati wasungengepo chilichose chara, pa ivyo wakunwekera.

²¹Para wakati warya, pakaŵavye na icho chikakharapo. Ntheura usambazi wakhe, kuti ukhalirirenge chara.

²²Mu uzari wa kukhuta kwakhe, wati waŵe na kwenjerwa kukuru. Visuzgo vikuru chomene viti vize pa iyo.

²³Para iyo wakhuta chomene, Chiuta wati wafumiskire ukari wakhe pa iyo, na kuwuroposkera pa iyo nga ndi kurya kwakhe.

²⁴Nanga wangachimbira ku homwa la chisulo, muvwi wa mkuŵa uti umulasenge.

²⁵Wati wawukhure muvwi kufumamo mu thupi lakhe, songo lakung'azima kufuma mu nduli yakhe, ndipo wakuŵa mu wofi ukuru chomene.

²⁶Usambazi wakhe wose ukuŵa mu mdima pera, moto wambula kupembeka na munthu uti umumyangure, chose icho chikakharako mu nyumba yakhe.

²⁷Mtambo uti uvumbule ubendezi wakhe, ndipo charu cha pasi chiti chimuwukire.

²⁸Nyumba yakhe yizamkukurika na chigumura cha maji, mphango zakhe zizamkukurika pa zuŵa la ukari wa Chiuta.

²⁹“Leneili ndilo phande la muheni kufumira kwa Chiuta, ndi languro la chiharo chakhe na Chiuta.”