Read new_tumbuka_bible Yobe 21 Bible Online

Yobe 21 - new_tumbuka_bible bible

Yobe 21

¹Penepapo Yobe wakazgora wakati,

²“Tegherezgani makora ku ivyo nkhuyowoya, ichi chiŵe chisangurusko chinu kwa ine.

³Zizipizgani kuti ndiyowoye, para ndayowoya mungarutilirani kunditombozga.

⁴“Kasi ine nkhusinginikira munthu? Ndirekerengechi kuŵa wambula kuzizipizga.

⁵Mundilaŵiske, ndipo muzizwe, mukore pa mlomo winu.

⁶Para nkhughanaghana ichi, nkhuthika lusoko, thupi lane likukoreka na vimbwambwa.

⁷Kasi ŵanthu ŵaheni ŵakukhalirachi ŵamoyo? Kasi ŵakufikirachi ku uchekuru, na kuzgoka ŵankhongono mu mazaza?

⁸Iwo ŵakuwona ŵana ŵawo ŵakukura makora, ŵazukuru ŵawo nawo ŵakukura uku ŵakulaŵiska.

⁹Mu nyumba zawo, ŵakukhara mu mutende kwambula wofi, chikoti cha Chiuta chikuŵakhwaska chara.

¹⁰Nkhambako zawo zikubabiska kwambula kutondeka, ng'ombe zawo zanakazi zikubaba kwambula kuphoroza.

¹¹Ŵakufumiska twana twawo nga ndi mskambo, ndipo ŵana ŵawo ŵakuvinavina.

¹²Ŵana ŵawo ŵakwimba sumu, pakulizga viding'indi na ŵabango, ndipo ŵakusekerera pakupulika kulira kwa fyoliro.

¹³Ŵakukhara virimika vinandi ŵali mu usambazi, ndipo ŵakuruta ku malo gha ŵakufwa mu mutende.

¹⁴“Ŵanthu aŵa ŵakuyowoya kwa Chiuta kuti, ‘Mutileke waka ise, tikukhumba chara kumanya nthowa zinu.

¹⁵Kasi Mwenenkhongono zose yura ndi njani, kuti ise timuteŵeterenge? Kasi tikusanga chandulo uli, para tikuromba kwa iyo?’

¹⁶Asi usambazi wa ŵaheni uli mu mawoko ghawo? Urongozgi wa ŵaheni uli kutali na ine.

¹⁷“Nkhalinga nyali ya ŵaheni yili kuzimyapo? Nkhalinga apo soka liri kwizapo pa ŵaheni? Kasi nkhalinga apo Chiuta wakuŵalanga para wakaripa?

¹⁸Kasi nkhalinga apo Chiuta wakuŵafumyapo, nga ndi viswaswa vyakuputwa na mphepo, nga ndi mwerero wakuputwa na chimphupuru?

¹⁹“Imwe mukuti, ‘Chiuta wakulanga mwana, chifukwa cha kwananga kwa ŵapapi ŵakhe.’ Chara, kweni Chiuta wakulanga awo ŵakwananga, mwakuti ŵamanye kuti iyo ndiyo wakulanga ŵakwananga.

²⁰Ŵakwananga ŵawone nadi pharaniko yawo, ŵamwe nadi ukari wa Mwenenkhongono zose.

²¹Pakuti, kasi ŵakulorako vya nyumba yawo para ŵafwa, para nyengo ya kukhalira mu charu yamara?

²²“Kasi munthu wangamusambizga mahara Chiuta, pakuti iyo wakweruzga na awo mba pachanya?

²³Ŵanyakhe ŵakufwa apo mbasambazi chomene, ŵali paweme, na mu mutende.

²⁴Iwo ŵakufwa ŵakututuŵa chomene, apo mongo wa mu viwangwa vyawo uchali na mtika.

²⁵Kweni ŵanyakhe ŵakufwa na mtima wakuŵinya, kwambula kukondwererapo na kaweme kalikose.

²⁶Ŵasambazi na ŵakavu wose ŵakufwa na kusungika, wose pamoza mphorozi zikuŵataka.

²⁷“Ine nkhumanya ivyo imwe mukughanaghana, nkhumanya viheni ivyo mwanozgera kundichitira.

²⁸Imwe mukufumba kuti, ‘Kasi nyumba ya munthu wakuzirwa yura, yili nkhu? Kasi hema lira, mukakharanga munthu wakwananga, liri nkhu?’

²⁹Kasi mundaŵafumbeko awo ŵakwenda mu misewu? Kasi mukuzomerezga chara ivyo iwo ŵakuyowoya?

³⁰Muheni wakulangika chara pa zuŵa la soka, wakuthaskika pa zuŵa la ukari wa Chiuta.

³¹Kasi ndi njani uyo wangasuska munthu wakwananga, panji uyo wangamuwezgera pa icho wachita.

³²Para wakuyeghekera ku dindi, ŵalinda ŵakusungilira dindi lakhe.

³³Ŵanthu ŵanandi chomene ŵakumurondezga, charu nacho chikupokerera chitanda chakhe makora ghene.

³⁴“Sono mundisanguruskenge uli, na mazgu ghawakawaka? Ivyo imwe mwazgora, nvya utesi pera.”