Read new_tumbuka_bible Yobe 22 Bible Online

Yobe 22 - new_tumbuka_bible bible

Yobe 22

¹Penepapo Elifazi wa fuko la Temani wakazgora wakati,

²“Kasi munthu wangaŵa na chandulo kwa Chiuta? Nadi, wa mahara wali na chandulo kwa iyomwene pera.

³Kasi Mwenenkhongono zose mungamukondweska, pa chifukwa chakuti ndiwe wakunyoroka? Panji, kasi nchandulo kwa iyo, usange nthowa zako nzambula kalema?

⁴“Kasi nchifukwa chakuti ukumusopa, kuti wakuchenyenge na kukutorera mu weruzgi?

⁵Asi nchifukwa chakuti kwananga kwako nkhukuru, ndipo ubendezi wako kuti ukumara chara?

⁶Iwe ukachichizganga ŵabali ŵako kuti ŵakupe chikhole, kwambula chifukwa Ukaŵavuranga vyakuvwara vyawo, na kuŵareka nkhule.

⁷Ŵanthu ŵa vyakulema, ulije kuŵapa maji kuti wamwe, ŵanjara ukaŵanora chakurya.

⁸Iwe ukaŵa wankhongono na wa munda ukuru, wakuchindikika, ndipo ukakharanga mwenemumo.

⁹Vyokoro ukaviwezga kwambula kanthu kalikose, ŵalanda ukaŵakandirizgira pasi.

¹⁰Ndicho chifukwa vipingo vyakuzingirizga, ndipo mwa mabuchibuchi wofi wakukora.

¹¹Kuli mdima, kuti ungalaŵiskaso chara, maji gha chigumura ghakubizga.

¹²“Asi Chiuta wakukhara kutali chomene mu mlengalenga? Nyenyezi izo zili kuchanya nkhanira, iyo wakuziwonera pasi.

¹³Ndipouli iwe ukuyowoya kuti, ‘Kasi Chiuta wakumanya vichi? Kasi wangamanya kweruzga, apo wali kuseri ku mdima?

¹⁴Maŵingu ghakomi ghamuvunga, mwakuti iyo wakuwona chara, ndipo wakwenda pachanya pa mlengalenga.’

¹⁵“Kasi ukwenda ndipera mu nthowa yakale, iyo ŵaheni ŵakendangamo?

¹⁶Iwo ŵakafumiskikamo nyengo yawo yindakwane, lufura lwawo lukakukurwa na maji.

¹⁷Ŵanthu ŵara ŵakayowoya kwa Chiuta kuti, ‘Fumaniko kwa ise,’ ŵakatiso, ‘Kasi Mwenenkhongono zose, wangachita vichi kwa ise?’

¹⁸Ndipouli, Chiuta ndiyo wakazuzga nyumba zawo, na vinthu viweme, kweni maghanoghano gha ŵaheni ghali kutali na ine.

¹⁹Ŵarunji ŵakuchiwona na kukondwa, ŵambula kalema ŵakuseka chomene.

²⁰Iwo ŵakuti, ‘Nadi ŵarwani ŵithu ŵakumara petu, ivyo ŵakavireka moto wamyangura.’

²¹“Iwe Yobe, phemana nayo Chiuta, kuti uŵe pa mutende, mwa ntheura uweme wizenge kwa iwe.

²²Pokerera visambizgo ivyo wakukuyowoyera, sungilira mazgu ghakhe mu mtima wako.

²³Usange ukuwerera kwa Mwenenkhongono zose na kujiyuyura, usange ukufumyamo uheni mu nyumba yako,

²⁴usange chuma chako ungachitaya ku fuvu, ndiposo golide wakuzirwa mu mawe gha mu mronga,

²⁵ipo Chiuta Mwenenkhongono zose, ndiyo waŵe golide wako, ndiposo siliva wako wakuzirwa.

²⁶Penepapo uti usange chimwemwe mwa Mwenenkhongono zose, ndipo uti uŵenge na chigomezgo mwa Chiuta.

²⁷Wamkuromba kwa iyo ndipo wati wakupulike, ndipo wamkufiska mapangano ghako.

²⁸Icho ukukhumba kuti chikuchitikire, chiti chikuchitikire, ndipo ungweru uti uŵalenge pa nthowa zako zose.

²⁹Pakuti Chiuta wakuyuyura awo ŵakujikuzga, ndipo wakuponoska awo ŵakujiyuyura.

³⁰Chiuta wakuthaska na awo ŵali na kafukwa, wakuŵathaska chifukwa ndiwe wambula kalema.”