Read new_tumbuka_bible Yobe 23 Bible Online

Yobe 23 - new_tumbuka_bible bible

Yobe 23

¹Penepapo Yobe wakazgora wakati,

²“Muhanya uno napo kusinginika kukuŵinya chomene, woko lakhe ndizitu, nangauli nkhutampha.

³Mbaya mwe, ndimanyenge uko ndingamusanga Chiuta, mphanyi ndaya kafikako uko iyo wakukhara.

⁴Mphanyi ndamuphalira mrandu wane, mphanyi ndarongosora vifukwa vyane vyose.

⁵Mphanyi ndangumanya icho wati wandizgore, mphanyi ndanguvipulika ivyo wati wandiyowoyere.

⁶Kasi mphanyi wandisuska na nkhongono yakhe yikuru? Chara nadi! Iyo mphanyi wangundipulikiska.

⁷Kwenekura munthu murunji, mphanyi wakudumbiskana nayo, mweruzgi wane mphanyi wandisutula ku mrandu wane kwa muyirayira.

⁸“Ine ndamupenja Chiuta cha ku mafumiro gha dazi, kweni kuti waliko chara. Nkhawerako kumupenja ku cha zambe, kweni kuti nkhumuwonako chara.

⁹Para wali pa mlimo cha ku mpoto, kuti nkhuwona chara. Para wali ku mwera, nako kuti nkhumuwona chara.

¹⁰Kweni Chiuta wakumanya nthowa iyo nkhwendamo, para wandiyezga, ndizamkuŵa wakutozgeka nga ndi golide.

¹¹Ine nkhwenda umo wakwenda iyo, ndasunga nthowa yakhe, ndilije kupatukako.

¹²Ine ndilije kupatukako ku dango ilo wakuyowoya, ndasungilira mu mtima wane, mazgu agho wakuyowoya.

¹³“Chiuta kuti wakusinthika chara, ndipo ndi njani wangamusintha maghanoghano? Ivyo wakukhumba, ndivyo wakuchita.

¹⁴Iyo wati wafiskenge ivyo wanozgera kundichitira, ndipo vinandi vya ntheura vili mu mtima wakhe.

¹⁵Ndicho chifukwa nkhutenthema panthazi pakhe, para nkhughanaghana vya iyo, nkhumopa chomene.

¹⁶Chiuta wagongoweska mtima wane, Mwenenkhongono zose wanditenthemiska.

¹⁷Nangauli kuli mdima kuti nkhureka chara kuchemerezga kuti wandovwire, ndipo kuti nkhuwona chilichose chara mu mudima uwu.