Read new_tumbuka_bible Yobe 24 Bible Online

Yobe 24 - new_tumbuka_bible bible

Yobe 24

¹“Kasi nchifukwa uli Chiuta Mwenenkhongono zose, wimike nyengo zakweruzgira? Kasi nchifukwa uli awo ŵakumumanya, ŵakuziwona nyengo izi chara.

²Ŵaheni ŵakusezga vimanyikwiro vya mphaka, kuti ŵakuzgireko charu chawo, mberere izo ŵakwiba ŵakuziriska pamoza na zawo.

³Ŵakuchimbizgira kutali mbunda ya mulanda, ng'ombe ya chokoro ŵakutora kuŵa chikhole.

⁴Ŵakukanchizgira kutali awo mbakavu, ndipo ŵakuchichizga ŵakusokwa mu charu kuti ŵabisame.

⁵Wonani, nga ndi ŵaboli mu chiparamba, ŵakavu ŵakuwukira ku milimo yawo, kuya kapenja chakurya cha ŵana ŵawo mu mapopa.

⁶Ŵakuvuna vyakurya mu minda, ŵakuvulura mu minda ya mpheska ya ŵanthu ŵaheni.

⁷Ŵakugona nkhule usiku wose, kwambula chakuvwara, mu nyengo ya mphepo ŵakusoŵa chakudika.

⁸Ŵazumbwa na vura ya mu mapiri, ŵakubisama kusi ku majarawe, chifukwa chakusoŵa nyumba yakukharamo.

⁹Ŵaheni ŵakukwapura ŵana ŵalanda awo ŵakonkha kuŵa chikhole cha ngongole zawo.

¹⁰Ŵakavu ŵakwenda nkhule, kwambula chakuvwara, ŵakumuyegheska mphundwe za tirigu, uku ŵali na njara.

¹¹Ŵakavu ŵakwenga mafuta gha maolive, mu minda ya ŵanthu ŵaheni. Ŵakuponda mpheska mu chakukamiramo vinyo, kweni ŵakukomwa na nyota.

¹²Mu misumba mukufuma mutampho wa awo ŵakufwa, uyo wapwetekeka ŵakulira kuti wovwirike. Ndipouli Chiuta kuti wakupwererako chara, za malurombo ghawo.

¹³“Ŵalipo ŵanyakhe ŵaheni awo ŵakukana ungweru, awo kuti ŵakumanya nthowa zakhe chara, nesi kukhara mu nthowa zakhe.

¹⁴Para kwafipa, wakukoma wakuwuka, wakuya kakoma mukavu na musokwano, mu usiku wakuŵa munkhungu.

¹⁵Muleŵe wakulindirira kuti waka zgerere, na kuyowoya kuti, ‘Kulije uyo wangandiwona.’ Wakuzgora chisko chakhe.

¹⁶Na usiku ŵakugumura nyumba za ŵanthu, kweni na muhanya ŵakujijalira mu zinyumba, chifukwa ŵakukhumba vya mu ungweru chara.

¹⁷Mdima wa munkhorwe, ndiwo ukuŵa nga ndi mulenje wawo, pakuti mbabwezi ŵa mdima wakofya wa bii.”

¹⁸[2]“Muheni wakukurwa na maji gha chigumura, minda yakhe nayo njakutembeka mu charu. Palije munthu uyo wakurutako ku minda yawo ya mpheska.

¹⁹Chithukivu na chilangalanga, vikusongonora maji gha chiwuvi, ndimo nyifwa yiti yichitirenge na ŵakwananga.

²⁰Nanga wangaŵa nyina wakumuruwa, mphorozi zikurya mathupi ghawo. Ŵaheni kuti ŵakukumbukikaso chara, kweni ŵakuphyoka nga ndi makuni.

²¹Ŵaheni wakuzgerera mwanakazi uyo ndi chumba na wambula mwana, ndipo chokoro kuti ŵakuchichitira viweme chara.

²²Ndipouli Chiuta, na nkhongono zakhe, wakumara umoyo wa vinkhara. Nangauli umoyo ungaŵaŵira makora, kweni kuti ngwa kugomezgeka chara.

²³Chiuta wangamuvikirira muheni na kumupa mutende, ndipouli wakumuwona umo wakwendera.

²⁴Pakuti pa kanyengo kachoko waka ŵakukwezgeka, kweni kwambula kuchedwa ŵakuwoneka chara. Ŵakufota na kuyoyoka nga ndi maluŵa gha mu chiparamba, ŵakudumurika nga ndi visasuni vya tirigu.

²⁵“Usange kuli ntheura chara, kasi ndi njani uyo wangandisuska kuti nkhuteta? Warongore kuti ivyo nkhuyowoya ndi vya wakawaka.”