Read new_tumbuka_bible Yobe 26 Bible Online

Yobe 26 - new_tumbuka_bible bible

Yobe 26

¹Penepapo Yobe wakazgora wakati,

²“Iwe wamovwira nadi uyo walije nkhongono, wamuponoska nadi uyo ngwa kutomboroka.

³Wamurongozga makora nadi uyo walije mahara, ndipo warongora nadi kuti uli na umanyi.

⁴Kasi ndi njani uyo wakovwira kuti uyowoye ntheura? Ndi mzimu wa njani uwo ukukukhuŵirizga, kuti uyowoye ntheura?”

⁵[3]“Mizimu ya ŵakufwa yikumbwambwantha kusi ku charu, vyose ivyo vikukhara mu maji navyo vikusuzgika.

⁶Malo gha ŵakufwa, ghali mwazi panthazi pa Chiuta, ndipo malo gha pharaniko, ngambula kubenekerereka.

⁷Chiuta wali kutandaulira mtambo wa ku mpoto, apo mphambula kanthu, wali kuneng'enezga charu cha pasi, apo pakaŵavye kanthu.

⁸Wakuŵika maji ghanandi mu maŵingu ghakukhora, kweni bingu likuparuka chara na uzitu wakhe.

⁹Wakuwubisa mwezi, wakutandazgirapo bingu pachanya pakhe.

¹⁰Maji nagho wali kughaŵika mu mphaka ya chizinga, pa mphaka za mdima na ungweru.

¹¹Para wachenya mizati iyo yikukhozga mtambo, yikutenthema na kuŵa na wofi.

¹²Na nkhongono zakhe wakachetamiska nyanja, na mahara ghakhe wakaparanya Rahabu, chikoko chakofya cha mu nyanja chira.

¹³Na muvuchi wakhe wakatoweska mtambo. Woko lakhe likagwaza chinjoka, icho chikachimbiranga.

¹⁴Vyeneivi nvichoko waka vya milimo yakhe, tikupulika pachoko waka na vya iyo. Kasi ndi njani uyo wangamanyiska, ukuru wa nkhongono zakhe?”