Read new_tumbuka_bible Yobe 27 Bible Online

Yobe 27 - new_tumbuka_bible bible

Yobe 27

¹Yobe wakarutilira kuyowoya wakati,

²“Nkhurapa mwa Chiuta wamoyo, uyo wakukana kunderuzga mu urunji. Nkhurapa mwa Mwenenkhongono zose, uyo waŵika umoyo wane mu vyakuŵinya.

³Nyengo yose apo ndichali wamoyo, apo muvuchi wa Chiuta uli mu mphuno zane,

⁴mlomo wane kuti uyowoyenge viheni chara, nesi lulimi lwane kuyowoya vya upusikizgi.

⁵Ine nkhuzomera chara kuti mukuyowoya unenesko, ine ndiŵenge wakugomezgeka mpaka apo ndifwirenge.

⁶Ine ndakorerera urunji wane kuti ndiwutayenge chara, mtima wane kuti ukundisuskapo chara, nanga ndi zuŵa limoza.

⁷“Ŵarwani ŵane ŵaŵe nga mbakwananga, ndipo awo ŵakundiwukira ŵaŵe nga mbambula urunji.

⁸Kasi wambula kopa Chiuta, wali na chigomezgo uli, para Chiuta wakumuwuskako, ndiposo para wakutora umoyo wakhe?

⁹Kasi Chiuta wapulikenge kulira kwakhe, para visuzgo vyamuwira?

¹⁰Kasi iyo wangakondwera mwa Mwenenkhongono zose? Kasi wangaromba kwa Chiuta nyengo yose?

¹¹“Ine nditi ndimusambizgani vya nkhongono za Chiuta. Nditi ndibisenge chara, ivyo Mwenenkhongono zose wanozgera.

¹²Nadi, mose mwajiwonera mwekha, kasi sono chifukwa uli mukuyowoya vyawakawaka?”

¹³[4]“Chilango cha muheni kufumira kwa Chiuta ndi ichi, chiharo icho ŵakutindiŵizga ŵanyawo, ŵakupokera kufuma kwa Mwenenkhongono zose,

¹⁴ŵana ŵakhe, nanga ŵangaŵa ŵanandi uli, ŵati ŵakomeke mu nkhondo, ŵazukuru ŵakhe ŵati ŵakavukenge vyakurya.

¹⁵Nthenda yakofya yizamkukoma awo ŵizamkukharako, vyokoro vyawo kuti vyamkuŵalira chara.

¹⁶Nangauli wangawunjika ndarama za silivanga ndi fuvu, panji walunde vyakuvwara nga ndi dongo,

¹⁷kweni nanga wangalundika ntheura, ŵarunji ndiwo ŵizamkuvwara, ŵambula kalema ndiwo ŵizamkugaŵana siliva yura.

¹⁸Nyumba iyo wayizenga, yili nga ndi ukonde wa utatavu, nga ndi chisakasa icho mulinda wakuzenga.

¹⁹Wakuruta kuya kagona pa chitara nga ndi musambazi, kweni wizamkuchita ntheura chara. Para wawuka waka, wakuwona kuti usambazi wakhe wamara.

²⁰Vyakofya vikumukukura nga ndi chigumura. Iyo wakuputwa na kavuruvuru mu nyengo ya usiku.

²¹Mphepo ya kumafumiro gha dazi, yikuŵayegha na kuruta nawo kutali, yikuŵaphyera kufuma pa malo ghawo.

²²Yikuputira pa iwo mwa nkhongono, kwambula na chitima, ŵakuchimbirako ku nkhongono zakhe luŵiro.

²³Mphepo yeneiyi yikuŵahoyera uku ŵakuchimbira, ndipo yikuŵaseka kose uko ŵakuruta.