Read new_tumbuka_bible Yobe 28 Bible Online

Yobe 28 - new_tumbuka_bible bible

Yobe 28

¹“Nadi uliko mugodi uko siliva wakujimika, malo ghaliko uko golide likwengeka.

²Chisulo chikutoreka kufuma mu charu, mkuŵa ukusongonoleka kufuma ku mawe.

³Ŵanthu ŵakunjira pasi na kungweruska mdima, kupenjerera libwe la chisulo ili. Ŵakunjira mpaka pasi chomene ku mdima wa bii, kuti mpaka ŵalisange.

⁴Ŵakujima nthowa za migodi, kutali na uko ŵanthu ŵakukhara, ku malo uko ŵanthu ŵakwendako chara. Ŵakuŵa kutali na ŵanthu, ŵakuning'ina na vingwe uko na uko pakukhilira pasi pa migodi.

⁵Mu charu cha pasi ndimo mukufuma vyakurya, kweni kusi kwakhe kukusongonoka nga ndi para kuli moto.

⁶Mu mawe ghakhe ndimo muli mawe ghakuzirwa gha safire ndiposo na fuvu la golide.

⁷Kulije chiyuni icho chikumanya nthowa ya kwenekura, jiso la kaŵando lingawona kalikose chara.

⁸Vikoko vyakujikuzga kuti vili kwendako kura chara, nkharamu nayo kuti yili kufikako chara.

⁹“Munthu wakuteŵeta pa jarawe lakukhora la sangalawe, wakugadabula mapiri apo pali malufura ghawo.

¹⁰Munthu wakujula nthowa mukati mu majarawe, maso ghakhe ghakuwona kalikose ako nkhakuzirwa.

¹¹Wakujara tumironga kuti maji ghareke kwenda, icho nchakubisika, wakuchifumiskira pakweru.

¹²Kweni kasi mahara ghangasangika nkhu? Kasi umanyi ukukhara nkhu?

¹³“Munthu kuti wakumanya nthowa ya ku mahara chara, kuti yikusangika mu charu chakukhara ŵanthu chara.

¹⁴Ndimba zikuti, ‘Mahara ghali mwa ine chara.’ Nyanja zikuti, ‘Mahara ghali mwa ise chara.’

¹⁵Mahara ghangagulika na golide chara, siliva lingapimika na mtengo wa mahara chara.

¹⁶Mahara ghangagulika na mtengo wa golide wakuzirwa chara, nesi na libwe lakuzirwa la onike panji la safire.

¹⁷Golide na mawe gha galasi, kuti vingayana na mahara chara, nanga nkhusinthaniskika na vitowelo vya golide lakwengeka makora.

¹⁸Libwe la korala na la khrisitala ghangayana chara na mahara, mtengo wa mahara ukuruska wa mikanda yakuzirwa.

¹⁹Mawe gha topazi gha ku Etiyopiya, kuti ghangayana na mtengo wa mahara chara, ghakuyana na golide mwenecho chara.

²⁰“Sono kasi mahara ghakufuma nkhu? Kasi umanyi ukukhara nkhu?

²¹Mahara ghakubisika ku vyamoyo vyose, ghakubisika ku viyuni vya mudera.

²²Pharaniko na nyifwa vikuyowoya vikuti, ‘Ise tili kupulikapo mu makutu ghithu lumbiri lwa mahara.’

²³“Chiuta yekha wakumanya nthowa yakuyira ku mahara, ndiyo wakumanya uko ghakukhara.

²⁴Pakuti Chiuta wakulaŵiska ku mphererekezgo za charu, wakuwona vyose ivyo vili kusi ku mtambo.

²⁵Chiuta wakapereka nkhongono ku mphepo, na kupima kunjira kwa nyanja,

²⁶para wakaŵika dango kuti vura yirokwenge, na kujula nthowa za leza,

²⁷penepapo wakawona mahara na kupima kuzirwa kwakhe, ndipo wakaghakhozga na kughasanda chomene.

²⁸“Ntheura wakati ku munthu, ‘Kopa FUMU ndiko ndi mahara, kupatukako ku kwananga ndiko kuŵa na umanyi.’ ”